ފަހަތުން އަރައި ގްރީން އަތުން މޮޅުވެ، އޮޑި ދެ ވަނައިގައި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު ގްރީން ސްޓްރީޓްސްއާ ދެކޮޅަށް ކުޅުނު މެޗުން މޮޅުވެ، އޮޑި ސްޕޯޓްސް ކުލަބުން ލީގު ތާވަލްގެ ދެ ވަނަ މަގާމު ދަމަހައްޓައިފި އެވެ.

ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އޮޑިން ކާމިޔާބު ކުރީ 2-1 އިންނެވެ. މެޗުގައި ގްރީން އިން ލަނޑު ޖަހައި ކުރި ހޯދާފައި ވަނިކޮށް، އޮޑިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ގްރީން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބިދޭސީ ކުޅުންތެރިޔާ އެލް ސައީދު އެވެ. އެއާ އެކު، މެޗުގެ ފުރަތަމަ ހާފު ގްރީން އިން ނިންމާލީ ލީޑުގައި އޮވެގެންނެވެ.

ނަމަވެސް، މެޗުގެ ދެ ވަނަ ހާފުގައި އޮޑިން ވަނީ ދެ ލަނޑު ޖަހައިގެން މެޗުގެ ނަތީޖާ އަނބުރާލައިފަ އެވެ. އެގޮތުން މެޗުގެ 63 ވަނަ މިނެޓުގައި އޮޑި އަށް ނަތީޖާ ހަމަހަމަ ކޮށްދިނީ އަޙުމަދު އައިހަމް އެވެ. އަދި މެޗުގެ ފަހު ވަގުތުގެ ތެރޭގައި މުޙައްމަދު ސާމިރު ވަނީ ލަނޑު ޖަހައި ގްރީން އަތުން އޮޑި އަށް ތިން ޕޮއިންޓު ހޯދައިދީފަ އެވެ.

މޮޅާއެކު ލީގު ތާވަލްގެ ދެ ވަނަ މަގާމުގައި އޮޑި އޮތީ މިހާތަނަށް ކުޅެފައިވާ 14 މެޗުން 32 ޕޮއިންޓާ އެކު އެވެ. އޮޑި އާއި އެއް ވަަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަންއާ ދެމެދު އޮތީ އަށް ޕޮއިންޓުގެ ފަރަގެކެވެ. އެއް ވަނައިގައި މާޒިޔާ އޮތީ 14 މެޗުން 40 ޕޮއިންޓާ އެކު އެވެ.

އޮޑި އަތުން ބަލިވި ގްރީން އޮތީ ލީގު ތާވަލްގެ އަށް ވަނަ މަގާމުގަ އެވެ. އެއީ އެ ޓީމު ކުޅެފައިވާ 14 މެޗުން އަށް ޕޮއިންޓާ އެކު އެވެ.