އީރާނާ ބެހޭ ގޮތުން ރައީސް ޓްރަމްޕް ނިންމަވާ ކޮންމެ ނިންމެވުމެއް ތަންފީޒުކުރުމަށް އެމެރިކާގެ އަސްކަރިއްޔާ އޮތީ ތައްޔާރަށް ކަމަށް ޕެންޓަގަންގެ ވެރިޔާ ވިދާޅުވެއްޖެ

އީރާނުން ނިއުކްލިއާ ހަތިޔާރު އުފެއްދުމުގެ ގާބިލުކަން ހޯދިޔަނުދިނުމަށްޓަކައި، ރައީސް ޑޮނަލްޑް ޓްރަމްޕް ނިންމަވާ ކޮންމެ ނިންމެވުމެއް ތަންފީޒުކުރުމަށް އެމެރިކާގެ އަސްކަރިއްޔާ އޮތީ ތައްޔާރަށް ކަމަށް ޕެންޓަގަންގެ ވެރިޔާ ޕީޓް ހެގްސެތު ބުރާސްފަތި ދުވަހު ވިދާޅުވެއްޖެ އެވެ.

މެދުއިރުމަތީގެ ސަރަހައްދުގައި އެމެރިކާގެ ވަރުގަދަ އަސްކަރީ ފައުޖެއް ޖަމާކޮށްފައިވާ ދަނޑިވަޅެއްގައި، ކެބިނެޓް ބައްދަލުވުމެއްގެ ތެރެއިން ރައީސް ޓްރަމްޕް ވަނީ މަސްރަހާ ގުޅޭގޮތުން ވާހަކަދެއްކުމަށް ހެގްސެތުގެ ކިބައިން އެދިވަޑައިގެންފަ އެވެ.

ޓްރަމްޕްގެ ސަރުކާރުން ޑިފެންސް ޑިޕާޓްމަންޓަށް ނުރަސްމީކޮށް ދީފައިވާ ނަމެއް ކަމަށްވާ "ވޯ ޑިޕާޓްމަންޓް" އާ ހަވާލާދީ ހެގްސެތު ވިދާޅުވީ، އީރާނުން ނިއުކްލިއާ ގާބިލުކަން ހޯދުމަށް މަސައްކަތްކޮށްގެން ނުވާނެ ކަމަށާއި، ރައީސް ޓްރަމްޕް އެދިވަޑައިގަންނަވާ ކޮންމެ ކަމެއް ފުރިހަމަކޮށްދިނުމަށް އެމެރިކާގެ އަސްކަރިއްޔާ އޮތީ ތައްޔާރަށް ކަމަށެވެ.

އެމެރިކާގެ އޮފިޝަލުން ވިދާޅުވާ ގޮތުގައި، އީރާނަށް ހަމަލާދިނުމާ މެދު ރައީސް ޓްރަމްޕް މިހާރު ގެންދަވަނީ ގޮތްތަކެއް ދިރާސާކުރައްވަމުންނެވެ. ނަމަވެސް، ހަމަލާދިނުމާ މެދު އޭނާ އަދި ވަކި ގޮތެއް ނިންމަވާފަ އެއް ނުވެ އެވެ.

ހުސްވި އަހަރުގެ ޖޫން މަހުގެ ތެރޭގައި އިޒްރޭލާއި އެމެރިކާގެ ފައުޖުތަކުން އީރާނުގެ މުހިންމު ނިއުކްލިއާ މަރުކަޒުތަކަށް ދިން ވައިގެ ހަމަލާތަކަށް ފަހު، އީރާނުން އަލުން ނިއުކްލިއާ ޕްރޮގްރާމް ފަށައިފި ނަމަ އެމެރިކާ އިން ފިޔަވަޅު އަޅާނެ ކަމަށް ވެސް ޓްރަމްޕް ވަނީ އިންޒާރު ދެއްވާފަ އެވެ.