އިޒްރޭލަށް އޮތް ހަސަދައިގެ ސަބަބުން، ރިޔާސީ ބަހުސްގެ ތެރެއިން ބައިޑަން އަވަހާރަކޮށްލަން މަސައްކަތް ކުރި

އިޒްރޭލާ ދެކޮޅަށް އެމެރިކާގައި ހިންގި ޙަރަކާތް ތަކުގެ ތެރެއިން، އެމެރިކާގެ ރައީސް ޖޯ ބައިޑަން އަވަހާރަ ކޮށްލަން މަސައްކަތް ކުރި ކަމުގެ ތުހުމަތުގައި ޒުވާނަކު ހައްޔަރު ކޮށްފި އެވެ.

އެގޮތުން ބައިޑަން އަވާހަރަ ކޮށްލަން މަސައްކަތް ކޮށްފައި ވަނީ 2024 ވަނަ އަހަރުގެ ތެރޭގަ އެވެ. އެ މައްސަލައިގެ ތުހުމަތުގައި ހައްޔަރު ކޮށްފައި ވަނީ އުމުރުން 23 އަހަރުގެ އާދަމް ބެންޖަމިން ހޯލް ނަމަކަށް ކިޔާ ޒުވާނެކެވެ. 

އެގޮތުން 2024 ވަނަ އަހަރު އޮތް އެމެރިކާގެ ރިޔާސީ އިންތިޚާބާ ގުޅިގެން ބޭއްވި، ރިޔާސީ ފުރަތަމަ ބަހުސް އޮތް ރޭ ބައިޑަން އަވަހާރަ ކޮށްލަން މަސައްކަތް ކުރި ކަމަށް ބުނެފައިވެ އެވެ. 2024 ވަނަ އަހަރުގެ ޖޫން މަހުގެ 27 ވަނަ ދުވަހު އެޓްލާންޓާގައި އޮތް ރިޔާސީ ބަހުސްގައި ބައިޑަން އާއި، މިހާރުގެ ރައީސް ޑޮނަލްޑް ޓްރަމްޕް ބައިވެރިވެ ވަޑައިގެންނެވިިރު، އޭނާ އެ ތަނަށް ދިޔައީ ބައިޑަން އަވަހާރަ ކޮށްލުމުގެ ނިޔަތުގައި ކަމަށް ފާހަގަ ކޮށްފައިވެ އެވެ. 

މިކަން ފަޅާ އަރާފައި ވަނީ އޭގެ އެއް އަހަރު ދުވަސް ފަހުންނެވެ. އެގޮތުން 2025 ވަނަ އަހަރުގެ އޮކްޓޫބަރު މަހުގެ ތެރޭގައި އެމެރިކާގެ އެލަބާމާގެ ވޮލަސް ސްޓޭޓް ކޮމިއުނިޓީ ކޮލެޖު ދަރިވަރުންނާ، ހޯލް މި ވާހަކަ ހިއްސާ ކޮށްފައިވާ ކަމަށް ވަނީ ދެނެގަނެވިފަ އެވެ. އެގޮތުން ދެ ރައުންޑު ހިމެނޭ ރިވޯލްވަރެއް އޭނާ ގެންގުޅުނު ކަމަށާއި، އެއީ ބައިޑަން އަވަހާރަ ކޮށްލަން އެކަށީގެންވާ އަދަދެއް ކަމަށް އޭނާ ބުނެފައިވާ ކަމަށް ދެނެގަނެވިފައިވެ އެވެ. އެގޮތުން ބައިޑަން އަށް ހަމަލާ ދީ އަވަހާރަ ކޮށްލެވޭނެ ކަމުގެ ޔަގީންކަން އޭނާ އަށް އޮތް ކަމަށާއި، އެފަދަ "ޝޮޓެއް" އަމާޒު ކުރެވޭނެކަން ޔަގީން ކުރެވުނު ކަމަށް އޭނާ ވަނީ ބުނެފަ އެވެ. 

މީގެ އިތުރުން އެ ކުދިންނާ ވާހަކަ ދައްކަމުން ހޯލް ބުނެފައި ވަނީ، އިޒްރޭލް އިން ފަލަސްޠީނުގެ ޣައްޒާގައި ހިންގަމުން އައި ހަނގުރާމައިގެ ސަބަބުން ފަަލަސްޠީނުގެ ކުޑަ ކުދިންނަށް ލިބިފައިވާ އަނިޔާގެ ފޮޓޯތައް ފެނުމުން އޭނާ ވަރަށް ބޮޑަށް ދެރަވި އެވެ. އެއާ އެކު، ބައިޑަން އަވަހާރަ ކޮށްލުމަށް ވަރަށް ރަނގަޅު "މެނިފެސްޓޯ" އެއް ތައްޔާރު ކުރި ކަމަށާއި، އެ މަސައްކަތުގައި އުޅެން ހަދައިގެން ކޮލެޖުން ފެއިލްވާ ހިސާބަށް ދިޔަ ކަމަށް ވެސް އޭނާ ވަނީ ދަރިވަރުންނާ ހިއްސާ ކޮށްފަ އެވެ. 

އެމެރިކާގެ ލޯކަލް ފުލުހުން ވަނީ ހޯލްގެ މި ވާހަކަތައް އެ ޤައުމުގެ ސީކްރެޓް ސާވިސްއާ ހިއްސާ ކޮށްފަ އެވެ. އެ މައްސަލައިގެ ތަހުގީގުގައި ޙަރަކާތްތެރިވި ފަރާތްތަކުން ވަނީ ހޯލްގެ ބެލެނިވެރިންނާ ވެސް ބައްދަލު ކޮށްފަ އެވެ. އެގޮތުން ހޯލް އެކަން ރޭވިތާ އެއް މަސް ދުވަސް ފަހުން އެކަމުގެ މައުލޫމާތު ބެލެނިވެރިންނަށް ލިބުނު ކަމަށާއި، އެއާ އެކު ރިވޯލްވަރު ހިފަހައްޓާފައިވާ ކަމަށް ބެލެނިވެރިން ވަނީ މައުލޫމާތު ދީފަ އެވެ. ހޯލް ދިރިއުޅެމުން އަންނަނީ އޭނާގެ ބެލެނިވެރިންނާ އެކު އެލަބާމާގެ ކްރޭން ހިލްގައި ކަމަށްވާއިރު، އެ ސަރަހައްދުން އެޓްލަންޓާ އަށް ދާން ތިން ގަޑިއިރު ހޭދަ ވާނެ އެވެ. 

އެ ހާދިސާގެ މައުލޫމާތު ހޯލް ވަނީ ތަހުގީގު ކުރާ ފަރާތްތަކާ ވެސް ހިއްސާ ކޮށްފަ އެވެ. އެގޮތުން އޮންލައިންކޮށް ފެނުނު ފޮޓޯ ތަކެއްގެ ސަބަބުން ހިތްދަތިވެ، ރައީސް އަވަހާރަ ކޮށްލުމުގެ ވިސްނުން ސިކުނޑި އަށް ގެނެވުނު ކަމަށް އޭނާ ބުނެފައިވެ އެވެ. އެއާ އެކު، ރިވޯލްވަރު ފޮއްޓަކަށް ލައިގެން، އެޓްލަންޓާ އަށް އޭނާ ދިޔައީ ކާރެއްގަ އެވެ. ނަމަވެސް އޭނާ ދިޔައީ ބަންދު ކޮށްފައިވާ ސީއެންއެންގެ އިމާރާތް ކައިރިއަށެވެ. އެ ތަނުގައި ހަމަލާ ދިނުމަށް ތައްޔާރުވުމުގެ ކުރިން، އެއީ ގޯސް ވިސްނުމެއްކަން އޭނާގެ ސިކުނޑި އަށް ގެނެވި އެ ތަނުން ދުރަށް ދިޔައީ އެވެ. 

އޭގެ ފަހުން ހޯލް ވަނީ އޭނާ ލޯބީގެ ގޮތުން ގުޅިގެން އުޅުނު ބައިވެރިޔާ އަށް ގުޅައި، އެފަދަ ކަމެއް ކުރަން އުޅުނު ކަމަށް ވެސް ބުނެފަ އެވެ. އެ އިވެންޓުގެ ތެރެއިން ހަމަލާ ދިނުމަށް މަސައްކަތް ކުރި ނަމަވެސް، އެ ތަނުގައި ބައިވަރު ފުލުހުންނާއި، ސަލާމަތީ އޮފިޝަލުން ތިބުމުގެ ސަބަބުން އެކަން ނުކުރެވުނު ކަމަށް ބުނެފައިވެ އެވެ. އަދި ދެން އޮންނަ ރިޔާސީ ބަހުސެއްގެ ތެރެއިން އަނެއްކާ ވެސް އެ ހަމަލާ ދިނުމަށް މަސައްކަތް ކުރާނެ ކަމަށް ބުނެފައިވެ އެވެ. 

ތަހުގީގު ކުރާ ފަރާތްތަކުން ވަނީ، ހޯލް އެ ބުނާ މެނިފެސްޓޯ އޭނާގެ ފޯނުން ހޯދައިފަ އެވެ. އެއީ ފަލަސްޠީނުގެ ހުރިހާ ނޫސްވެރިންނަށް އޭނާ ދީފައިވާ މެސެޖެކެވެ.  އެ މެސެޖުގައި އޭނާ ލިޔެފައި ވަނީ އެމެރިކާގެ ހުރިހާ ރައްޔިތުންގެ ކިބައިން މައާފަށް އެދޭ ކަމަށާއި، އެކަމުގައި އެންމެން ބައިވެރިވެފައިވާ ކަމަށެެވެ. އަދި އޭނާގެ އަމަލުގެ ސަބަބުން، އެތައް ބަޔަކު ހޭލައްވާލާނެ ކަމަށް އުންމީދު ކުރާ ކަމަށް ވެސް ހޯލް ބުނެފައިވެ އެވެ. 

2024 ވަނަ އަހަރު، އެމެރިކާގެ އޭރުގެ ރައީސް ޖޯ ބައިޑަން އަވަހާރަ ކޮށްލަން އާދަމް ބެންޖަމިން ހޯލް ކުރި މަސައްކަތުގެ ކުޑަ ދުވަސް ކޮޅެއް ކުރިން އޭނާ ލިޔެފައިވާ މެނިފެސްޓޯގެ ބައެއް

އޭނާ ލިޔެފައި ވަނީ ދުޝްމަނުން ތިބީ އެމެރިކާ އާއި އިޒްރޭލްގައި ކަމަށެވެ. އަދި ރަޝިޔާ އާއި، ޗައިނާ އަދި އީރާން ދިފާއު ކުރާ ކަމަށެވެ. އެގޮތުން އެ މީހުން ބޭނުން ވަނީ އެ ޤައުމު ތަކުން އެމެރިކާ އަށް ނުރައްކާ ކުރާ ކަމަށް ދެއްކުމަށް ކަމަށް އޭނާ ބުނެފައިވެ އެވެ. 

ހޯލް ހައްޔަރު ކުރުމުގެ އަމުރު ގާޒީ ނެރުއްވާފައި ވަނީ ހޯމަ ދުވަހު އެވެ. އޭނާ އަށް ދައުވާ އުފުލާފައި ވަނީ އިންޓަސްޓޭޓް ސްޓޯކިންގެ ކުށުގަ އެވެ. ތަހުގީގު ކުރިއަށްދާއިރު، އިތުރު ދައުވާ ތަކެއް ކުރެވިދާނެ ކަމަށް ވެސް އެމެރިކާގެ ޖަސްޓިސް ޑިޕާޓްމަންޓް އިން ވަނީ ބުނެފަ އެވެ،