ބޯޑޯ/ގިލްމް އަތުން ބަލިވެ، ސިޓީގެ ޙާލަތު ޕްރެޝަރަށް

ޔުއެފާ ޗެމްޕިއަންސް ލީގުގައި  ބޯޑޯ/ގިލްމްއާ ދެކޮޅަށް ކުޅުނު މެޗުން ބަލިވެ، މެންޗެސްޓަރ ސިޓީގެ ޙާލަތު ޕްރެޝަރަށް ވެއްޓިއްޖެ އެވެ.

 ބޯޑޯ/ގިލްމްގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 3-1 އިން ސިޓީގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި  ބޯޑޯ/ގިލްމް އިން ވަނީ ދެ ލަނޑު ޖަހައިފަ އެވެ. އަނެއް ލަނޑު ދެ ވަނަ ހާފުގައި ޖެހިއިރު، ސިޓީ އިން އެ ޓީމުގެ ހަަމައެކަނި ލަނޑު ޖެހީ ވެސް ދެ ވަނަ ހާފުގަ އެވެ. 

މެޗު ފަށައިގެން 22 ވަނަ މިނެޓުގައި ބޯޑޯ/ގިލްމް އަށް ލީޑު ނަގައިދިނީ ކެސްޕާ ހޯގް އެވެ. އޭގެ ދެ މިނެޓު ފަހުން އޭނާ ވަނީ އިތުރު ލަނޑެއް ޖަހައި އެ ޓީމުގެ ލީޑު ފުޅާ ކޮށްފަ އެވެ. އެ ދެ ލަނޑު ޖަހަން ވެސް ހޯގް އަށް ފުރުސަތު ތަނަވަސްކޮށްދިނީ އޮލޭ ޑިޑްރިކް ބްލޫމްބާގް އެވެ. 

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ބޯޑޯ/ގިލްމް އިން ވަނީ ތިން ވަނަ ލަނޑެއް ޖަހައި އިތުރަށް ލީޑު ފުޅާ ކޮށްދިނީ ޖެންސް ހައުގް އެވެ. އެއީ ސޮންޑްރީ ޕެޓް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި ސިޓީގެ ހަމައެކަނި ލަނޑު، މެޗުގެ 60 ވަނަ މިނެޓުގައި ޖެހީ ރަޔަން ޗާކީ އެވެ.

މި ބައްޔާ އެކު، އެންމެ ފަހުން ސިޓީ ކުޅުނު ދެ މެޗުން ވެސް އެ ޓީމު ވަނީ ބަލިވެފަ އެވެ. އިނގިރޭސި ޕްރިމިއާ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން ވެސް ސިޓީ ބަލިވެފައިވާއިރު، ޗެމްޕިއަންސް ލީގުގައި ސިޓީ އަތުން ބޯޑޯ/ގިލްމް ހޯދި މޮޅަކީ އިނގިޜޭސި ކުލަބެއް އަތުން އެ ޓީމަށް ހޯދުނު ފުރަތަމަ މޮޅެވެ.

މި ނަތީޖާ އާއެކު ސިޓީ އޮތީ ލީގު ތާވަލްގެ ހަތް ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ ހަތް މެޗުން 13 ޕޮއިންޓާ އެކު އެވެ. މިއީ މި ސީޒަންގެ ޗެމްޕިއަންސް ލީގުގައި ސިޓީ ބަލިވި ދެ ވަނަ މެޗެވެ.