އީޔޫ ގައުމުތަކުގެ އަސްކަރިއްޔާ ތަކަކީ ޓެރަރިސްޓު ޖަމާއަތް ތަކެއް ކަމަށް އީރާނުން ކަނޑައަޅައިފި
އީޔޫން އައި.އާރް.ޖީ.ސީ ޓެރަރިސްޓް ލިސްޓަށް އިތުރުކުރުމާ ގުޅިގެން، އީރާނުން އެ ގައުމުތަކުގެ އަސްކަރިއްޔާތަކަކީ ޓެރަރިސްޓް ޖަމާއަތްތަކެއްގެ ގޮތުގައި ބަލާނެ ކަމަށް އީރާނުގެ ސަލާމަތީ އިސްއޮފިޝަލް ވިދާޅުވެއްޖެ. މިއީ އެމެރިކާ އިން އައި.އާރް.ޖީ.ސީ ޓެރަރިސްޓް ޖަމާއަތެއްގެ ގޮތުގައި ކަނޑައެޅުމާ ގުޅިގެން 2019 ގައި ފާސްކުރި ގާނޫނެއްގެ ދަށުން އެޅޭ ބަދަލުހިފުމުގެ ފިޔަވަޅެއް.
ބެލްޖިއަމްގެ ބްރަސަލްސްގައި 2018 ވަނަ އަހަރުގެ މޭ މަހުގެ 15 ވަނަ ދުވަހު ބޭއްވި ސިޔާސީ މަޝްވަރާތަކުގެ ކުރިން (ވާއަތުން ކަނާތަށް) ޔޫރަޕިއަން ޔޫނިއަން (އީޔޫ)، އީރާން، ފަރަންސޭސިވިލާތް، ޖަރުމަނުވިލާތް އަދި އިނގިރޭސިވިލާތުގެ ދިދަ ފެންނަ މަންޒަރެއް. | ގެޓީ އިމޭޖަސް
އިސްލާމިކް ރިވޮލިއުޝަނަރީ ގާޑްސް ކޯޕްސް (އައި.އާރް.ޖީ.ސީ) އަކީ ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވާ ޔޫރަޕްގެ އިއްތިހާދު (އީޔޫ) ގެ ގައުމުތަކުގެ އަސްކަރިއްޔާތަކަކީ "ޓެރަރިސްޓް ޖަމާއަތްތަކެއް" ކަމަށް އީރާނުން ބަލާނެ ކަމަށް އެ ގައުމުގެ ސަލާމަތީ ކަންކަމާ ބެހޭ އެންމެ އިސް އޮފިޝަލް އަލީ ލާރިޖާނީ ވިދާޅުވެއްޖެ އެވެ. ލާރިޖާނީ ވިދާޅުވީ މިއީ އީރާނުގެ ދާޚިލީ ގާނޫނެއްގެ ދަށުން ނިންމާފައިވާ ނިންމުމެއް ކަމަށެވެ.
ހުކުރު ދުވަހު އެކްސްގައި ކުރެއްވި ޕޯސްޓެއްގައި އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ ވިދާޅުވީ، އީރާނުގެ ގާނޫނު ހަދާ މަޖިލީހުން ފާސްކޮށްފައިވާ ގާނޫނެއްގެ ދަށުން، އައި.އާރް.ޖީ.ސީ އާ ދެކޮޅަށް އީޔޫއިން އެޅި ފިޔަވަޅުގައި ބައިވެރިވި ގައުމުތަކުގެ ސިފައިންނަކީ ޓެރަރިސްޓް ޖަމާއަތްތަކެއްގެ ގޮތުގައި ބަލާނެކަން ޔޫރަޕްގެ އިއްތިހާދަށް ކަށަވަރުވާނެ ކަމަށެވެ.
އަދި މިފަދަ ފިޔަވަޅެއް އެޅުމުގެ ސަބަބުން ކުރިމަތިވާނެ ހުރިހާ ނަތީޖާއަކަށް އެކަން ކުރި ޔޫރަޕްގެ ގައުމުތަކުން ޒިންމާވާން ޖެހޭނެ ކަމަށް ވެސް ލާރިޖާނީ ލިޔުއްވާފައިވެ އެވެ.
ލާރިޖާނީ މި އިޝާރާތް ކުރެއްވީ، އެމެރިކާއިން އައި.އާރް.ޖީ.ސީ އަކީ ޓެރަރިސްޓް ޖަމާއަތެއްގެ ގޮތުގައި ކަނޑައެޅުމާ ގުޅިގެން، އޭގެ ބަދަލުހިފުމުގެ ގޮތުން ފިޔަވަޅު އެޅުމަށް 2019 ވަނަ އަހަރުގެ އޭޕްރީލް މަހު އީރާނުގެ ޕާލަމެންޓުން ފާސްކުރި ގާނޫނުގެ ހަތްވަނަ މާއްދާއަށެވެ.
އެ މާއްދާގައިވާ ގޮތުން، އައި.އާރް.ޖީ.ސީ އަކީ ޓެރަރިސްޓް ޖަމާއަތެއް ކަމަށް އެމެރިކާ އިން ނިންމި ނިންމުމަށް އެއްވެސް ސިފައެއްގައި ތާއީދުކުރާ ނުވަތަ އެ ނިންމުމަށް ތަބާވާ ހުރިހާ ގައުމުތަކާ މެދު، އީރާނުން ބަދަލުހިފުމުގެ ފިޔަވަޅު އަޅާނެ އެވެ.
ޔޫރަޕްގެ އިއްތިހާދުން އައި.އާރް.ޖީ.ސީ ޓެރަރިސްޓް ލިސްޓަށް އިތުރުކުރީ، މިދިޔަ ޑިސެމްބަރު މަހުގެ ފަހުކޮޅު އީރާނުގައި ރަސްކަމެއް އޮތުމަށް ތާއީދުކުރާ ފަރާތްތަކުގެ ދައުވަތަކަށް އަދި އެމެރިކާ އާއި އިޒްރޭލުގެ ލީޑަރުންގެ ހިތްވަރު ދިނުމާއެކު އީރާނުގެ އެކި ސަރަހައްދުތަކުގައި ހިންގި ހަމަނުޖެހުންތަކާ ދެކޮޅަށް އީރާނުން އެޅި ފިޔަވަޅުތަކާ ގުޅިގެންނެވެ.
އިގްތިސާދީ ދަތިތަކާ ގުޅިގެން ޖެނުއަރީ 8 އަދި 9 ވަނަ ދުވަހު އީރާނުގެ އެކި ސަރަހައްދުތަކުގައި ކުރިއަށްދިޔަ ސުލްހަވެރި މުޒާހަރާތަކުގެ ނާޖާއިޒު ފައިދާ ބޭރުގެ އެހީ ލިބޭ ހަތިޔާރު އެޅި ހަނގުރާމަވެރިންނާއި ޓެރަރިސްޓުން ނަގައި، އެ މުޒާހަރާތައް ވަނީ މީހުން މެރުމާއި، މިސްކިތްތަކާއި، ކްލިނިކްތަކާއި، އެމްބިއުލާންސްތަކާއި ބަސްތަކުގައި ހުޅުޖެހުމުގެ އިތުރުން ދައުލަތުގެ އަދި އަމިއްލަ މުދަލަށް ބޮޑެތި ގެއްލުންދޭ ހަރާކަތަކަށް ބަދަލުކޮށްލާފައި ކަމަށް އީރާނުން ބުނެ އެވެ.
މަގުމަތީގައި ހަމަނުޖެހުން ހިންގި މީހުންނާއި ހަތިޔާރު އެޅި ޓެރަރިސްޓުންނަށް ފައިސާ އާއި، ތަމްރީނާއި، މީޑިއާގެ އެހީތެރިކަން ފޯރުކޮށްދިނުމުގައި އެމެރިކާ އާއި އިޒްރޭލުގެ ޖާސޫސީ އިދާރާތަކުން ސީދާ ގޮތެއްގައި ބައިވެރިވެފައިވާކަން އީރާނުގެ ކަމާބެހޭ ފަރާތްތަކުން ވަނީ ކަށަވަރުކޮށްދީފަ އެވެ.
