ފުޓުބޯޅަ އާއި ފުޓްސަލް ޤައުމީ ޓީމަށް އެއް މިލިއަން ރުފިޔާ ދިނުމަށް ރައީސް މުޢިއްޒު ނިންމަވައިފި
ދެ ޓީމަށް އެއް މިލިއަން ރުފިޔާގެ ފައިސާގެ އިނާމެއް ދެއްވުމަށް ރައީސް މުޢިއްޒު ނިންމަވާފައި މި ވަނީ، ދެ ޓީމުން ވެސް ފުޓުބޯޅަ އަދި ފުޓްސަލްގެ ކާމިޔާބެއް ހާސިލު ކޮށްފައި ވަނިކޮށް.
ރާއްޖޭގެ ޤައުމީ ފުޓުބޯޅަ ޓީމާ ރައީސް މުޢިއްޒު ބައްދަލު ކުރެއްވުމުގެ ތެރެއިން | ރައީސް އޮފީސް
ރާއްޖޭގެ ސީނިއަރ ޤައުމީ ފުޓުބޯޅަ ޓީމާއި، ފުޓްސަލް ޓީމަށް އެއް މިލިއަން ރުފިޔާގެ ފައިސާގެ އިނާމެއް ދެއްވުމަށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ނިންމަވައިފި އެވެ.
ދައުލަތުގެ މީޑިއާ އަށް ދެއްވި އިންޓަވިޔުއެއްގައި މިކަން އިއުލާން ކުރެއްވީ ކުޅިވަރު ވަޒީރު ޢަބްދުﷲ ރާފިޢު (ރާއްޕެ) އެވެ. އެގޮތުން ޤައުމީ ފުޓުބޯޅަ ޓީމާއި، ފުޓްސަލް ޓީމުގެ ހުރިހާ ކުޅުންތެރިން އަދި އޮފިޝަލުންނަށް އެއް މިލިއަން ރުފިޔާގެ ބޯނަހެއް ދެއްވުމަށް ރައީސް މުޢިއްޒު ނިންމަވާފައިވާ ކަމަށް ވަޒީރު ވިދާޅުވި އެވެ.
ދެ ޓީމަށް އެއް މިލިއަން ރުފިޔާގެ ފައިސާގެ އިނާމެއް ދެއްވުމަށް ރައީސް މުޢިއްޒު ނިންމަވާފައި މި ވަނީ، ދެ ޓީމުން ވެސް ފުޓުބޯޅަ އަދި ފުޓްސަލްގެ ކާމިޔާބެއް ހާސިލު ކޮށްފައި ވަނިކޮށެވެ. އެގޮތުން ޤައުމީ ފުޓުބޯޅަ ޓީމުން ވަނީ މިދިޔަ އަހަރު ސްރީ ލަންކާގައި ކުރިއަށް ދިޔަ ސައުތު އޭޝިއަން ސުޕަ ކަޕް ކާމިޔާބު ކޮށްފަ އެވެ.
އޭގެ ފަހުން މި މަހު ތައިލެންޑުގައި ކުރިއަށްދާ ސާފް ފުޓްސަލް ޗެމްޕިއަންޝިޕްގައި ވާދަ ކުރަމުން އަންނަ ރާއްޖޭގެ ފުޓްސަލް ޓީމުން ވަނީ އެ މުބާރާތުގެ ޗެމްޕިއަންކަން ވެސް ހޯދައިފަ އެވެ. މިއީ ސާފް ފުޓްސަލް ޗެމްޕިއަންޝިޕް ބާއްވާ ފުރަތަމަ ފަހަރު ކަމަށްވާއިރު، ރާއްޖެ އަކީ މުބާރާތުގެ ފުރަތަމަ ޗެމްޕިއަނުންނެވެ. އަދި މިއީ ފުޓްސަލްގެ ބައިނަލްއަޤުވާމީ ތައްޓެއް ރާއްޖެ އަށް ލިބުނު ފުރަތަމަ ފަހަރެވެ.
ޤައުމީ ފުޓުބޯޅަ ޓީމާއި، ފުޓްސަލް ޓީމަށް އެއް މިލިއަން ރުފިޔާގެ ފައިސާގެ އިނާމެއް ދެއްވުމަށް ރައީސް ނިންމެވިއިރު، މިއީ ޤައުމީ ފުޓުބޯޅަ ޓީމާ ރައީސް ބައްދަލު ކުރެއްވި ދުވަހު ނިންމަވާފައިވާ ނިންމުމެއް ކަމަށް ވެސް ވަޒީރު ވަނީ ވިދާޅުވެފަ އެވެ. ސައުތު އޭޝިއަން ސުޕަރ ކަޕް ކާމިޔާބު ކުރި ރާއްޖޭގެ ސީނިއަރ ފުޓުބޯޅަ ޓީމާ ރައީސް ބައްދަލު ކުރެއްވީ 2025 ވަަނަ އަހަރުގެ އޮކްޓޫބަރު މަހުގެ ދެ ވަނަ ދުވަހު އެވެ.
