އައިއާރްޖީސީ އަކީ "ޓެރަރިސްޓް ޖަމާޢަތެއް" ކަމަށް ވިލާތުގެ އިއްތިހާދުން ކަނޑައެޅުމާ ގުޅިގެން އެ ނިންމުމަށް އީރާނުގެ ޚާރިޖީ ވަޒީރު ވަރަށް ބޮޑަށް ފާޑު ވިދާޅުވެއްޖެ

އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އަކީ "ޓެރަރިސްޓް ޖަމާޢަތެއް" ކަމަށް ވިލާތުގެ އިއްތިހާދުން (އީ.ޔޫ) ކަނޑައެޅުމާ ގުޅިގެން އެ ނިންމުމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވަރަށް ބޮޑަށް ފާޑު ވިދާޅުވެއްޖެ އެވެ. އޭނާ ވިދާޅުވި ގޮތުގައި މިއީ ވިލާތުގެ އަމިއްލަ މަސްލަހަތަށް ގެއްލުން ހުރި، ސްޓްރެޓެޖިކް ގޮތުން ހެދި ބޮޑު ގޯހެކެވެ.

ބުރާސްފަތި ދުވަހު ނެރުއްވި ބަޔާނެއްގައި އަރަގްޗީ ވިދާޅުވީ، މުޅި ސަރަޙައްދަށް ފެތުރިގެންދާނެ ފަދަ ބޮޑު ހަނގުރާމައެއް ފެށުނަ ނުދިނުމަށްޓަކައި ބައެއް ޤައުމުތަކުން މިހާރު މަސައްކަތް ކުރަމުންދާ ކަމަށާއި، އެ މަސައްކަތުގައި ވިލާތުގެ އެއްވެސް ޤައުމެއް ނުހިމެނޭ ކަމަށެވެ.

"ވިލާތުން އުޅެނީ މި ހުޅުގަނޑު އިތުރަށް ރޯކުރުމަށް. އެމެރިކާގެ އެދުމުގެ މަތީން 'ސްނެޕްބެކް' މަރުޙަލާ ކުރިއަށް ގެންދިއުމަށް ފަހު، މިހާރު އަނެއްކާ ވެސް މިވަނީ އީރާނުގެ ރަސްމީ އަސްކަރިއްޔާ އަކީ ޓެރަރިސްޓް ޖަމާޢަތެއް ކަމަށް ބުނެ ސްޓްރެޓެޖިކް ބޮޑު ގޯހެއް ހަދާފައި،" އޭނާ ވިދާޅުވި އެވެ.

"ސްނެޕްބެކް" އަކީ 2015 ވަނަ އަހަރުގެ އީރާނުގެ ނިއުކްލިއަރ އެއްބަސްވުމުގައި ހިމެނޭ މާއްދާއެކެވެ. މީގެ ދަށުން، އެއްބަސްވުމުގެ ބައިވެރިއަކު އެއްބަސްވުމުގެ ޝަރުޠުތަކާ ޚިލާފުވެއްޖެ ކަމަށް ބެލެވިއްޖެނަމަ، އެ އެއްބަސްވުމުގެ ދަށުން އީރާނާ ދެކޮޅަށް އުވާލާފައިވާ އދ. ގެ ދަތިކުރުމުގެ ފިޔަވަޅުތައް އަމަލީގޮތުން އަލުން އިޢާދަވާނެ އެވެ.

2025 ވަނަ އަހަރުގެ އޮގަސްޓް މަހު، ވިލާތުގެ ތިން ބާރު ކަމަށްވާ ފަރަންސޭސިވިލާތާއި، ޖަރުމަނުވިލާތާއި، އިނގިރޭސިވިލާތުން (އީ3) ވަނީ އީރާނުން އެއްބަސްވުމާ ޚިލާފުވެފައިވާ ކަމަށް ބުނެ މި މަރުޙަލާ ރަސްމީކޮށް ފަށާފަ އެވެ.

ތެހެރާނުން މި ނިންމުން ބަލައިނުގަނެ ބުނެފައި ވަނީ، އީ3 ގެ ޤައުމުތަކުން އެމީހުންގެ އަމިއްލަ ޒިންމާތައް އަދާކުރުމުގައި ފޭލްވެފައިވާ ކަމަށެވެ. ޚާއްޞަކޮށް އެމެރިކާ އެއްބަސްވުމުން ވަކިވުމަށް ފަހު އީރާނަށް ލިބޭނެ ކަމަށް ބުނި އިޤްތިޞާދީ ފައިދާތައް ހޯދައިދިނުމަށް ނުކުޅެދި، ވޮޝިންގޓަނާ މާ ބޮޑަށް ގުޅުން ބަދަހިކުރުމުން، އެ ޤައުމުތަކުން އެއްބަސްވުމުގެ ބައިވެރިންގެ ގޮތުގައި ތިބުމުގެ ޙައްޤު ގެއްލިފައިވާ ކަމަށް އީރާނުން ބުނެ އެވެ.

ބުރާސްފަތި ދުވަހުގެ ބަޔާނުގައި އަރަގްޗީ ވަނީ ވިލާތުގެ "ދެފުށްކެހެރި" ސިޔާސަތަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވީ، ޣައްޒާގައި އިޒްރޭލުން ހިންގާ ގަތުލުއާންމާ މެދު އެއްވެސް ފިޔަވަޅެއް ނާޅައި، އީރާނުގެ އިންސާނީ ޙައްޤުތަކުގެ ދިފާޢުގައި ވާހަކަދެއްކުމަކީ ބޮޑު އޮޅުވާލުމެއް ކަމަށެވެ. އަދި އީ.ޔޫ ގެ މި ނިންމުމަކީ އެ އިއްތިހާދުގެ ބާރު ކުޑަވަމުންދާކަން ފޮރުވުމަށްޓަކައި ހިންގާ ދެއްކުންތެރި އަމަލެއް ކަމަށް އޭނާ ސިފަކުރެއްވިއެވެ.

ސަރަޙައްދުގައި ބޮޑު ހަނގުރާމައެއް ފެށިއްޖެ ނަމަ، ހަކަތައިގެ އަގުތައް އުފުލިގެންދިއުން ފަދަ ކަންކަމުގެ ނޭދެވޭ އަސަރު ވިލާތަށް ވަރަށް ބޮޑަށް ކުރާނެ ކަމަށް އޭނާ އިންޒާރު ދެއްވި އެވެ. އަދި އީ.ޔޫ ގެ މިހާރުގެ އަމަލުތަކަކީ އެމީހުންގެ އަމިއްލަ މަސްލަހަތަށް ގެއްލުންދެނިވި ކަމެއް ކަމަށް ވެސް ވިދާޅުވި އެވެ.

އީ.ޔޫ ގެ މި ނިންމުމަކީ ވިލާތުގެ ޚާރިޖީ ވަޒީރުންގެ ބައްދަލުވުމަކަށް ފަހު ނިންމި ނިންމުމެކެވެ. މީގެ ސަބަބުން ތެހެރާނާއި ވިލާތުގެ ޤައުމުތަކުގެ ވެރިރަށްތަކާ ދެމެދު އޮތް ގުޅުން އިތުރަށް ގޯސްވެގެންދާނެ ކަމަށް ބެލެވެ އެވެ.