ވުލްވްސް ބަލިކޮށް، ސިޓީ އަށް ހަމަޖެހުމެއް

އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން ހަމަ ޖެހުމެއް ހޯދައިފި އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި ސިޓީ އިން އެ ޓީމުގެ ދެ ލަނޑު ވެސް ޖެހީ މެޗުގެ ފުރަތަމަ ހާފުގަ އެވެ. ވުލްވްސްއާ ދެކޮޅަށް ނިކުތްއިރު، އެންމެ ފަހުން ލީގުގައި ކުޅުނު މެޗު އަދި ޔުއެފާ ޗެމްޕިއަންސް ލީގުގައި ކުޅުނު މެޗުން ވެސް ބަލިވެ ސިޓީ އޮތީ ޕްރެޝަރުގަ އެވެ.

މެޗު ފަށައިގެން ނުވަ ވަނަ މިނެޓުގައި ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ސިޓީ އަށް ޖަހައިދިނީ އޮމަރު މާމޫޝް އެވެ. އެއީ މަތެއުސް ނޫނެސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ ފުރަތަމަ ހާފުގެ އިތުރު ވަގުތުގައި ސިޓީގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އެންޓޮއިން ސެމެންޔޯ އެވެ. އެ ލަނޑު ޖަހަން ސެމެންޔޯ އަށް ފުރުސަތު ތަނަވަސްކޮށްދިނީ ބޭނާޑޯ ސިލްވާ އެވެ. މެޗުގައި ސިޓީ އިން ވަނީ އިތުރު ލަނޑު ޖަހަން ވެސް ފުރުސަތު ތަނަވަސްކޮށްފަ އެވެ.

މޮޅާ އެކު ސިޓީ އޮތީ ލީގު ތާވަލްގެ ދެ ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 23 މެޗުން 46 ޕޮއިންޓާ އެކު އެވެ. މި ސީޒަންގެ ލީގުގައި 14 މެޗުން ސިޓީ މޮޅުވެފައިވާއިރު، ފަސް މެޗުން ވަނީ ބަލިވެފަ އެވެ. އަނެއް ހަތަރު މެޗު ނިމުނީ އެއްވަރު ވެގެންނެވެ. ސިޓީ އަށް ވުރެ އެއް މެޗު މަދުން ކުޅެގެން އާސެނަލް އެއް ވަނައިގައި އޮތްއިރު، މެޗުގެ އަދަދު ހަމަކޮށް ލީޑު ފުޅާ ކުރުމުގެ ފުރުސަތު އާސެނަލް އަށް އޮންނާނެ އެވެ.