ފްރާންސް ގެ ރައީސް މެކްރޮން އާ އެކު އެއްވެސް މީހަކު މަސައްކަތް ކުރަން ބޭނުން ނުވާ ކަމަށާއި، ވަރަށް އަވަހަށް އޭނާގެ ވަޒީފާ ގެއްލޭނެ ކަމަށް ޓްރަމްޕް ވިދާޅުވެއްޖެ

ފްރާންސް ގެ ރައީސް އެމަނުއެލް މެކްރޮން އާއެކު އެއްވެސް މީހަކު މަސައްކަތް ކުރަން ބޭނުން ނުވާ ކަމަށާއި އެއީ ވަރަށް އަވަހަށް އޭނާގެ ވަޒީފާ ގެއްލޭނެ އަތީ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޣައްޒާ ގެ ސުލްހައިގެ ކަންކަން ބެލެހެއްޓުމަށް އުފައްދާފައިވާ "ބޯޑް އޮފް ޕީސް" ގައި ބައިވެރިވެވަޑައިގަތުމަށް ފްރާންސްގެ ރައީސް އެމަނުއެލް މެކްރޮން އިއުތިރާޒު ކުރެއްވި ކަމަށް ރިޕޯޓްތައް ބުނުމާ ގުޅިގެން، ފްރާންސުން އެތެރެކުރާ ވައިން އާއި ޝެމްޕޭނުން %200 ގެ ޓެރިފް (އިމްޕޯޓް ޑިއުޓީ) އެއް ނަގާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.

މިއާމީގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން، ޓްރަމްޕް ވަނީ މެކްރޮންގެ ނުފޫޒާ މެދު ސުވާލު އުފައްދަވައި، ވިޔަފާރީގެ ދަތިކުރުމުގެ ފިޔަވަޅުތައް ބޭނުންކުރައްވާނީ އޭނާ އަށް ފިއްތުންތައް ކުރިމަތިކުރުވާ ބާރެއްގެ ގޮތުގައި ކަމަށް ވިދާޅުވެފަ އެވެ.

"އޭނާ (މެކްރޮން) އާ އެކު މަސައްކަތްކުރާކަށް އެއްވެސް މީހަކު ބޭނުމެއް ނުވޭ، ސަބަބަކީ ވަރަށް އަވަހަށް އޭނާގެ ރިޔާސީ ދައުރު ހަމަވާނެ،" ޓްރަމްޕް ވިދާޅުވިއެވެ. "އެހެންވީމާ އެއީ މައްސަލައެއް ނޫން. އެމީހުން އަހަރެމެންނާ ދެކޮޅުވެރިވާނަމަ، އަހަރެމެން އެ ގައުމުގެ ވައިން އާއި ޝެމްޕޭނުން 200% ގެ ޓެރިފް ނަގާނަން. އޭރުން އޭނާ ބޯޑުގައި ބައިވެރިވާނެ. އެކަމަކު އޭނާ ބައިވެރިވުން މަޖުބޫރެއް ނޫން."

މެކްރޮންގެ ފަސް އަހަރުގެ ރިޔާސީ ދައުރު ހަމަވާނީ 2027 ވަނަ އަހަރުގެ މެއި މަހުއެވެ. ފްރާންސްގެ ގާނޫނު ބުނާގޮތުން ތިންވަނަ ދައުރަކަށް އޭނާ އަށް ކުރިމައްޗެއް ނުލެއްވޭނެ އެވެ.

"ބޯޑް އޮފް ޕީސް" އަކީ އިޒްރޭލާއި ހަމާސްއާ ދެމެދު ވެފައިވާ ހަމަލާބަދަލުކުރުން ހުއްޓާލުމުގެ އެއްބަސްވުން ތަންފީޒުކުރުމަށްޓަކައި، މިދިޔަ އަހަރުގެ ނޮވެމްބަރު މަހު އދ. ގެ ސަލާމަތީ މަޖިލީހުން ފާސްކޮށްގެން އުފައްދާފައިވާ ބައިނަލްއަގުވާމީ އިދާރާއެކެވެ. މި ބޯޑުގައި ބައިވެރިވުމަށް ރަޝިޔާގެ ރައީސް ވްލަޑިމިއަރ ޕުޓިން، އިނގިރޭސި ބޮޑުވަޒީރު ކިއަރ ސްޓާމަރ އަދި އިންޑިއާގެ ބޮޑުވަޒީރު ނަރެންދުރަ މޯދީ ހިމެނޭހެން ދުނިޔޭގެ އެކި ލީޑަރުންނަށް ވަނީ ދައުވަތު އަރުވާފަ އެވެ.

މީގެ އިތުރުން، ގްރީންލޭންޑް އެމެރިކާގެ ބާރުގެ ދަށަށް ގެންދިއުމަށް ގެންގުޅުއްވާ ރޭވުންތައް ޓްރަމްޕް ވަނީ އަލުން ތަކުރާރު ކުރައްވާފައެވެ. އަދި ވިލާތުގެ ގައުމުތަކުން މިކަމާ މާބޮޑަށް ދެކޮޅު ހަދާނެ ކަމަށް ގަބޫލު ނުކުރައްވާ ކަމަށް ވެސް ވިދާޅުވި އެވެ. "އަހަރެމެން އެތަން (ގްރީންލޭންޑް) ހޯދަން އެބަޖެހޭ. އެމީހުންނަކަށް އެތަން ރައްކާތެރިއެއް ނުކުރެވޭނެ،" ޓްރަމްޕް ވިދާޅުވި އެވެ.

ގްރީންލޭންޑް ޑެންމާކުގެ މިލްކެއްގެ ގޮތުގައި އޮންނަ އޮތުމާ ބެހޭގޮތުން ވާހަކަދައްކަވަމުން ޓްރަމްޕް ވިދާޅުވީ، ޑެންމާކުގެ ލީޑަރުންނަކީ "ވަރަށް ރަނގަޅު ބައެއް" ކަމަށެވެ. ނަމަވެސް އެތައް ސަތޭކަ އަހަރެއްގެ ތާރީޚެއް ގްރީންލޭންޑާއި ޑެންމާކާ ގުޅޭ ގޮތުން އޮތުމަކީ އެތަނުގެ މިލްކުވެރިކަން ލިބޭނެ ސަބަބެއް ނޫން ކަމަށް އޭނާ ވަނީ ވިދާޅުވެފަ އެވެ.

"މީގެ 500 އަހަރު ކުރިން އެތަނަށް ބޯޓެއް ގޮސްފައި އަނބުރާ އައުމަކީ އެ ބިމުގެ މިލްކުވެރިކަން ލިބޭނެ ކަމެއް ނޫން،" ޓްރަމްޕް ވިދާޅުވި އެވެ. އެހެން ނަމަވެސް ޓްރަމްޕް އެ އިޝާރާތް ކުރެއްވީ ކޮން "ބޯޓަކަށް" ކަމެއް ސާފެއް ނުވެއެވެ.

ޑެންމާކުން ގްރީންލޭންޑުގައި އިސްތިއުމާރީ ބާރު ހިންގަން ފެށީ 1721 ވަނަ އަހަރުއެވެ. އަދި 1953 ވަނަ އަހަރު އެއީ ޑެންމާކުގެ ބައެއްގެ ގޮތުގައި ހަމަޖެހުނެވެ. 2009 ވަނަ އަހަރު ޑެންމާކުން ވަނީ ގްރީންލޭންޑަށް އަމިއްލަ ވެރިކަމުގެ ބާރުތައް ދީފައެވެ. ނަމަވެސް ޚާރިޖީ ސިޔާސަތާއި ދިފާއީ ކަންކަން އަދިވެސް ބަލަހައްޓަނީ ޑެންމާކުންނެވެ.

ނިމިދިޔަ ހުކުރު ދުވަހު ޓްރަމްޕް ވަނީ، ވިލާތުގެ ގާނޫނު ހަދާ މަޖިލީހުގެ މެންބަރުން ބޭނުންވިޔަސް ނުވިޔަސް، "ދުނިޔޭގެ ސަލާމަތަށްޓަކައި" ގްރީންލޭންޑް އެމެރިކާގެ ބާރުގެ ދަށަށް ގެންދާނެ ކަމަށް ވިދާޅުވެ އިންޒާރު ދެއްވާފަ އެވެ. އަދި ހޮނިހިރު ދުވަހު އޭނާ ވަނީ، ގްރީންލޭންޑް އެމެރިކާގެ ބާރުގެ ދަށަށް ދަންދެން، އިނގިރޭސިވިލާތް ހިމެނޭހެން ވިލާތުގެ އަށް ގައުމަކުން އެތެރެކުރާ މުދަލުން 25% ގެ ޓެރިފް ނަގާނެ ކަމަށް ވެސް ވިދާޅުވެފަ އެވެ.

ގްރީންލޭންޑް ހޯދުމަށް އަސްކަރީ ބާރުގެ ބޭނުންކުރުމަކީ ވެސް ޓްރަމްޕް ދުރުކަމެއްގެ ގޮތުގައި ނުދެކެއެވެ. ނަމަވެސް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި، ޓްރަމްޕް އެންމެ ބޮޑަށް ބޭނުންފުޅުވަނީ އެ ރަށް ގަތުމަށެވެ.

ޓްރަމްޕްގެ މި އިންޒާރުތަކާ ގުޅިގެން، ވިލާތުގެ ގައުމުތަކުން މިހާރު ދަނީ އެމެރިކާއާ ދެކޮޅަށް އިގްތިސާދީ ފިޔަވަޅުތައް އެޅުމަށާއި، ބަދަލުހިފުމުގެ ގޮތުން އެމެރިކާގެ މުދަލުން ޓެރިފް ނެގުމާ މެދު މަޝްވަރާ ކުރަމުންނެވެ.