އެމެރިކާ އިން އީރާނަށް ދޭ ކޮންމެ ހަމަލާއަކަށް "މީގެ ކުރިން ދުވަހަކު ވެސް ދެކިފައި ނުވާނެ" ވަރުގަދަ ރައްދެއް ދޭނެ ކަމަށް، އދ. އަށް ކަނޑައަޅާފައި ހުންނަ އީރާނުގެ މިޝަނުން ބުނެފި

އެމެރިކާ އިން އީރާނަށް ދޭ ކޮންމެ ހަމަލާއަކަށް މީގެ ކުރިން ދުވަހަކުވެސް ދެކިފާ ނުވާނެ ފަދަ ވަރުގަދަ ރައްދެއް ދޭނެ ކަމަށް، އދ. އަށް ކަނޑައަޅާފައި ހުންނަ އީރާނުގެ މިޝަނުން ބުދަ ދުވަހު ބުނެފި އެވެ.

އެކްސްގައި ކުރި ޕޯސްޓެއްގައި އެ މިޝަނުން ބުނެފައި ވަނީ، ދެފަރާތުގެ މަސްލަހަތަށް ބިނާކޮށް ވާހަކަދެއްކުމަށް އީރާނު އޮތީ ތައްޔާރަށް ކަމަށެވެ. ނަމަވެސް، މަޖުބޫރުކޮށްފި ނަމަ، އަމިއްލަ ދިފާއުގައި ނުކުމެ، މީގެ ކުރިން ދުވަހަކު ވެސް ރައްދު ނުދޭ ފަދަ ވަރުގަދަ ގޮތަކަށް އީރާނުން ރައްދު ދޭނެ ކަމަށް ވެސް މިޝަނުން ބުންޏެވެ. މި ޕޯސްޓާއެކު، އީރާނަށް ހަމަލާދިނުމަށް ބޮޑު އަސްކަރީ ފައުޖެއް ދަތުރުކުރަމުންދާ ކަމަށް ބުނެ ޓްރަމްޕް ދެއްވި އިންޒާރުގެ ސްކްރީންޝޮޓެއް ވެސް ހިމަނާފައިވެ އެވެ.

އެމެރިކާ އަށް އިންޒާރު ދެމުން، މީގެ ކުރިން އެމެރިކާ އިން ކުރި ދެ ހަނގުރާމައެއްގައި އެ ގައުމަށް ލިބުނު ގެއްލުންތަކާއި ހޭދަވި ބޮޑެތި ޚަރަދުތަކަށް ވެސް އީރާނުގެ މިޝަނުން ވަނީ އަލިއަޅުވާލާފަ އެވެ. "މީގެ ކުރިން އަފްޣާނިސްތާނާއި އިރާގު ހަނގުރާމައިގެ ތެރެއަށް އެމެރިކާ ވަދެގަތުމުން، 7 ޓްރިލިއަން ޑޮލަރަށް ވުރެ ގިނަ ފައިސާ އިސްރާފުވެ، 7،000 އަށް ވުރެ ގިނަ އެމެރިކާ ސިފައިންގެ ފުރާނަ ވަނީ ގެއްލިފައި،" މިޝަނުން ބުންޏެވެ.

ބުދަ ދުވަހުގެ ފަހުގެ ވަގުތެއްގައި އީރާނުގެ ޚާރިޖީ ވަޒީރު އައްބާސް އަރާގްޗީ އެކްސްގައި ވިދާޅުވީ، އީރާނުގެ ބިމަށާއި، ޖައްވަށް ނުވަތަ ކަނޑުގެ ސަރަހައްދަށް ދޭ ކޮންމެ އުދުވާނީ ހަމަލާއަކަށް ވަގުތުން ވަރުގަދަ ރައްދެއް ދިނުމަށް އެގައުމުގެ އަސްކަރިއްޔާ އޮތީ ފުރިހަމައަށް ތައްޔާރަށް ކަމަށެވެ.

އަދި ހަމަ އެއާ އެކު، ބިރުދެއްކުމާއި އިންޒާރުތަކުން އެއްކިބާވެ، ދެފަރާތަށް ފައިދާހުރި، އިންސާފުވެރި ނިއުކްލިއާ އެއްބަސްވުމަކަށް އީރާނުން އަބަދުވެސް މަރުހަބާ ކިޔާނެ ކަމަށް އޭނާ ވިދާޅުވި އެވެ. މިފަދަ އެއްބަސްވުމަކުން އީރާނަށް ސުލްހަވެރި ބޭނުންތަކަށް ނިއުކްލިއާ ޓެކްނޮލޮޖީ ބޭނުންކުރުމުގެ ހައްގު ކަށަވަރުކޮށްދޭން ޖެހޭނެ ކަމަށާއި، ނިއުކްލިއާ ހަތިޔާރު ނުއުފައްދާނެ ކަމުގެ ޔަގީންކަން ލިބިގެންދާނެ ކަމަށް ވެސް އޭނާ އިތުރަށް ފާހަގަކުރެއްވި އެވެ.

ބުދަ ދުވަހު ޓްރަމްޕް ވަނީ އީރާނަށް ހަމަލާދޭނެ ކަމުގެ އިންޒާރު އައުކުރައްވައި، ނިއުކްލިއާ ހަތިޔާރާ ގުޅޭ އެއްބަސްވުމަކަށް އައުމަށް އޮތް ވަގުތު ކުޑަވަމުންދާ ކަމަށް ވިދާޅުވެފަ އެވެ. "މީގެ ކުރިން ވެސް އަހަރެން އީރާނަށް އެންގިން އެއްބަސްވުމަކަށް އަންނަން! އެމީހުން އެކަން ނުކުރުމުން 'އޮޕަރޭޝަން މިޑް ނައިޓް ހެމާ' ހިންގައި އީރާނަށް ބޮޑެތި ގެއްލުންތަކެއް ދިނިން. ދެން ދޭ ހަމަލާ މިއަށްވުރެ މާ ނުރައްކާތެރިވާނެ!" ޓްރަމްޕް ވިދާޅުވި އެވެ.

ޖޫން މަހު އިޒްރޭލުން އީރާނުގެ ނިއުކްލިއާ އަދި ބެލިސްޓިކް މިސައިލް ޕްރޮގްރާމްތައް ބަލިކަށިކޮށްލުމަށް ކުރި 12 ދުވަހުގެ ހަނގުރާމައިގައި އެމެރިކާ ބައިވެރިވެ، އީރާނުގެ ނިއުކްލިއަރ ސައިޓްތަކަށް ބޮން އެޅުމަށް ފަހު، ޓްރަމްޕް ގެންދަވަނީ އީރާނާ ދެކޮޅަށް އަސްކަރީ ފިޔަވަޅު އެޅުމުގެ ފުރުސަތު އޮތް ކަމަށް ތަކުރާރުކޮށް ވިދާޅުވަމުންނެވެ.