އީރާނުގެ ސަރުކާރުގެ "ދުވަސްތައް މިހާރު ވަނީ ގުނަން ފެށިފައި" ކަމަށް ޖަރުމަނުގެ ޗާންސެލަރ ވިދާޅުވެއްޖެ
28 ޖެނުއަރީ 2026 | ބުދަ 19:06އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އަކީ ޓެރަރިސްޓް ޖަމާޢަތެއްގެ ގޮތުގައި ކަނޑައެޅުމަށް އިޓަލީން ވިލާތުގެ އިއްތިޙާދު (އީޔޫ) އަށް ހުށަހަޅާފައިވާ ހުށަހެޅުމަށް ވެސް ޖަރުމަނުގެ ޗާންސެލަރ ވަނީ ތާއީދު ކުރައްވާފަ.
ޖަރުމަނުގެ ޗާންސެލަރ ފްރީޑްރިކް މާރޒް. | ރޮއިޓާސް
އީރާނުގެ ސަރުކާރުގެ ބާކީ އޮތް "ދުވަސްތައް މިހާރު ވަނީ ގުނަން ފެށިފައި" ކަމަށް ޖަރުމަނުގެ ޗާންސެލަރ ފްރީޑްރިކް މާރޒް ވިދާޅުވެއްޖެ އެވެ.
މާރޒް މިހެން ވިދާޅުވީ، އީރާނުގެ ސަރުކާރަށް، އެމެރިކާގެ ރައީސް ޑޮނަލްޑް ޓްރަމްޕް ދެއްވަމުން ގެންދަވާ އިންޒާރުތައް ވަރުގަދަ ކުރައްވާފައިވާ ދަނޑިވަޅެއްގަ އެވެ.
ރުމޭނިއާގެ ބޮޑުވަޒީރު އާ އެކު ބޭއްވި ނޫސްވެރިންގެ ބައްދަލުވުމެއްގައި މާރޒް ވިދާޅުވީ، "އަމިއްލަ ރައްޔިތުންނާ ދެކޮޅަށް އަނިޔާވެރިކަމާއި ބިރުވެރިކަން ހިންގައިގެން ނޫނީ ވެރިކަމުގައި ދެމި ނޯވެވޭނެ ނިޒާމެއްގެ ދުވަސްތައް ވަނީ ގުނަން ފެށިފައި،" ކަމަށެވެ.
އޭނާ އިތުރަށް ވިދާޅުވި ގޮތުގައި، ހަފްތާތަކެއްގެ މުއްދަތު މިކަމަށް ނެގި ނަމަވެސް އީރާނުގެ ސަރުކާރަކީ ޤައުމު ހިންގުމުގެ އެއްވެސް ގާނޫނީ ހައިސިއްޔަތެއް މިހާރު އޮތް ބައެއް ނޫން ކަމަށެވެ.
މިފަހުން އީރާނުގައި ކުރިއަށްދިޔަ މުޒާހަރާތަކުގައި އެތައް ހާސް ބަޔަކު މަރުވެފައިވާ ކަމަށް ރިޕޯޓްތައް ބުނާ ބުނުމަށް އިޝާރާތް ކުރައްވައި ޗާންސެލަރ ވިދާޅުވީ، "މިއިން އެނގެނީ މުއްލާއިންގެ މި ނިޒާމަށް ވެރިކަމުގައި ހިފަހައްޓާލެވެނީ ހަމައެކަނި ބިރުވެރިކަން ފަތުރައިގެން ކަމެވެ."
މީގެ އިތުރުން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އަކީ ޓެރަރިސްޓް ޖަމާޢަތެއްގެ ގޮތުގައި ކަނޑައެޅުމަށް އިޓަލީން ވިލާތުގެ އިއްތިޙާދު (އީޔޫ) އަށް ހުށަހަޅާފައިވާ ހުށަހެޅުމަށް ވެސް މާރޒް ވަނީ ތާއީދު ކުރައްވާފަ އެވެ.
މިކަމާ ގުޅޭގޮތުން މާރޒް ވިދާޅުވީ، "މި ނިންމުމަށް ތާއީދުކުރުމަށް ވިލާތުގެ އިއްތިޙާދުގެ ބައެއް ޤައުމުތަކުން އަދިވެސް ފަސްޖެހޭތީ އެކަމާ ހިތާމަކުރާ" ކަމަށެވެ.
