ދެކުނު އެފްރިކާ އިން އިޒްރޭލުގެ ސަފީރު ބޭރުކޮށްލައިފި

ދެކުނު އެފްރިކާގެ ސިޔާދަތަށް ގޮންޖަހައި، ޑިޕްލޮމެޓިކް އުސޫލުތަކާ ޚިލާފު އަމަލުތަކެއް ހިންގާފައިވާ ކަމަށް ތުހުމަތުކޮށް، އެ ގައުމުގައި ހުންނަވާ އިޒްރޭލުގެ ސަފީރު ބޭރުކޮށްލުމަށް ދެކުނު އެފްރިކާގެ ފޮރިން މިނިސްޓްރީން އަމުރުކޮށްފި އެވެ.

ދެކުނު އެފްރިކާގެ ޑިޕާޓްމަންޓް އޮފް އިންޓަނޭޝަނަލް ރިލޭޝަންސް އެންޑް ކޯޕަރޭޝަނުން ހުކުރު ދުވަހު ބުނީ، އިޒްރޭލު އެމްބަސީގެ ޝާޒޭ ޑަފެއަރ އެރިއަލް ސައިޑްމަން އަކީ އެ ގައުމަށް ބޭނުންނުވާ މީހެއް ކަމަށް ކަނޑައަޅައި، 72 ގަޑިއިރު ތެރޭގައި ގައުމުން ބޭރުވުމަށް އަންގާފައިވާ ކަމަށެވެ.

ސައިޑްމަން އާ ދެކޮޅަށް ދެކުނު އެފްރިކާ އިން ކުރާ ތުހުމަތުތަކުގެ ތެރޭގައި، ސޯޝަލް މީޑިއާގައި އެ ގައުމުގެ ރައީސް ސިރިލް ރާމަފޯސާ އަށް ވަރަށް ހުތުރު ބަހުން އެއްޗެހިކިޔާ، އިޒްރޭލުގެ އިސް އޮފިޝަލުންތަކެއް އެ ގައުމަށް ކުރި ކަމަށް ބުނާ ޒިޔާރަތްތަކުގެ މައުލޫމާތު ގަސްދުގައި ފޮރިން މިނިސްޓްރީ އާ ހިއްސާ ނުކުރުން ހިމެނެ އެވެ.

އެ ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، މިފަދަ އަމަލުތަކަކީ ޑިޕްލޮމެޓިކް އިމްތިޔާޒުތަކުގެ ނާޖާއިޒު ފައިދާ ނެގުމާއި، ވިއެނާ ކޮންވެންޝަނާ ކަނޑައެޅިގެން ޚިލާފުވުން ކަމަށެވެ. އަދި މި އަމަލުތަކުގެ ސަބަބުން ދެ ގައުމުގެ ދެމެދުގައި އޮންނަންޖެހޭ އިތުބާރާއި ޑިޕްލޮމެޓިކް އުސޫލުތަކަށް ވަރަށް ބޮޑަށް ބުރޫއަރާފައިވާ ކަމަށްވެސް އެ ބަޔާނުގައިވެ އެވެ.

މީގެ އިތުރުން، ކުރިއަށް އޮތް ތަނުގައި އިޒްރޭލުގެ ސަރުކާރުން ފޮނުވާ ޑިޕްލޮމެޓުންނަކީ ދެކުނު އެފްރިކާގެ ޖުމްހޫރިއްޔާ އަށާއި ބައިނަލްއަގުވާމީ މިންގަނޑުތަކަށް އިހުތިރާމް ކުރާ ބަޔަކަށް ހެދުމަށް ވެސް އެ ގައުމުން ވަނީ ގޮވާލާފަ އެވެ.

ދެކުނު އެފްރިކާގެ މި ނިންމުމާ ގުޅިގެން އިޒްރޭލުގެ ޚާރިޖީ ވުޒާރާ އިން ވަނީ ދެކުނު އެފްރިކާގެ އިސް ޑިޕްލޮމެޓް، ޝޯން އެޑްވާޑް ބައިނަވެލްޑް އަކީ އެ ގައުމަށް "ބޭނުންނުވާ މީހެއް"  ކަމަށް ކަނޑައަޅައި، 72 ގަޑިއިރުގެ ތެރޭގައި ގައުމުން ފޭބުމަށް އަންގާފަ އެވެ.

މީސްމީޑިއާ ގައި އާންމުކުރި ބަޔާނެއްގައި އިޒްރޭލުގެ ވުޒާރާ އިން ބުނީ، ކުރިއަށް އޮތް ތަނުގައި އިތުރު ފިޔަވަޅުތައް އެޅުމާ މެދު ވިސްނާނެ ކަމަށެވެ.

ބައިނަވެލްޑް އަކީ ފަލަސްތީނުގެ ދައުލަތަށް ކަނޑައަޅާފައި ހުންނަވާ ދެކުނު އެފްރިކާގެ ސަފީރެވެ. ދެކުނު އެފްރިކާ ސަރުކާރުގެ ވެބްސައިޓުގައިވާ ގޮތުން، އޭނާ މަސައްކަތް ކުރައްވަނީ އިޒްރޭލުން ހިފާފައިވާ ހުޅަނގު އައްސޭރީގެ ރާމަﷲގައި ހުންނަ އޮފީހެއްގަ އެވެ.

ދެކުނު އެފްރިކާގެ ޚާރިޖީ ވުޒާރާގެ ތަރުޖަމާނު ކްރިސްޕިން ފިރީ ވިދާޅުވީ، އިޒްރޭލުން ކުރިމަތިކުރާ ހުރަސްތަކުގެ ސަބަބުން، ސަފީރުގެ ފަތްކޮޅު ހުށަހަޅަން ޖެހިފައިވަނީ ފަލަސްތީނު ހިސޯރު ކޮށްގެން އުޅޭ އިޒްރޭލު މެދުވެރިކޮށް ކަމަށާއި، މިއީ ޖޯކެއް ފަދަ ދަތި އިންތިޒާމެއް ކަމަށެވެ.

ފިރީ 'އެކްސް'ގައި ލިޔުއްވާފައިވާ ގޮތުގައި، މިއީ ފަލަސްތީނުގެ މިނިވަން ދައުލަތަކާ މެދު ބައިނަލްއަގުވާމީ މުޖުތަމައުން އެއްބަސްވެފައިވާ ކަންކަމަށް އިޒްރޭލުން އިހުތިރާމް ކުރުމަށް އިންކާރު ކުރާކަން ހާމަވާ ކަމެކެވެ.

މިކަން މި ހިނގީ ޣައްޒާގައި އިޒްރޭލުން ހިންގަމުންދާ ނަސްލު ނައްތާލުމުގެ ހަނގުރާމައާ ގުޅިގެން ދެކުނު އެފްރިކާ އާއި އިޒްރޭލާ ދެމެދު އޮތް ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ.

ޣައްޒާގެ މުސްލިމުންނާ ދެކޮޅަށް އިޒްރޭލުން ނަސްލު ނައްތާލުމުގެ އަމަލުތައް ހިންގާ ކަމަށް ތުހުމަތުކޮށް، 2023 ވަނަ އަހަރުގެ ޑިސެމްބަރު މަހުގެ ފަހުކޮޅު ދެކުނު އެފްރިކާ އިން ވަނީ ބައިނަލްއަގުވާމީ އަދުލުގެ މަޖިލީހަށް (އައި.ސީ.ޖޭ) މައްސަލަ ހުށަހަޅާފަ އެވެ.

އެ ދުވަސްވަރު ދެކުނު އެފްރިކާ އިން ބުނެފައި ވަނީ، އިޒްރޭލުން ޣައްޒާ އަށް ދެމުންދާ ރަހުމުކުޑަ ހަމަލާތަކާއި، އެއްވެސް ބެލުމެއް ނެތި ބާރުގެ ބޭނުންކުރުމުގެ ސަބަބުންނާއި، އަދި ރައްޔިތުން ގަދަކަމުން ގެދޮރުން ބޭރުކުރަމުންދާތީ، އެކަމުގެ ސަބަބުން އާންމު ރައްޔިތުންނަށް ކުރިމަތިވެފައިވާ ހިތްދަތި ހާލަތާ މެދު އެ ގައުމުން އިންތިހާ އަށް ކަންބޮޑުވާ ކަމަށެވެ.