"ދެ ގަޑިއިރުގެ ހަނގުރާމައަކަށް ނުވާނެ" ކަމަށް ބުނެ އީރާނުން ވަގުތުން ހަރުކަށި ރައްދުދޭނެ ކަމުގެ އިންޒާރު ދީފި

އީރާނާ ދެކޮޅަށް ހިންގާ ކޮންމެ އުދުވާނީ އަމަލަކަށް، ވަގުތުން ހަރުކަށި ރައްދެއް ދޭނެ ކަމަށް ބުނެ އީރާނުގެ އަސްކަރިއްޔާއިން ވަރުގަދަ އިންޒާރެއް ދީފި އެވެ. އަދި ޖޫން މަހު ކުރި ހަނގުރާމައިގެ ތަޖުރިބާއާއެކު، އީރާނުގެ އަސްކަރީ ސިޔާސަތުތަކާއި ކުރިމަތިލުންތަކުގެ އުސޫލުތަކަށް ބޮޑެތި ބަދަލުތަކެއް ގެނެސްފައިވާ ކަމަށް އެ ގައުމުން ވަނީ ބުނެފަ އެވެ.

އީރާނުގެ ޓީވީ ޕްރޮގްރާމެއް ކަމަށްވާ "ޓު ދަ ހޮރައިޒަން އޮފް ޕަލެސްޓައިން" ގައި ވާހަކަދައްކަވަމުން، އީރާނުގެ އަސްކަރިއްޔާގެ ތަރުޖަމާނު ބްރިގޭޑިއަރ ޖެނެރަލް މުޙައްމަދު އަކްރަމީނިއާ ވިދާޅުވީ، ދުޝްމަނުން އަނެއްކާވެސް "ހިސާބުތައް ނުބައިކޮށް ހަދާ" އީރާނަށް ހަމަލާއެއް ދީފިނަމަ، އެއްވެސް މަޑުޖެހުމެއް ނެތި ރައްދު ދިނުމަށް އީރާނުގެ ހަތިޔާރު އެޅި ބާރުތަކަށް މިހާރު ސާފު އިރުޝާދުތަކެއް ދީފައިވާ ކަމަށެވެ.

"ދުޝްމަނުން އަނެއްކާވެސް މޮޔަ އަމަލެއް ހިންގައި، ނުބައި ހިސާބެއް ޖަހައިގެން ހަމަލާ ދީފި ނަމަ، އަޅުގަނޑުމެން ވަގުތުން ވަގުތަށް ރައްދުދޭނަން،" އަކްރަމީނިއާ ވިދާޅުވި އެވެ.

އޭނާ އިތުރަށް ވިދާޅުވީ، ޖޫން މަހު ކުރި 12 ދުވަހުގެ ހަނގުރާމައިން ލިބުނު ފިލާވަޅަކީ، ފަސްޖެހުމާއި ދުޝްމަނުންނަށް ވަގުތު ދިނުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމެވެ. އެހެންކަމުން، ރައްދު ހަމަލާ ދޭންވާނީ ވަގުތުން ކަމަށާއި، އެއީ މިހާރު އަސްކަރިއްޔާ އަށް ރަސްމީކޮށް ކޮށްފައިވާ އަމުރެއް ކަމަށް އޭނާ ފާހަގަކުރެއްވި އެވެ.

ޖޫން މަހު ކުރި 12 ދުވަހުގެ ހަނގުރާމަ އަކީ އިޒްރޭލާ ސީދާ ގޮތުން ކުރިމަތިލައި، އެމެރިކާ ވެސް ބައިވެރިވި ހަނގުރާމައެކެވެ. އަސްކަރިއްޔާގެ ތަރުޖަމާނު ވިދާޅުވި ގޮތުގައި، އެ ހަނގުރާމައިގައި ވޮޝިންޓަނާއި ތެލް އަވީވަށް އީރާނުގެ ގާބިލުކަމާއި، އެއްބައިވަންތަކަމާއި، ގައުމީ އަޒުމު ދެނެގަނެފައި ނެތް ކަން ހާމަވާ ކަމުގަ އެވެ.

އޭނާ ވިދާޅުވި ގޮތުގައި ދުޝްމަނުންގެ ސްޓްރެޓެޖިކް ރޭވުމަކީ، "އޮޕަރޭޝަން އަލް-އަޤްޞާ ފްލަޑް" އަށް ފަހު އީރާނު އޮތީ ބަލިކަށިވެފައި ކަމަށް ބަލައި، ކުއްލި އަސްކަރީ ހަމަލާއެއް ދީގެން ގައުމުގެ ތެރޭގައި ހަމަނުޖެހުމާއި ހަލަބޮލިކަން އުފައްދައި، އިސްލާމީ ޖުމްހޫރިއްޔާ ރޫޅާލައި ބައިބައިކޮށްލުމެވެ.

"މިއީ އެމެރިކާ އަށް ހެދުނު އެންމެ ބޮޑު ގޯސް. އަވަސް އަސްކަރީ އޮޕަރޭޝަނަކުން އީރާނުގެ ނިޒާމު ގަޑުބަޑުކޮށް، ސަރުކާރު ވައްޓާލައި، ގައުމު ބައިބައިކޮށްލެވޭނެ ކަމަށް އެމީހުން ގަބޫލުކުރި. ނަމަވެސް ދުނިޔެ އަށް ފެނުނީ މުޅިން ތަފާތު މަންޒަރެއް،" އަކްރަމީނިއާ ވިދާޅުވިއެވެ.

"އޮޕަރޭޝަން އަލް-އަޤްޞާ ފްލަޑް" އަކީ 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ފަލަސްތީނުގެ މުޖާހިދުން އިޒްރޭލުން ހިފާފައިވާ ސަރަހައްދުތަކަށް ދިން ކުއްލި އަދި ވަރުގަދަ ހަމަލާއެކެވެ. މި ހަމަލާއާއެކު އިޒްރޭލުގެ ސަލާމަތީ ނިޒާމާ މެދު ކުރިން ކުރެވުނު ހުރިހާ އުންމީދުތަކެއް ވަނީ ފުނޑުފުނޑުވެފަ އެވެ.

އަކްރަމީނިއާ ވިދާޅުވި ގޮތުގައި، ޖޫން މަހު އިޒްރޭލުން ދިން އަސްކަރީ ހަމަލާ އަށް އީރާނުން ވަގުތުން ރައްދުދީ، ދުޝްމަނުންގެ މަގްސަދުތައް ނާކާމިޔާބުކޮށްލި އެވެ. އަދި އެމީހުން ދޭން އުޅުނު ކުއްލި ސިހުމުގެ ހަމަލާ، އެމީހުންގެ ނާކާމިޔާބީއަކަށް އީރާނުން ބަދަލުކޮށްލި ކަމަށް އޭނާ ވިދާޅުވި އެވެ.

"ގައުމުގައި ހަމަނުޖެހުމާއި ހަލަބޮލިކަން އުފެދުމުގެ ބަދަލުގައި، ގައުމީ އެއްބައިވަންތަކަން ކުރިއަށްވުރެ ވަރުގަދަވެގެން ދިޔައީ. އެމެރިކާ އަށް އެ ހަނގުރާމައިގައި އެމީހުންނަށް ހައްގުވާ ޖަވާބު ލިބިއްޖެ،" އޭނާ ވިދާޅުވި އެވެ.

އަކްރަމީނިއާ ގެ ވާހަކައިގައި، ރައީސް ޑޮނަލްޑް ޓްރަމްޕްގެ ވެރިކަމުގެ ދަށުން އެމެރިކާ އިން ގެންގުޅޭ ސިޔާސަތުތަކަށް ވަރަށް ބޮޑަށް ފާޑުވިދާޅުވި އެވެ. އޭނާ ސިފަކުރެއްވި ގޮތުގައި ވޮޝިންޓަނުގެ އަމަލުތަކަކީ އެއްގޮތަކަށް ވެސް ލަފާކުރަން ނޭނގޭ، އަދި ބާރުގެ ބޭނުން ކޮށްގެން ބިރުދެއްކުމުގެ ބޯދާ އުސޫލުތަކެއްގެ މައްޗަށް ބިނާވެފައިވާ ކަންކަމެވެ.

އަސްކަރިއްޔާގެ ތަރުޖަމާނު ވިދާޅުވި ގޮތުގައި، 12 ދުވަހުގެ ހަނގުރާމައިގައި ޓްރަމްޕް ބޭނުންވީ އީރާނު ކުޑަކަކޫ ޖެއްސުމަށެވެ. ނަމަވެސް އީރާނުގެ ދިފާއީ ބާރު ފެނުމާއެކު، ވަރަށް އަވަހަށް ހަމަލާތައް ހުއްޓާލުމަށް އޭނާ މަސައްކަތް ފެށި ކަމަށް އަކްރަމީނިއާ ވިދާޅުވި އެވެ.

"ޓްރަމްޕް ބޭނުންވީ އީރާނުން އަމާންދިނުމަށް. އެކަމަކު މަދު ދުވަސްކޮޅެއްގެ ތެރޭގައި އޭނާ މަސައްކަތް ކުރީ ހަނގުރާމަ ހުއްޓާލަން. މި ހަނގުރާމައިގައި އީރާނުގެ ހަތިޔާރު އެޅި ބާރުތަކުން ވަނީ ދުޝްމަނުން ހުއްޓުވުމުގެ ގާބިލުކަން ދައްކާލާފައި. އަދި ޒަޔަނިސްޓް އިޒްރޭލަށް މަޖުބޫރުކުރުވީ ހަމަލާ ބަދަލުކުރުން ހުއްޓާލުމަށް،" އަކްރަމީނިއާ ވިދާޅުވި އެވެ.

އޭނާ ވަނީ، ކުޑަ ނުވަތަ ރަމްޒީ ހަމަލާއެއް ދީފައި އަވަހަށް ނިންމާލެވިދާނެ ކަމަށް ވޮޝިންޓަނުން ދެކޭ ކޮންމެ ދެކުމަކީ ބޮޑު ކުށްހީއެއް ކަމަށް ބުނެ އިންޒާރު ދީފަ އެވެ.

"އެމެރިކާގެ ރައީސް އަމުރެއް ކޮށްފައި، ދެ ގަޑިއިރު ފަހުން ހުރިހާ ކަމެއް ނިމުނީއޭ ބުނެ ޓްވީޓް ކުރެވޭނެ ފަދަ ހާލަތެއް ނޫން. އެކަހަލަ ވިސްނުމަކީ ހުވަފެނެއް. އެފަދަ ހަމަލާއެއްގެ ސަބަބުން މުޅި ހުޅަނގު އޭޝިއާ ސަރަހައްދުގައި އަލިފާން ރޯވެގެންދާނެ،" އޭނާ ވިދާޅުވި އެވެ.

ކުރިއަށް އޮތް ތަނުގައި އެމެރިކާ ނުވަތަ އިޒްރޭލުން ދީފާނެ ހަމަލާއަކާ ގުޅޭގޮތުން ވާހަކަދައްކަވަމުން އަކްރަމީނިއާ ވިދާޅުވީ، އީރާނުން މިހާރު ވެސް ވަނީ އޮޕަރޭޝަނަލް ޕްލޭންތައް ފައިނަލްކޮށް، ބޭނުންވާ އަމުރުތައް ނެރެފައި ކަމަށެވެ.

"ދުޝްމަނުން ދީފާނެ ހަމަލާއަކަށް ބޭނުންވާ ހުރިހާ ރޭވުންތަކެއް ވަނީ ތައްޔާރުކުރެވިފައި. އަދި އިރުޝާދުތައް ވެސް ވަނީ ދެވިފައި. ދުޝްމަނުން ރާވާ ތަފާތު ހާލަތްތަކާ ގުޅޭގޮތުން، އެކަށީގެންވާ ވަރުގަދަ ރައްދުތަކެއް އަޅުގަނޑުމެން ދޭނަން،" އޭނާ ވިދާޅުވިއެވެ.

އީރާނާ ދެކޮޅަށް ދޭ ކިތަންމެ ކުޑަ ހަމަލާއެއް ވެސް ރައްދެއް ނުދީ ދޫކޮށްނުލާނެ ކަމަށް އޭނާ ވަނީ ތަކުރާރުކޮށް ވިދާޅުވެފަ އެވެ.

އަސްކަރިއްޔާގެ ތަރުޖަމާނު ވަނީ އިސްލާމީ އިންގިލާބުގެ ލީޑަރު، އާޔަތުﷲ ސައްޔިދު އަލީ ޚާމަނާއީގެ ދައުރު ފާހަގަކުރައްވައި، ހަނގުރާމައިގެ ތެރޭގައި އެމަނިކުފާނުގެ އަމަލުފުޅުތަކަކީ ކަނޑައެޅިގެންވާ އަދި ހިތްވަރު ލިބިދޭ ކަންތައްތަކެއްގެ ގޮތުގައި ސިފަކުރައްވާފަ އެވެ.

"ލީޑަރު ވަނީ 12 ދުވަހުގެ ހަނގުރާމައިގައި ކޮމާންޑަރުގެ ދައުރު ވަރަށް ފުރިހަމައަށް އަދާކުރައްވާފައެވެ. އެއީ ވަގުތުން ކޮމާންޑަރުން އައްޔަންކުރެއްވުމާއި، އަސްކަރިއްޔާގެ އިސްވެރިންނަށް ސީދާ މެސެޖުތައް ފޮނުއްވައިގެންނެވެ،" އަކްރަމީނިއާ ވިދާޅުވި އެވެ.

"ހަތިޔާރު އެޅި ބާރުތަކުގެ އިތުރުން، އެމަނިކުފާނު ވަނީ ފުޅާ ދާއިރާއެއްގައި ސްޓްރެޓެޖިކް ލީޑަރެއްގެ ދައުރު އަދާކުރައްވައި، ވަރުގަދަ އަދި ހިތްވަރުގަދަ މެސެޖުތަކާއެކު ހަނގުރާމައިގެ މިސްރާބު ބައްޓަންކުރައްވާފަ އެވެ."

އީރާނުގެ އަސްކަރިއްޔާގެ އޮފިސަރުންގެ އަޒުމާއި ރޫހުގެ ވަރުގަދަކަމުގެ މައްޗަށް ވެސް އޭނާ ވާހަކަ ދެއްކެވި އެވެ.

އަކްރަމީނިއާ ވިދާޅުވި ގޮތުގައި އަނެއްކާ ވެސް ހަނގުރާމައެއް ކުރިމަތިވެއްޖެ ނަމަ، ޖޫން މަހުގެ ހަނގުރާމައިގައި ޝަހީދުވި މީހުންގެ ބަދަލު ހިފުމަށް އީރާނުގެ ބާރުތައް އޮތީ ތައްޔާރަށެވެ.

"އީރާނުގެ އިސްލާމީ ޖުމްހޫރިއްޔާގެ އަސްކަރިއްޔާ އަކީ ރައްޔިތުންގެ ލަޝްކަރެކެވެ. އެއީ ގައުމުގެ ހިތުން އުފެދިފައިވާ ބާރެކެވެ،" އޭނާ ވިދާޅުވިއެވެ. "އެ ބާރުގެ ޒިންމާ އަކީ ރައްޔިތުންނާއި ގައުމު ދިފާއުކުރުމެވެ."

އަކްރަމީނިއާ ވިދާޅުވި ގޮތުގައި، ދިފާއީ ބާރު ވަރުގަދަކުރުމަކީ މިއަދުގެ ދުނިޔޭގައި އިޚްތިޔާރީ ކަމެއް ނޫނެވެ. އެއީ ކޮންމެހެން ކުރަންޖެހޭ މަޖުބޫރު ކަމެކެވެ.