ސްކާފު އަޅައިގެން ހުރެ، ގާޑިއޯލާ ބުނީ ޣައްޒާގެ ކުޑަ ކުދިން އުޅޭ ޙާލު ފެނުމުން ހިތްދަތިވާ ކަމަށް

މެންޗެސްޓަރ ސިޓީ އަށް އިރުޝާދު ދެމުން އަންނަ ސްޕެއިންގެ ޕެޕް ގާޑިއޯލާ، ފަލަސްޠީނުގެ ޣައްޒާ އާއި އެ ސަރަހައްދުގައި އުޅެމުން އަންނަ ކުޑަ ކުދިންގެ ދިފާއުގައި ވާހަކަ ދައްކައިފި އެވެ.

ސްޕެއިންގެ ބާސެލޯނާގައި ބޭއްވި ޗެރިޓީ އެއްވުމެއްގައި ބައިވެރިވެ ގާޑިއޯލާ ވަނީ، ޣައްޒާ އާއި އެ ސަރައްދުގައި އުޅޭ ކުޑަ ކުދިންގެ ދިފާއުގައި "އަސަރު ގަދަ" ވާހަކައެއް ދައްކައިފަ އެވެ. އެ ވާހަކަ ދެއްކިއިރު ގާޑިއޯލާ ބުނީ، ކަރުގައި ސްކާފެއް އަޅައިގެންނެވެ. މީގެ ކުރިން ވެސް ގާޑިއޯލާ ވަނީ ފަލަސްޠީނުގެ ހައްގުގައި ގިނަ ވާހަކަ ތަކެއް ދައްކައިފަ އެވެ. 

އެ އިވެންޓުގައި ބައިވެރިވެ ވާހަކަ ދައްކަމުން ގާޑިއޯލާ ބުނީ، އޭނާ އަކީ ފަލަސްޠީނަށް ސަޕޯޓު ކުރާ، އެ ޤައުމުގެ ސަޕޯޓަރެއް ކަމަށެވެ. ގާޑިއޯލާ ބުނީ، ވަކި ފަރާތަކަށް ނުޖެހި ހުންނަން ބޭނުންވާ ކަމަށް ބައެއް މީހުން ބުނަމުން ގެންދިޔަ ނަމަވެސް، އޭނާ އެ ގޮތް ބޭނުން ނުވާ ކަމަށެވެ. 

ސޯޝަލް މީޑިއާ އިން ފެންނަނީ ފަލަސްޠީނުގެ މައުސޫމު ކުޑަ ކުދިން، އެ ކުދިންގެ މަންމަ ހޯދަން އުޅޭ މަންޒަރު ކަމަށާއި، އެއީ ހިތްދަތި މަންޒަރެއް ކަމަަށް ގާޑިއޯލާ ބުންޏެވެ. އަބަދު ވެސް އޭނާ އަށް ސިފަ ވަނީ، ދުނިޔެ އަށް މުޚާތަބުކޮށް "ކަލޭމެން ކޮބާ" ހޭ އެ މީހުން ބުނާ އިޙުސާސް ކަމަށެވެ. އަދި އެހީތެރިކަމަށް އެދި އާދޭސް ކުރަމުން ދާ ކަމަށް ގާޑިއޯލާ ފާހަގަ ކުރި އެވެ. 

މީގެ އިތުރުން ގާޑިއޯލާ ބުނީ، ފަލަސްޠީނުގެ ހައްގުގައި އޭނާ ވާހަކަ ދައްކާނެ ކަމަށާއި، އެ އަޑު އުފުލުން ހުއްޓައި ނުލާނެ ކަމަށެވެ. އަދި ފަލަސްޠީނަށްޓަކައި އޭނާ އަށް އެހީތެރިކަން ދެވެން އޮތް ކޮންމެ ގޮތަކަށް، އެހީތެރިކަން ފޯރުކޮށްދޭނެ ކަމަށް ގާޑިއޯލާ ބުންޏެވެ. އެކަން ފާހަގަކޮށް ގާޑިއޯލާ ބުނީ، އޭނާ ހުރީ ފަލަސްޠީނާ އެކު ކަމަށެވެ. 

އެ އިވެންޓުގައި ބައިވެރިވެ ގާޑިއޯލާ ވާހަކަ ދެއްކިއިރު، އިނގިރޭސި ޕްރިމިއާ ލީގުގައި ޓޮޓެންހަމާ ދެކޮޅަށް ސިޓީ އިން ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވެސް ގާޑިއޯލާ ބައިވެރިވެފައި ނުވެ އެވެ. ސިޓީ އިން ބުނެފައި ވަނީ "އަމިއްލަ ސަބަބަކަށް ޓަކައި" ހުކުރު ދުވަހު އޮތް ނޫސްވެރިންގެ ބައްދަލުވުމުގައި ގާޑިއޯލާ ބައިވެރި ނުވާނެ ކަމަށެވެ. އޭނާގެ ބަދަލުގައި ނޫސްވެރިންގެ ބައްދަލުވުމުގައި ބައިވެރި ވެފައި ވަނީ އެސިސްޓެންޓު ކޯޗެވެ.

މީގެ ކުރިން ވެސް ފަލަސްޠީނުގެ މައްސަލައިގައި ގާޑިއޯލާ ވާހަކަ ދައްކާފައިވާއިރު، އޭނާ ވަނީ ބައިނަލްއަޤުވާމީ މުޖުތަމައު އާއި، ދުނިޔޭގެ ލީޑަރުންނަށް ވަރަށް ބޮޑަށް ނުރުހުން އަމާޒު ކޮށްފަ އެވެ. އޭރު ގާޑިއޯލާ ބުނެފައި ވަނީ، އެ ލީޑަރުންގެ މައްޗަށް އެއްވެސް އުންމީދެއް ނެތް ކަމަށެވެ. ދުނިޔޭގެ ލީޑަރުން ވެސް މަސައްކަތް ކުރަނީ އެ ބަޔަކަށް ލިބިފައި އޮތް ބާރުވެރިކަން ދަމަހައްޓަން ކަމަަށާއި، ބާރުވެރިކަން ދަމަހައްޓަން ކޮންމެ ކަމެއް ވެސް ކޮށްފާނެ ކަމަށް ގާޑިއޯލާ ބުނެފައިވެ އެވެ.