ޣައްޒާ ގައި ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުމާ އިޒްރޭލުން ތަކުރާރުކޮށް ޚިލާފުވަމުން ދަނިކޮށް އެމެރިކާ އިން އިތުރު އެފް-35 މަތިންދާބޯޓުތަކެއް އިޒްރޭލަށް ފޯރުކޮށްދީފި

ޣައްޒާ ގައި ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުމާ އިޒްރޭލުން ތަކުރާރުކޮށް ޚިލާފުވަމުން ދިޔަ ނަމަވެސް، އެމެރިކާ އިން އިތުރު އެފް-35 މަތިންދާބޯޓުތަކެއް އިޒްރޭލަށް ފޯރުކޮށްދީފި އެވެ.

އިޒްރޭލުގެ އަސްކަރިއްޔާ އިން ހާމަކޮށްފައިވާ ގޮތުގައި، އެމެރިކާ އިން ވަނީ އެންމެ ފަހުގެ ޒަމާނީ ޓެކްނޮލޮޖީ އެކުލެވޭ އެފް-35 މަތިންދާބޯޓުގެ އާ ޝިޕްމަންޓެއް އެ ގައުމަށް ފޯރުކޮށްދީފަ އެވެ. މިއާއެކު އިޒްރޭލަށް ލިބިފައިވާ މިފަދަ ފަސްވަނަ ޖީލުގެ ހަނގުރާމަމަތީ އުޅަނދުތަކުގެ އަދަދު ވަނީ 48 އަށް އަރާފަ އެވެ. މި އެހީ ފޯރުކޮށްދީފައި މިވަނީ ޣައްޒާ ގައި ހަމަލާބަދަލުކުރުން ހުއްޓާލުމަށް ވެފައިވާ އެއްބަސްވުންތަކާ އިޒްރޭލުން ތަކުރާރުކޮށް ޚިލާފުވަމުންދާ ދަނޑިވަޅެއްގަ އެވެ.

މި ފަހަރު ފޮނުވި ބޯޓުތަކަކީ 50 އެފް-35 ބޯޓު ގަތުމަށް އިޒްރޭލާ އެކު އެމެރިކާ އިން ކުރިން ވެފައިވާ އެއްބަސްވުމުގެ ދަށުން ފޯރުކޮށްދިން ބޯޓުތަކެކެވެ. މީގެ އިތުރުން 2024 ވަނަ އަހަރު އިތުރު 25 ބޯޓަށް އޯޑަރު ދީފައިވާއިރު، އެ ބޯޓުތައް 2028 ވަނަ އަހަރުން ފެށިގެން ލިބެން ފަށާނެ ކަމަށް ބެލެވެ އެވެ.

އެމެރިކާ އިން އިޒްރޭލަށް ދޭ އަސްކަރީ އެހީ އަކީ ދިގު މުއްދަތުގެ އެއްބަސްވުމެއްގެ ދަށުން ހަމަޖެހިފައިވާ ކަމެކެވެ. މީގެ ދަށުން ކޮންމެ އަހަރަކު ގާތްގަނޑަކަށް 3.8 ބިލިއަން ޑޮލަރު އަސްކަރީ އެހީގެ ގޮތުގައި ފޯރުކޮށްދެ އެވެ. މި ފައިސާ ބޭނުންކޮށްގެން އިޒްރޭލަށް އެމެރިކާގައި އުފައްދާ އަސްކަރީ އާލާތްތަކާއި ހަތިޔާރު ގަތުމުގެ ފުރުސަތު ލިބެ އެވެ. 2023 ވަނަ އަހަރުގެ ފަހުކޮޅުން ފެށިގެން އެމެރިކާގެ ކޮންގްރެސްގެ ރެކޯޑުތަކުން ދައްކާ ގޮތުގައި، އިޒްރޭލަށް ވިއްކުމަށް ހުއްދަ ދީފައިވާ ހަތިޔާރާއި އަސްކަރީ އެހީގެ ޕެކޭޖުތަކުގެ އަގު ދިހަވަރަކަށް ބިލިއަން ޑޮލަރަށް އަރަ އެވެ.

އެމެރިކާގެ މިހާރުގެ ސަރުކާރުން ވެސް ދަނީ މި ސިޔާސަތު ހުއްޓުމެއް ނެތި ކުރިއަށް ގެންދަމުންނެވެ. އެގޮތުން 2025 ވަނަ އަހަރު، އެންމެ ފަހުގެ ހަމަލާދޭ ހެލިކޮޕްޓަރުތަކާއި ހަނގުރާމަމަތީ އުޅަނދުތައް ހިމެނޭހެން ގާތްގަނޑަކަށް 7 ބިލިއަން ޑޮލަރުގެ ހަތިޔާރު ވިއްކުމަށް ކޮންގްރެސް އަށް ވަނީ ހުށަހަޅާފަ އެވެ.

އެމެރިކާގެ ބޭރުގެ އެހީ އެންމެ ގިނައިން ލިބޭ ގައުމުގެ ގޮތުގައި އޮވެ، އިޒްރޭލުން ދަނީ އެ ފައިސާ ބޭނުންކޮށްގެން މެދުއިރުމަތީގެ ސަރަހައްދުގައި އުދުވާނީ ހަނގުރާމަތައް ހިންގަމުންނެވެ. އެމެރިކާގެ ރައްޔިތުންގެ ޓެކްސް ފައިސާގެ ބޮޑު އެހީތެރިކަމަކާއެކު އިޒްރޭލުން ޣައްޒާ ގައި ހިންގަމުންދާ ގަތުލުއާންމުގައި މިހާތަނަށް 71,500 އަށްވުރެ ގިނަ ފަލަސްތީނު ރައްޔިތުން ޝަހީދުކޮށްލާފައިވާއިރު، 171,000 އަށް ވުރެ ގިނަ މީހުން ވަނީ ޒަޚަމްކޮށްލާފަ އެވެ. މީގެ ތެރޭގައި ގިނައީ އަންހެނުންނާއި މައުސޫމު ކުޑަކުދިންނެވެ.

އެމެރިކާގެ އިސްނެގުމާއެކު 2025 އޮކްޓޯބަރު 10 ގައި ގާއިމުކުރި ހަމަލާބަދަލުކުރުން ހުއްޓާލުމުގެ އެއްބަސްވުމުގެ މައިގަނޑު މަގްސަދަކީ، އިޒްރޭލުގެ އުދުވާންތައް ވަގުތުން ހުއްޓާލުމާއި، އަސީރުން ބަދަލުކުރުމާއި، ޣައްޒާ އިން ސިފައިން ބޭލުމުގެ އިތުރުން އިންސާނީ އެހީ ފޯރުކޮށްދިނުމާއި ރަފަހް ބޯޑަރު ހުޅުވުމެވެ. ނަމަވެސް، އިޒްރޭލުން ވަނީ މި ހުރިހާ ޝަރުތުތަކަކާ ވެސް މިހާތަނަށް ޚިލާފުވެފަ އެވެ.

އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ތުހުމަތުކުރާ ގޮތުގައި، އިޒްރޭލުން ހިންގާ މި ނުރައްކާތެރި ޖަރީމާތަކުގައި އެމެރިކާ ސަރުކާރުގެ ބައިވެރިވުން ވަރަށް ބޮޑެވެ. އަދި ފަލަސްތީނުގެ ކުށެއްނެތް ރައްޔިތުންގެ ލޭ އޮހޮރުވުމުގެ ޒިންމާ އެމެރިކާ އިން އުފުލަންޖެހޭނެ ކަމަށް ވެސް އެ ފަރާތްތަކުން ދަނީ ބުނަމުންނެވެ.