ޣައްޒާގެ ގަވަނިން ބޮޑީއާ ދެކޮޅު ހަދާ ކަމަށް އިސްރާއީލް އިން ހާމަ ކޮށްފި

ޣައްޒާގެ ހަނގުރާމަ އަށް ފަހު، ޣައްޒާގެ ކަންކަން ބެލެހެއްޓުމުގެ މަސައްކަތް ކުރަމުން އަންނަ ގަވަނިން ބޮޑީއާ ދެކޮޅު ހަދާ ކަމަށް އިސްރާއީލް އިން ހާމަ ކޮށްފި އެވެ. 

ޣައްޒާގެ ގަވަނިން ބޮޑީ އިން މިދިޔަ ހަފުތާގެ ތެރޭގައި ވަނީ މިޞްރުގެ ވެރި ރަށް ކައިރޯގައި ރަސްމީކޮށް މަސައްކަތް ފަށައިފަ އެވެ. 

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫގެ އޮފީހުން ހޮނިހިރު ދުވަހު ނެރުނު ބަޔާނެއްގައި ބުނީ، ސުލްޙައިގެ ބޯޑުގެ ދަށުން އުފައްދާފައިވާ ޣައްޒާގެ އެގްޒެކެޓިވް ބޯޓުގެ މެމްބަރުންގެ ލިސްޓު އިއުލާން ކުރުމުގައި އިސްރާއީލްއާ އެއްވެސް ގުޅުމެއް ނެތް ކަމަށެވެ. އަދި އެކަމަކީ އިސްރާއީލްގެ ސިޔާސަތާ ޚިލާފަށް ކޮށްފައިވާ ކަމެއް ކަމަށް ވަނީ ބުނެފަ އެވެ. 

ޣައްޒާ ގަވަނިން ކޮމެޓީގައި ޖުމުލަ 15 މެމްބަރުން ހިމެނެ އެވެ. އެ ކޮމެޓީގެ ލީޑަރަކީ ފަލަސްޠީނު އޮތޯރިޓީގެ ކުރީގެ ނައިބު ރައީސް އަލީ ޝާތު އެވެ. އިސްރާއީލްގެ ބަޔާނުގައި އިތުރަށް ބުނެފައި ވަނީ، އެ މައްސަލައިގައި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ވާހަކަ ދައްކައި މަޝްވަރާ ކުރުމަށް، އިސްރާއީލްގެ ފޮރިން މިނިސްޓަރަށް ބޮޑު ވަޒީރު އަންގަވާފައިވާ ކަމަށެވެ. 

ޣައްޒާ ހަނގުރާމަ ކުރިއަށް ދާތާ އެއްތައް ދުވަހެއް ވެފައިވާއިރު، ހަނގުރާމަ އަށް ފަހު ޣައްޒާ ބެލެހެއްޓުމުގެ މަސައްކަތް ކުރިއަށް ގެންދިޔުމަށް މި ކޮމެޓީ އުފައްދާފައި ވަނީ ބައިނަލްއަޤުވާމީ މަސައްކަތް ތަކެއްގެ ދަށުންނެވެ. އެ ކޮމެޓީގެ މަސައްކަތަކީ ޣައްޒާގައި އިދާރީ ޚިދުމަތްތައް ފޯރުކޮށްދިނުމާއި، އާބާދީ އަށް ބޭނުންވާ އަސާސީ ޚިދުމަތްތައް ދެމެހެއްޓުމެވެ. 

އިސްރާއީލް އިން މި ކޮމެޓީއާ ދެކޮޅު ހަދާފައިވާއިރު، ޣައްޒާގައި ސުލްޙަ ޤާއިމު ކުރުމާއި، ހަނގުރާމަ އަށް ފަހު އެ ސަރަހައްދު އަލުން އަރާސްތު ކުރުމުގެ މަސައްކަތް ތަކަށް ހުރަސް ތަކެއް ކުރިމަތި ވެދާނެ ކަމުގެ ކަންބޮޑުވުން މިހާރު ވަނީ ބޮޑުވެފަ އެވެ. ބައިނަލްއަޤުވާމީ މުޖުތަމައުން ޣައްޒާގައި ސުލްޙަ ޤާއިމު ކުރުމަށް ގިނަ މަސައްކަތް ތަކެއް ކުރަމުން އަންނައިރު، އިސްރާއީލް އާއި ފަލަސްޠީނުގެ ފަރާތްތަކާ ދެމެދު އެއްބަސްވުމެއް ނެތުމަކީ އެންމެ ބޮޑު ގޮން ޖެހުމެވެ. 

މި ކޮމެޓީ އުފެއްދުމުގައި ފަލަސްޠީނު އޮތޯރިޓީގެ ބައިވެރިވުމާއި، ބައިނަލްއަޤުވާމީ ފަރާތް ތަކުގެ އެއްބާރުލުން ލިބިފައިވާއިރު، އިސްރާއީލް އިން މިކަމާ ދެކޮޅު ހެދުމުން މަސައްކަތް ކުރިއަށް ގެންދިޔުމުގައި އިތުރު ހުރަސް ތަކެއް ކުރިމަތި ވާނެ ކަމަށް ބެލެވިފައިވެ އެވެ.