ޣައްޒާ އަށް އިޒްރޭލުން ހަމަލާ ދީ ތިން ނޫސްވެރިން ހިމެނޭހެން 11 ފަލަސްތީީނު މީހުން ޝަހީދުކޮށްލައިފި

ބުދަ ދުވަހުގެ ފަތިހުން ފެށިގެން އިޒްރޭލުން ޣައްޒާ އަށް ދެމުންދާ ހަމަލާތަކުގައި، ދެ ކުޑަކުދިންނާއި ތިން ނޫސްވެރިން ހިމެނޭހެން މަދުވެގެން 11 ފަލަސްތީނު މީހުން ޝަހީދުވެފައިވާ ކަމަށް ޣައްޒާގެ މިނިސްޓްރީ އޮފް ހެލްތުން ހާމަކޮށްފި އެވެ. މި ހަމަލާތަކުގައި އިތުރު ހަ މީހަކަށް އެކި ވަރުގެ އަނިޔާ ލިބިފައިވާ ކަމަށްވެސް އެ މިނިސްޓްރީން ބުނެ އެވެ.

މިނިސްޓްރީގެ ޑިރެކްޓަރ ޖެނެރަލް މުނީރު އަލްބުރުޝް އަލްޖަޒީރާ އަށް މައުލޫމާތު ދެއްވަމުން ވިދާޅުވީ، ބުދަ ދުވަހު އިޒްރޭލުން ދިން ހަމަލާއެއްގައި ޝަހީދުވި ތިން ފޮޓޯގްރަފަރުންނަކީ މިސުރުން ގައްޒާއަށް ފޮނުވާ އެހީގެ މަސައްކަތްތައް ބަލަހައްޓާ "އީޖިޕްޝަން ކޮމިޓީ ފޯ ޣައްޒާ ރިލީފް" ގައި މަސައްކަތް ކުރަމުންދިޔަ ބައެއް ކަމަށެވެ.

އަލްޖަޒީރާ އަށް މައުލޫމާތު ދިން މެޑިކަލް އޮފިޝަލުންނާއި އެ މީހުންނާ އެކުގައި މަސައްކަތް ކުރާ ފަރާތްތަކުން ބުނި ގޮތުގައި، ތިން ނޫސްވެރިން ޝަހީދު ކޮށްލީ ޣައްޒާގެ މެދުތެރޭގެ ނެޓްޒަރިމް ކޮރިޑޯ ކައިރީގައި ހިނގަމުންދިޔަ ކަންކަން ރިޕޯޓް ކުރުމުގެ މަސައްކަތުގައި އުޅެނިކޮށް، އެ މީހުން ދަތުރުކުރި އުޅަނދަށް އިޒްރޭލުން ދިން ހަމަލާއެއްގަ އެވެ. މި ހަމަލާގައި ހަތަރުވަނަ މީހަކު ވެސް ޝަހީދުވެފައިވާ ކަމަށް އަލްޖަޒީރާގެ ޓީމުން ރިޕޯޓްކޮށްފައިވެ އެވެ.

އިންޓަނެޓްގައި ދައުރުވަމުންދާ ވީޑިއޯތަކުން ފެންނަ ގޮތުގައި، ހަމަލާ ދީފައިވާ އުޅަނދު އޮތީ މަގުގެ އެއްފަރާތުގައި އެއްކޮށް އަނދާ އަޅިއަށް ވެފައެވެ.

އެ ކޮމިޓީގެ ތަރުޖަމާނު މުހައްމަދު މަންސޫރު އެސޯސިއޭޓެޑް ޕްރެސް (އޭޕީ) އަށް ބުނި ގޮތުގައި، އެ ނޫސްވެރިން މަސައްކަތް ކުރަމުން ދިޔައީ އަލަށް ހެދި ވަގުތީ ހިޔާވަހިކަމެއްގެ މަންޒަރުތައް ނެގުމަށެވެ. އަދި މި ހަމަލާ ދީފައި ވަނީ އިޒްރޭލުގެ ކޮންޓްރޯލް އޮންނަ ސަރަހައްދާ ފަސް ކިލޯމީޓަރު ދުރުން ކަމަށާއި، އެ އުޅަނދަކީ މިސުރުގެ ކޮމިޓީއަށް ނިސްބަތްވާ އުޅަނދެއްކަން އިޒްރޭލުގެ އަސްކަރިއްޔާ އަށް އެނގޭނެ ކަމަށް ވެސް އޭނާ ބުންޏެވެ.

ނަމަވެސް، އިޒްރޭލުގެ އަސްކަރީ ރޭޑިއޯއިން ސަލާމަތީ މަސްދަރަކާ ހަވާލާދީ ބުނެފައި ވަނީ، ޣައްޒާގެ މެދުތެރޭގައި އުޅަނދަކަށް ހަމަލާދިނީ އޭގައި ތިބި މީހުން ޑްރޯން ބޭނުންކޮށްގެން އިޒްރޭލު ސިފައިންގެ މައުލޫމާތު އެއްކުރަމުން ދިޔުމުން ކަމަށެވެ.

އެއް އާއިލާއަކުން ތިން މީހުން ޝަހީދުވުން

ގައްޒާގެ މެދުތެރޭގެ ދީރުލް ބަލާހްގެ އިރުމަތީ ސަރަހައްދަށް ދިން އެހެން ހަމަލާއެއްގައި، އެއް އާއިލާއަކަށް ނިސްބަތްވާ ތިން މީހުން ޝަހީދުވެފައިވާ ކަމަށް އަލްއަގްސާ މާޓީއަސް ހޮސްޕިޓަލުން ވަނީ ނޫސްވެރިންނަށް ކަށަވަރުކޮށްދީފަ އެވެ. މީގެ ތެރޭގައި ކުޑަކުއްޖަކު ވެސް ހިމެނެއެވެ. ޝަހީދުވީ ބައްޕައަކާއި އޭނާގެ ދަރިފުޅުގެ އިތުރުން އެ އާއިލާގެ އެހެން މީހެކެވެ.

ޣައްޒާގެ ދެކުނުގައި، އިޒްރޭލު ސިފައިން ބަޑިޖަހައި 13 އަހަރުގެ ކުއްޖަކު ޝަހީދުކޮށްލާފައިވާ ކަމަށް އަލްޖަޒީރާގެ ޓީމުން ވަނީ ރިޕޯޓްކޮށްފަ އެވެ. އޭޕީ އިން ހޮސްޕިޓަލުގެ މުވައްޒަފުންނާ ހަވާލާދީ ބުނި ގޮތުގައި، މި ކުއްޖާ ޝަހީދުކޮށްލީ ބަނީ ސުހައިލާގެ އިރުމަތީ އަވަށުން ދަރު ހޮވަން އުޅެނިކޮށެވެ. އިންޓަނެޓްގައި އާންމުވެފައިވާ ވީޑިއޯއަކުން، ހޮސްޕިޓަލުގެ އެނދުމަތީގައި އޮތް އެ ކުއްޖާގެ ހަށިގަނޑު ކައިރީގައި ބައްޕަ ރޮއި ހިތާމަ ކުރާ މަންޒަރު ފެނެ އެވެ.

މީގެ އިތުރުން، ޣައްޒާގެ ދެކުނުން ޚާން ޔޫނިސް ސަރަހައްދަށް ދިން ހަމަލާއެއްގައި 32 އަހަރުގެ އަންހެނަކު ޝަހީދުވެފައިވާ އިރު، އުތުރުގައި ދިން ހަމަލާތަކެއްގައި އިތުރު ދެ މީހަކު ޝަހީދުވެފައިވާ ކަމަށް ވަފާ ނިއުސް އެޖެންސީން ވަނީ ރިޕޯޓްކޮށްފަ އެވެ.