ސަރަހައްދުގައި ހުރި އެމެރިކާ ބޭސްތަކަކާއި ސިފައިން ތިބީ އީރާނުގެ ހަމަލާ ފޯރާ ރޭންޖުގެ ތެރޭގައި: އީރާން

ސަރަހައްދު ގައި ހުރި ހުރިހާ އެމެރިކާ ބޭސްތަކަކާއި ކުލީ ސިފައިންނަކީ އީރާނަށް ހަމަލާދެވޭ ފަށުގައި ތިބި ބައެއް ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އަށް ކަނޑައަޅާފައި ހުންނަވާ އެ ގައުމުގެ ލީޑަރުގެ މަންދޫބު ވިދާޅުވެއްޖެ އެވެ.

އީރާނުގެ އިސްލާމީ އިންގިލާބުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީގެ ފަރާތްޕުޅުން އައިއާރުޖީސީ އަށް ކަނޑައަޅުއްވާފައި ހުންނަވާ މަންދޫބު ވިދާޅުވީ، އީރާނާ ދެކޮޅަށް އެއްވެސް އާ އުދުވާނެއް ހިންގައިފި ނަމަ، ސަރަހައްދުގައި ހުރި އެމެރިކާގެ ހުރިހާ އަސްކަރީ މަރުކަޒުތަކަކަށާއި ކުލީ ސިފައިންނަށް ހަމަލާދިނުމަށް އީރާނުގެ ހަތިޔާރު އެޅި ބާރުތައް ތިބީ ތައްޔާރަށް ކަމަށެވެ.

އަބްދުﷲ ހާޖީ ސާދިގީ މިހެން ވިދާޅުވީ، ބޭރުގެ ނުފޫޒުތަކާ ގުޅުންހުރި ފަހުގެ ހަމަނުޖެހުންތަކުގައި ޝަހީދުވި މީހުންގެ ހަނދާނުގައި، އީރާނުގެ ގުމްގައި ހުންނަ ހަޒްރަތު ފާތިމާ މަައުސޫމާގެ ރައުޟާގައި ބުރާސްފަތި ދުވަހު ބޭއްވި ރަސްމިއްޔާތެއްގައި ވާހަކަދައްކަވަމުންނެވެ.

"އަސްކަރިއްޔާގެ އިނގިލިތައް ހުރީ ބަޑީގެ ޓްރިގަރ ގައި ޖައްސައިގެންނެވެ. ދުޝްމަނުންގެ ކޮންމެ އަމަލަކަށް އެއްގަމާއި ކަނޑުމަތީގައި ވަރުގަދަ ރައްދު ހަމަލާއެއް ދޭނެއެވެ. އަދި މި ސަރަހައްދުގައި ހުރި އެމެރިކާގެ ހުރިހާ އަސްކަރީ މަރުކަޒުތަކަކަށް ހަމަލާ ދޭނެ އެވެ." ހާޖީ ސާދިގީ ވިދާޅުވި އެވެ.

މި ވާހަކަތައް އައިސްފައި ވަނީ، އެމެރިކާގެ ރައީސް ޑޮނަލްޑް ޓްރަމްޕް އެ ސަރަހައްދަށް ފޮނުއްވާފައިވާ މަތިންދާބޯޓު އުފުލާ މަނަވަރުތަކުގެ ފްލީޓް ބޭނުންކޮށްގެން އީރާނަށް ހަމަލާދޭނެ ކަމުގެ އިންޒާރު ދެއްވާފައިވާ ދަނޑިވަޅެއްގަ އެވެ.

މީގެ އިތުރުން، އިޒްރޭލުން އީރާނާ ދެކޮޅަށް ހިންގި ޣައިރު ގާނޫނީ އުދުވާނުގެ ތެރޭގައި، މިދިޔަ އަހަރު އެމެރިކާ ސިފައިން އީރާނުގެ ނިއުކްލިއާ ތިން ސައިޓަކަށް ބޮން އެޅި ހަމަލާއަށްވުރެ، ދެން ދޭ ހަމަލާއެއް މާ ނުރައްކާތެރިވާނެ ކަމުގެ އިންޒާރު ވެސް ޓްރަމްޕް ވަނީ ދެއްވާފަ އެވެ.

ޓްރަމްޕް އީރާނާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު ދޭން ފެއްޓެވީ، އީރާނުގައި ދާދިފަހުން ކުރި މުޒާހަރާތަކުގެ ތެރެއަށް ބޭރުގެ މަދަދު ލިބިގެން ހަމަނުޖެހުން ހިންގާ ގްރޫޕްތަކުން ވަދެގަނެ ހަމަ ނުޖެހުންތައް ހިންގާފައި ވަނިކޮށްނެވެ.

ޖުމްލަ 3،117 މީހުން މަރުވި އެ ހަމަނުޖެހުންތަކުގެ ތެރޭގައި ހިމެނޭ ހަތިޔާރު އެޅި ކުލީ ސިފައިންނަށް އެހީތެރިކަން ފޯރުކޮށްދޭނެ ކަމަށް އެމެރިކާގެ ރައީސް ވަނީ ވިދާޅުވެފަ އެވެ.

ހާޖީ ސާދިގީ ވިދާޅުވި ގޮތުގައި، އީރާނަށް ހަމަލާ ދޭނެ ކަމަށް ޓްރަމްޕް ވައުދުވެވަޑައިގެންނެވި ނަމަވެސް، އެމެރިކާގެ އަސްކަރީ ކޮމާންޑަރުން ވަނީ އީރާނަކީ އެހެން ގައުމުތަކާ ތަފާތު ގައުމެއް ކަމަށް ވިދާޅުވެފައެވެ. އެހެންކަމުން، އަސްކަރީ ހަމަލާއަކުން ރެކުމަށްޓަކައި ޓްރަމްޕް މިހާރު ދައްކަވަނީ ސިޔާސީ ދޮގު ބަހަނާތަކެއް ކަމަށް އޭނާ ވިދާޅުވި އެވެ.

ވޭތުވެދިޔަ މަސްތަކުގައި ދުޝްމަނުން ވަނީ ގައުމުގެ އެތެރެ އާއި ބޭރުން ގުޅިފައިވާ ފިތުނައެއް އުފައްދާފައި ކަމަށާއި އޭގެ ފުރަތަމަ މަރުހަލާއަކީ 2025 ވަނަ އަހަރުގެ ޖޫން 13 އާއި 27 އާ ދެމެދު އިޒްރޭލާއި އެމެރިކާ ގުޅިގެން ދިން އުދުވާނީ ހަމަލާތައް ކަމަށް އޭނާ އިތުރަށް ވިދާޅުވި އެވެ.

އެ ރޭވުން ނާކާމިޔާބުވުމުން، ދުޝްމަނުން ދެން ދިޔައީ ދެވަނަ މަރުހަލާއަށެވެ. އެއީ ހަމަނުޖެހުންތަކުގެ ބޭނުން ހިފައި، މީހުން މެރުމަށާއި މިސްކިތްތަކާއި ދީނީ މަދަރުސާތަކުގައި ހުޅުޖެހުމަށް ބައެއް އެޖެންޓުން ރެކްރޫޓްކުރުން ކަމަށް އޭނާ ފާހަގަކުރެއްވި އެވެ.

އޭނާ ވިދާޅުވީ، "އަހަރެމެންގެ ދިފާއީ ބާރުގެ މައިގަނޑު އަސާސަކީ ރައްޔިތުންނާއި ލީޑަރާ ދެމެދު އޮތް ވަރުގަދަ ގުޅުމެވެ. އަހަރެމެންގެ ބާރަކީ ހަމައެކަނި ހަތިޔާރެއް ނޫނެވެ. އެއީ ދުނިޔޭގެ ބޮޑެތި ބާރުތަކުގެ ކުރިމަތީގައި ބޯނުލަނބާނެ ރައްޔިތުންގެ ރޫހެވެ."