އީރާނުން ހޯމޫޒް ކަނޑުއޮޅީގައި ލައިވް ވަޒަން ބޭނުން ކޮށްގެން އަސްކަރީ ތަމްރީން ފަށަން ތައްޔާރުވެއްޖެ

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ކަނޑުގެ ސިފައިން، ފެބްރުއަރީ މަހުގެ 1 އަދި 2 ވަނަ ދުވަހު ހޯމޫޒް ކަނޑުއޮޅީގައި ލައިވް ވަޒަން ބޭނުންކޮށްގެން އަސްކަރީ ތަމްރީނުތަކެއް ކުރިއަށް ގެންދާނެ ކަމަށް އެ ގައުމުގެ ދައުލަތުގެ މީޑިއާ، ޕްރެސް ޓީވީން ބުރާސްފަތި ދުވަހު ރިޕޯޓްކޮށްފި އެވެ.

މި ތަމްރީނުތައް ބޭއްވުމަށް ނިންމާފައި މިވަނީ އެމެރިކާ އާއި އީރާނާ ދެމެދު މަސްރަހު ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ. ނިއުކްލިއާ އެއްބަސްވުމަކަށް އައުމަށް އޮތް ވަގުތު ކުޑަވަމުންދާ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވާފައި ވަނިކޮށް، އީރާނަށް ދޭ ކޮންމެ ހަމަލާއަކަށް "ވަރުގަދަ ރައްދު ހަމަލާއެއް" ދޭނެ ކަމަށް ބުރާސްފަތި ދުވަހު އީރާނުން ވަނީ ބުނެފަ އެވެ.

މި ހަފުތާގެ ކުރީކޮޅު އައި.އާރް.ޖީ.ސީގެ ކަނޑުގެ ސިފައިންގެ ޕޮލިޓިކަލް ޑެޕިއުޓީ މުހައްމަދު އަކްބަރުޒާދޭ ވަނީ، ދުނިޔޭގެ ތެލުގެ ސަޕްލައިގެ ގާތްގަނޑަކަށް 20 އިންސައްތަ ހިއްސާކުރާ މުހިންމު މަގު ކަމަށްވާ ހޯމޫޒް ކަނޑުއޮޅި ބަންދުކޮށްފާނެ ކަމުގެ އިންޒާރު ދެއްވާފަ އެވެ. މިއީ މީގެ ކުރިން ވެސް އެކި ފަހަރު މަތިން އީރާނުން ދީފައިވާ އިންޒާރެއް ނަމަވެސް، މިހާތަނަށް އެފަދަ ފިޔަވަޅެއް އެ ގައުމުން އަޅާފަ އެއް ނުވެ އެވެ.

"ހޯމޫޒް ކަނޑުއޮޅީގެ ކަނޑުގެ އަޑިއާއި މަތީގެ ހުރިހާ މައުލޫމާތެއް އީރާނަށް ވަގުތުން ވަގުތަށް ލިބެމުންދޭ. އަދި މި ސްޓްރެޓެޖިކް މަގުގެ ސަލާމަތާއި ރައްކާތެރިކަން ބިނާވެފައި އޮތީ ތެހެރާނުން ނިންމާ ނިންމުންތަކުގެ މައްޗަށް،" އަކްބަރުޒާދޭ ވިދާޅުވި އެވެ. އޭނާ އިތުރަށް ވިދާޅުވީ ދުނިޔޭގެ އިގްތިސާދަށް ގެއްލުމެއް ލިބުމަށް އީރާނުން ބޭނުންނުވާ ކަމަށާއި، ނަމަވެސް އެމެރިކާ އާއި އެމެރިކާ އަށް ތާއީދުކުރާ ފަރާތްތަކުން ފަށާ ހަނގުރާމައަކުން އެ މީހުންނަށް އެއްވެސް ފައިދާ އެއް ނުކުރާނެ ކަމަށެވެ.

އީރާނުގައި ކުރިއަށްދިޔަ މުޒާހަރާތަކާ ގުޅިގެން، އެ މުޒާހަރާތައް ހުއްޓުވުމަށް އީރާނުން ބާރުގެ ބޭނުން ކުރާތީ ޓްރަމްޕް އަސްކަރީ ފިޔަވަޅު އަޅާނެ ކަމުގެ އިންޒާރު ދެއްވުމާ އެކު، ވޮޝިންގޓަނާއި ތެހެރާނާ ދެމެދު ވަނީ ހޫނު ބަހުގެ ހަމަލާތަކެއް ބަދަލުކުރެވިފަ އެވެ. އީރާނުން ތުހުމަތުކުރާ ގޮތުގައި އެ ގައުމުގައި ހިނގަމުންދާ "ހަމަނުޖެހުންތަކަށް" ހިތްވަރު ދެނީ އެމެރިކާ އިންނެވެ.

އީރާނުގެ ފުރަތަމަ ނައިބު ރައީސް މުހައްމަދު ރިޒާ އާރިފް ބުރާސްފަތި ދުވަހު ވިދާޅުވީ، ތެހެރާން އޮންނަން ޖެހޭނީ ހަނގުރާމައަކަށް ތައްޔާރުވެގެން ކަމަށެވެ.

ދައުލަތުގެ ނިއުސް އެޖެންސީ "އިރްނާ" އިން ރިޕޯޓްކޮށްފައިވާ ގޮތުގައި އާރިފް ވިދާޅުވީ، "މިއަދު އަޅުގަނޑުމެން ތިބެން ޖެހޭނީ ހަނގުރާމައިގެ ހާލަތަކަށް ތައްޔާރުވެގެން. އަޅުގަނޑުމެންގެ ސިޔާސަތަކީ ދުވަހަކުވެސް ހަނގުރާމަ އެއް އިސްވެ ނުފެށުން. ނަމަވެސް، އަޅުގަނޑުމެންގެ މައްޗަށް ހަނގުރާމަ އެއް މަޖުބޫރުކޮށްފި ނަމަ، އަމިއްލަ ދިފާއުގައި މަސައްކަތް ކުރާނަން،" ކަމަށެވެ.

އިތުރު ތަފްސީލެއް ދެއްވުމެއް ނެތި އޭނާ ވިދާޅުވީ، އެމެރިކާ އާ އެކު މަޝްވަރާ ކުރުމަށް އީރާން އޮތީ "ތައްޔާރަށް" ކަމަށާއި، ނަމަވެސް މިފަހަރު އީރާނުން ބޭނުންވަނީ ކަންކަން ކަށަވަރުކޮށްދޭނެ "ގެރެންޓީ" ތަކެއް ކަމަށެވެ.