އީރާނުގެ އައިއާރުޖީސީ އީޔޫގެ ޓެރަރިސްޓް ލިސްޓުގައި ހިމަނައިފި

ފާއިތުވި ހަފުތާތަކުގައި އީރާނުގެ ސަރުކާރާ ދެކޮޅަށް މުޒާހަރާކުރި މީހުންނާ ދެކޮޅަށް ތެހެރާނުން ހިންގި އޮޕަރޭޝަނާ ގުޅިގެން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ޔޫރަޕިއަން ޔޫނިއަން (އީޔޫ) ގެ ޓެރަރިސްޓް ލިސްޓުގައި ހިމަނައިފި އެވެ.

އީޔޫގެ އިސް ޑިޕްލޮމޭޓް ކާޔާ ކާލާސް ވިދާޅުވީ، އީޔޫގެ ޚާރިޖީ ވަޒީރުން މި "ހަރުދަނާ ފިޔަވަޅު" އެޅުއްވީ، ރައްޔިތުންގެ އަޑު ކަނޑުވާލުމަށް ހިންގާ އަނިޔާވެރި އަމަލުތަކަށް ރައްދު ނުދީ ދޫކޮށްލެވެން ނެތުމުން ކަމަށެވެ.

މި ނިންމުމުގެ ކުރިން އޭނާ ވިދާޅުވީ، އީރާނުގެ އަސްކަރީ، އިގްތިސާދީ އަދި ސިޔާސީ ބާރުގެ މައިބަދަ ކަމަށްވާ އައި.އާރް.ޖީ.ސީ މި ލިސްޓުގައި ހިމެނުމުން، އެ ޖަމާއަތް ބެލެވޭނީ އަލްގައިދާ އާއި އިސްލާމިކް ސްޓޭޓް (އައިއެސް) ފަދަ ހަރުކަށި ޖަމާއަތްތަކާ އެއް ދަރަޖައެއްގެ ބައެއްގެ ގޮތުގައި ކަމަށެވެ.

މީގެ ކުރިން ފަރަންސޭސިވިލާތުން އޮތީ، އައި.އާރް.ޖީ.ސީ ޓެރަރިސްޓް ލިސްޓުގައި ހިމަނައިފިނަމަ އީރާނާއެކު އޮންނަ ޑިޕްލޮމެޓިކް ގުޅުންތައް މުޅިން ކެނޑިދާނެ ކަމުގެ ބިރަށްޓަކައި އެކަމަށް ފަސްޖެހިފަ އެވެ.

ނަމަވެސް، ބުދަ ދުވަހު ފަރަންސޭސިވިލާތުން ވަނީ އެ ނިންމުން ބަދަލުކޮށް، އިޓަލީން އިސްނަގައިގެން އެ ޖަމާއަތް ބްލެކްލިސްޓް ކުރުމަށް ކުރި މަސައްކަތަށް ފުރިހަމައަށް ތާއީދުކޮށްފަ އެވެ.

"އަމިއްލަ ރައްޔިތުންގެ ތެރެއިން އެތައް ހާސް ބަޔަކު މަރާލާ ކޮންމެ ސަރުކާރަކީ އަމިއްލަ އަށް ހަލާކުގެ ތެރެއަށް ވެއްޓެމުންދާ ސަރުކާރެއް،" ސޯޝަލް މީޑިއާގައި ދެއްވި ކުރު ބަޔާނެއްގައި ކާޔާ ކާލާސް ވިދާޅުވިއެވެ.

ކާލާސް އިތުރަށް ވިދާޅުވީ، އައި.އާރް.ޖީ.ސީ ޓެރަރިސްޓް ލިސްޓުގައި ހިމެނި ނަމަވެސް، އީރާނާއެކު އޮންނަ ޑިޕްލޮމެޓިކް މުއާމަލާތްތައް ކުރިއަށްދާނެ ކަމަށް އުންމީދު ކުރައްވާ ކަމަށެވެ.

އީޔޫގެ ޓެރަރިސްޓް ލިސްޓުގައި ހިމެނޭ ޖަމާއަތްތަކަށް އެހީތެރިވާ ވިއުގަތައް ނައްތާލުމުގެ މަގުސަދުގައި، އެ ޖަމާއަތްތަކުގެ މުދާ ހިފެހެއްޓުމާއި ދަތުރުފަތުރު ކުރުން މަނާކުރުން ފަދަ ދަތިކުރުމުގެ ފިޔަވަޅުތައް އަޅައެވެ.

މީގެ އިތުރުން، އީޔޫ އިން ވަނީ އީރާނުގެ ހަ މުއައްސަސާއަކަށާއި 15 ފަރުދަކަށް ދަތިކުރުމުގެ  އާ ފިޔަވަޅުތައް އަޅާފަ އެވެ. އޭގެ ތެރޭގައި އީރާނުގެ ދާޚިލީ ވަޒީރު އިސްކަންދަރު މޮމޭނީ، ޕްރޮސިކިއުޓަރ ޖެނެރަލް މުހައްމަދު މުވައްހިދީ އާޒާދު އަދި ފަނޑިޔާރު އީމާން އަފްޝާރީ ހިމެނެ އެވެ.

އީޔޫގެ ބަޔާނުގައި ބުނެފައިވަނީ، އެ އެންމެންނަކީ ވެސް ސުލްހަވެރި މުޒާހަރާވެރިންނަށް އަނިޔާކުރުމާއި، ސިޔާސީ ހަރަކާތްތެރިންނާއި އިންސާނީ ހައްގުތަކަށް މަސައްކަތްކުރާ މީހުން ގާނޫނާ ޚިލާފަށް ހައްޔަރުކުރުމުގައި ބައިވެރިވެފައިވާ މީހުން ކަމަށެވެ.

އޮސްޓްރޭލިއާ، ކެނެޑާ އަދި އެމެރިކާ އިން މީގެ ކުރިން ވެސް އައި.އާރް.ޖީ.ސީ އަކީ ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވީ ނަމަވެސް، އިނގިރޭސިވިލާތުން އަދި އެފަދަ ނިންމުމެއް ނިންމާފައެއް ނުވެ އެވެ.

ބުދަ ދުވަހު އިނގިރޭސިވިލާތުގެ ޑެޕިއުޓީ ޕްރައިމް މިނިސްޓަރު ޑޭވިޑް ލެމީ ވަނީ އީރާނުން ސުލްހަވެރި މުޒާހަރާވެރިންނަށް ދެމުންދާ އަނިޔާތައް ކުށްވެރިކުރައްވާފަ އެވެ. ނަމަވެސް، ވަކި ޖަމާއަތެއް މަނާ ކުރުމާ މެދު ސަރުކާރުން ވިސްނަމުންދާކަމާ މެދު އެއްޗެއް ބުނުމަކީ ސަރުކާރުގެ ސިޔާސަތެއް ނޫން ކަމަށް އޭނާ ވިދާޅުވި އެވެ.

އީޔޫގެ މި ނިންމުން އައިސްފައި ވަނީ، އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދިމާލަށް "ބޮޑު އަސްކަރީ ފައުޖެއް" ވަރަށް ބާރަށް، ފޯރިއާ އެކު ދަތުރުކުރަމުންދާ ކަމަށް ވިދާޅުވެފައިވާ ދަނޑިވަޅެއްގަ އެވެ.

އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެއްބަސްވުމަކަށް އައުމަށް އޮތް ވަގުތު ކުޑަވަމުންދާ ކަމަށް އިންޒާރު ދެއްވައި، މަޝްވަރާގެ މޭޒަށް އައުމަށް ޓްރަމްޕް ވަނީ ތެހެރާނަށް ގޮވާލައްވާފަ އެވެ.

އެއްބަސްވުމަކަށް ނާދެވިއްޖެ ނަމަ، މިދިޔަ އަހަރު އެމެރިކާ އިން އީރާނަށް ދިން ހަމަލާތަކަށްވުރެ މާ ނުރައްކާތެރި ހަމަލާއެއް ދޭނެ ކަމުގެ އިންޒާރު ވެސް ޓްރަމްޕް ވަނީ ދެއްވާފަ އެވެ.

އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ، އެ ގައުމުގެ އަސްކަރިއްޔާ އޮތީ ގައުމު ދިފާއު ކުރުމަށް ފުރިހަމަ އަށް ތައްޔާރަށް ކަމަށާއި، ކޮންމެ ހަމަލާއަކަށް ވެސް ވަގުތުން ވަރުގަދަ ރައްދެއް ދޭނެ ކަމަށެވެ.

އީރާނުގެ އަސްކަރިއްޔާގެ ވެރިޔާ އަމީރު ހާތަމީ ވަނީ އެމެރިކާގެ ކޮންމެ ހަމަލާއަކަށް "ފުނޑުފުނޑުކޮށްލާ ފަދަ ރައްދެއް" ދޭނެ ކަމަށް ވިދާޅުވެފަ އެވެ. އަދި އީރާނުގެ ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، އަސްކަރިއްޔާގެ އެކި ރެޖިމެންޓްތަކަށް މިހާރު ވަނީ 1،000 ޑްރޯން ހަވާލުކޮށްފަ އެވެ.

އަރަގްޗީ ހުކުރު ދުވަހު ތުރުކީ އަށް ކުރައްވާ ދަތުރުފުޅާ ގުޅޭގޮތުން ތުރުކީގެ ޚާރިޖީ ވަޒީރު ހަކާން ފިދާން ވިދާޅުވީ، މަޝްވަރާގެ ތެރެއިން މިހާރު އުފެދިފައިވާ ނުތަނަވަސްކަން ހައްލުކުރުމަށް ތުރުކީ އޮތީ ތައްޔާރަށް ކަމަށެވެ.

އީރާނުގެ ސަރުކާރުން ބުނަނީ 3،100 އަށްވުރެ ގިނަ މީހުން މަރުވެފައިވާ ކަމަށާއި، އޭގެ ތެރެއިން ގިނައީ ސަލާމަތީ ބާރުތަކުގެ މީހުންނާއި "ހަމަނުޖެހުން ހިންގާ މީހުން" ހަމަލާދިން އާންމުން ކަމަށެވެ.

ބީބީސީ ހިމެނޭހެން ބައިނަލްއަގުވާމީ ގިނަ މީޑިއާތަކަށް އީރާނުގެ ތެރޭގައި ހަރަކާތްތެރިވުން ވަނީ މަނާކޮށްފަ އެވެ.