ރޫބިއޯ އާއި ބްލެއާ ހިމަނައި، ޣައްޒާގެ ބޯޑު އޮފް ޕީސް އުފައްދަވައިފި

ޣައްޒާ ހަނގުރާމަ ހުއްޓާލުމަށް ފަހު، ޣައްޒާގެ ސުލްހަ އަށް އެމެރިކާ އިން އުފައްދާ "ބޯޑް އޮފް ޕީސް"ގައި ހިމެނޭ މެމްބަރުން އިއުލާން ކޮށްފި އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ އިސް ނެގުމުގެ މަތިން ވަނީ، ޣައްޒާ ހަނގުރާމަ ނިމުމަކަށް ގެނައުމަށް 20 ނުކުތާގެ މައްޗަށް އެކުލެވިގެންވާ ޕްލޭނެއް ހުށަހަޅައިފަ އެވެ. އެ ޕްލޭންގައި ވަނީ ޣައްޒާގެ ސުލްހަ އަށް ބޯޑެއް އެކުލަވާލުމަށް ވެސް ކަނޑައަޅައިފަ އެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސް އިން ހުކުރު ދުވަހު ވަނީ އެ ބޯޑު އިއުލާން ކޮށްފަ އެވެ. އެގޮތުން އެ ބޯޑުގެ ފައުޑިން މެމްބަރުންގެ ގޮތުގައި ހަމަޖައްސާފައި ވަނީ އެމެރިކާގެ ސެކްރެޓަރީ ސެކްރެޓަރީ އޮފް ސްޓޭޓް މާކޯ ރޫބިއޯ އާއި، އިނގިރޭސިވިލާތުގެ ކުރީގެ ބޮޑު ވަޒީރު ޓޯނީ ބްލެއާ އެވެ. ބެލްއާ އަކީ ކުރިން ވެސް މި ބޯޑުގައި ހިމެނޭނެ ކަމަށް ރިޕޯޓު ކޮށްފައިވާ ފަރާތެކެވެ. 

ހަތް މެމްބަރުންގެ މައްޗަށް އެކުލެވިގެންވާ ފައުޑިން އެކްޒެކެޓިވް ބޯޑިގައި ޓްރަމްޕްގެ ފަރާތުން މެދު އިރު މައްޗަށް ކަނޑައަޅުއްވާފައި ހުންނަވާ ޚާއްސަ މަންދޫބު ސްޓީވް ވިޓްކޮފް އާއި، ޓްރަމްޕްގެ ދަނބިދަރިކަލުން ޖެރާޑް ކުޝްނާ ވެސް ހިމެނިވަޑައިގަންނަވަ އެވެ. ހަމަ އެހެންމެ، ވޯލްޑް ބޭންކުގެ ރައީސް އަޖޭ ބަންގާ ވެސް މި ބޯޑުގައި ހިމެނުމަށް ޓްރަމްޕް ވަނީ ނިންމަވައިފަ އެވެ.

ޣައްޒާގެ ބައިނަލްއަޤުވާމީ ސުލްޙަ ބެލެހެއްޓުމުގެ ބޭރުގެ ކޮމާންޑުގެ ގޮތުގައި ހަމަޖައްސަވާފައި ވަނީ މޭޖާ ޖެނަރަލް ޖެސްޕާ ޖެފާސް އެވެ. ޖެފާސް އަކީ އެމެރިކާ މެދުވެރިކޮށް ލުބުނާން އާއި އިސްރާއީލްއާ ދެމެދު ފާއިތުވި ހަތް އަހަރު ކުރިއަށް ދިޔަ ހަނގުރާމަ ހުއްޓާލުމުގެ އެއްބަސްވުން ޤާއިމު ކުރުމުގައި އެމެރިކާގެ ފަރާތުން މަސައްކަތް ކޮށްފައިވާ ފަރާތެކެވެ. 

މި ބޯޑުގައި ސީނިއާ އެޑްވައިޒަރުންގެ ގޮތުގައި އަރިހެލް ލައިޓްސްޓޯމް އާއި، ޖޯޝް ގްރޫންބައުމް ވެސް ހިމެނިވަޑައިގަންނަވާ ކަމަށް ވައިޓް ހައުސް އިން ވަނީ ހާމަ ކޮށްފަ އެވެ. މި ބޯޑު ހުކުރު ދުވަހު އިއުލާން ކުރާނެ ކަމަށް މީގެ ކުރިން ވެސް ވަނީ ރިޕޯޓު ކޮށްފަ އެވެ. 

މި ބޯޑު އުފެއްދުމުގެ މަޤުސަދަކީ ޣައްޒާގައި ދެމެހެއްޓެނިވި ސުލްޙައެއް ޤާއިމު ކުރުމާއި، އެ ސަރަހައްދުގައި އަމާންކަން ބެލެހެއްޓުމުގެ މަސައްކަތް ކުރުމެވެ. އިސްރާއީލް އާއި ހަމާސްއާ ދެމެދު ކުރިއަށް ދިޔަ ހަނގުރާމައިގައި ޣައްޒާގެ ބޮޑު އިންސައްތައެއް ހަލާކުވެފައިވާއިރު، އެތައް ހާސް ބަޔަކު ވަނީ ޝަހީދުވެފަ އެވެ. 

އެމެރިކާގެ ރައީސް ޓްރަމްޕް އެކުލަވާލެއްވި ބޯޑުގައި އެމެރިކާގެ ސިޔާސީ އިސް ބޭފުޅުންގެ އިތުރުން، ބައިނަލްއަޤުވާމީ ފަންނީ ބޭފުޅުން ހިމެނިވަޑައިގަންނަވާއިރު، މިއީ މެދު އިރުމަތީގެ ސަރަހައްދުގައި ސުލްޙަ ޤާއިމު ކުރުމަށް ޓްރަމްޕް ކުރައްވަމުން ގެންދަވާ މުހިންމު މަސައްކަތެއް ކަމަށް މާހިރުން ވަނީ ފާހަގަ ކޮށްފަ އެވެ.