އީރާނުގެ ބޫޝެހެރް ނިއުކްލިއަރ ޕްލާންޓުން ރަޝިޔާގެ މުވައްޒަފުން ގެންދަން ތައްޔާރަށް ތިބި ކަމަށް އެ ގައުމުން ބުނެފި
އީރާނުގެ ބޫޝެހެރް ނިއުކްލިއާ ޕްލާންޓުގައި މަސައްކަތްކުރާ ރަޝިޔާގެ އެތައް ސަތޭކަ މުވައްޒަފުން ކޮންމެހެން ބޭނުންވެއްޖެ ހާލަތެއްގައި ރައްކާތެރި ހިސާބުތަކަށް ބަދަލުކުރުމަށް ރަޝިޔާ ތައްޔާރަށް އޮތް ކަމަށް ދައުލަތުގެ ނިއުކްލިއާ ކޯޕަރޭޝަންގެ ވެރިޔާ ވަނީ ވިދާޅުވެފައި.
ތެހެރާންގެ ދެކުނުން 1،000 ކިލޯމީޓަރު ދުރުގައި، ޕާޝިއަން ގަލްފްގެ އައްސޭރީގައި އޮންނަ ބޫޝެހެރް ބަނދަރު ސަރަހައްދުގައި ގާއިމުކޮށްފައިވާ ބޫޝެހެރް ނިއުކްލިއާ ޕަވަރ ޕްލާންޓުގެ މައި ރިއެކްޓަރު އިމާރާތް. | ގެޓީ އިމޭޖަސް
އީރާނުގެ ބޫޝެހެރް ނިއުކްލިއާ ޕަވަރ ޕްލާންޓުގައި މަސައްކަތްކުރާ ރަޝިޔާގެ މުވައްޒަފުން، ކޮންމެހެން ބޭނުންވެއްޖެ ހާލަތެއްގައި އެ ތަނުން ގެންދިއުމަށް ތައްޔާރަށް އޮތް ކަމަށް ރަޝިޔާ އިން ބުނެފި އެވެ.
ރަޝިޔާގެ ދައުލަތުގެ ނިއުކްލިއާ ކޯޕަރޭޝަންގެ ވެރިޔާ އެލެކްސީ ލިކަޗޭވް އާ ހަވާލާދީ، އެ ގައުމުގެ ދައުލަތުގެ ނިއުސް އެޖެންސީ "ޓާސް" އިން ބުރާސްފަތި ދުވަހު ރިޕޯޓްކޮށްފައިވާ ގޮތުގައި، ބޫޝެހެރް ޕްލާންޓުގައި ތިބި ރަޝިޔާގެ މުވައްޒަފުން ރައްކާތެރި ހިސާބުތަކަށް ބަދަލުކުރުމަށް ރަޝިޔާ އޮތީ ތައްޔާރަށެވެ.
ރަޝިޔާ އިން އީރާނަށް ބިނާކޮށްދީފައިވާ، އަދި މިހާރު އެ ގައުމުގައި ހިންގަމުންދާ ހަމައެކަނި ނިއުކްލިއާ ޕަވަރ ޕްލާންޓް ކަމަށްވާ ބޫޝެހެރް ފެސިލިޓީގައި ރަޝިޔާގެ އެތައް ސަތޭކަ މުވައްޒަފުންނެއް މަސައްކަތް ކުރަމުންދާ ކަމަށް ރައީސް ވްލަޑިމިއަރ ޕުޓިން މިދިޔަ އަހަރު ވަނީ ވިދާޅުވެފަ އެވެ.
ބޫޝެހެރް ސަރަހައްދުގައި ރަޝިޔާ އިން މިހާރު ވެސް ދަނީ އިތުރު ނިއުކްލިއާ ފެސިލިޓީތަކެއް ބިނާކުރަމުންނެވެ.
ނިމިދިޔަ އަހަރުގެ ޖޫން މަހު އެމެރިކާ އިން އީރާނުގެ ނިއުކްލިއާ ފެސިލިޓީތަކަށް ދިން ހަމަލާތަކުގައި ބޫޝެހެރް ޕްލާންޓަށް އަމާޒުކޮށްފައެއް ނުވެއެވެ. ނަމަވެސް، އެ ސަރަހައްދަށް ހަމަލާއެއް ދީފިނަމަ، 1986 ވަނަ އަހަރު ހިނގި ޗެރްނޮބީލް ނިއުކްލިއާ ހާދިސާއާ އެއްފަދަ ބޮޑު ކާރިސާއެއް ކުރިމަތިވެދާނެ ކަމުގެ އިންޒާރު ލިކަޗޭވް އެ ދުވަސްވަރު ދެއްވާފައިވެ އެވެ.
އީރާނުން ނިއުކްލިއާ ހަތިޔާރު ދޫކޮށްލުމަށް އެއްބަސްވުމަކަށް އައުމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވަނީ ގޮވާލައްވާފަ އެވެ. އަދި އެފަދަ އެއްބަސްވުމަކަށް ނައިސްފިނަމަ، އެމެރިކާ އިން ދެން ދޭ ހަމަލާ އެއް މާ ނުރައްކާތެރިވާނެ ކަމަށް ވެސް ޓްރަމްޕް ވިދާޅުވި އެވެ.
"އަޅުގަނޑުމެން މިދަނީ ހާލަތު ވަރަށް ގާތުން ބަލަމުން. އަދި ރަޝިޔާގެ ފޮރިން މިނިސްޓްރީ އާއި ޑިފެންސް މިނިސްޓްރީއާ ގުޅިގެން، ކޮންމެހެން ބޭނުންވެއްޖެ ހާލަތެއްގައި މުވައްޒަފުން އެ ތަނުން ބޭރުކުރުމުގެ މަސައްކަތް ކުރުމަށް އަޅުގަނޑުމެން މިތިބީ ތައްޔާރަށް،" ލިކަޗޭވް ވިދާޅުވި އެވެ.
އީރާނުން ނިއުކްލިއާ ހަތިޔާރު އުފެއްދުމަށް މަސައްކަތް ކުރާ ކަމަށް ކުރެވޭ ތުހުމަތުތައް އެ ގައުމުން ދޮގުކުރާއިރު، ރަޝިޔާ އިން ބުނަމުން ދަނީ ސުލްހަވެރި ބޭނުންތަކަށް ނިއުކްލިއާ ހަކަތަ ބޭނުންކުރުމުގެ ހައްގު ތެހެރާނަށް އޮންނަންޖެހޭނެ ކަމަށެވެ.
މަސްދަރު: ރޮއިޓާސް
