އީރާނުގެ ވެރިރަށް ތެހެރާނުގެ އިންގިލާބީ މައިދާނުގައި އާދީއްތަ ދުވަހު ހާމަ ކުރި ބޮޑު ކުރެހުމަކުން، އީރާނަށް އަސްކަރީ ހަމަލާ އެއް ނުދިނުމަށް އެމެރިކާ އަށް ސީދާ އިންޒާރެއް ދީފި
އީރާނުގެ ރިވޮލިއުޝަނަރީ ގާޑް ކޯޕްސް އޮތީ ކޮންމެ ވަގުތަކުވެސް ހަމަލާދޭން ތައްޔާރަށްކަމަށް އެފައުޖުގެ ކޮމާންޑަރު ވިދާޅުވޭ.
ޖެނުއަރީ 25، 2026 ގައި މެދުތެރޭ ތެހެރާންގެ މައިދާނެއްގައި ދައްކާލި ކުރެހުމެއްގައި މަތިންދާބޯޓު އުފުލާ ބޯޓުގެ ޑެކްގައި ހަލާކުވެފައިވާ މަތިންދާބޯޓުތައް ދައްކުވައިދޭ. | ސޯޝަލް މީޑިއާ
އީރާނުގެ ވެރިރަށް ތެހެރާނުގެ އިންގިލާބީ މައިދާނުގައި އާދީއްތަ ދުވަހު ހާމަ ކުރި ބޮޑު ކުރެހުމަކުން، އީރާނަށް އަސްކަރީ ހަމަލާ އެއް ނުދިނުމަށް އެމެރިކާ އަށް ސީދާ އިންޒާރެއް ދީފިއެވެ.
މަތިންދާބޯޓު އުފުލާ މަނަވަރެއްގެ މަތީގައި ހަލާކުވެފައިވާ އަސްކަރީ ބޯޓުތަކެއް ފެންނަ މި ކުރެހުމުގައި ބޭނުންކޮށްފައިވާ ޝިއާރުގައި ބުނެފައި ވަނީ ކުރާ މޮޔަ މަކަރުވެރި ކަމަކުން އާޚިރު ނަތީޖާ ހިތިވާނެ އެވެ.
އިންގިލާބީ މައިދާނުގައި މި މިއުރަލް ބެހެއްޓީ، އެމެރިކާގެ 'ޔޫ.އެސް.އެސް އަބްރަހަމް ލިންކަން' މަނަވަރާއި އެއާ އެކު ދަތުރުކުރާ އަސްކަރީ އުޅަނދުތައް އެ ސަރަހައްދަށް ދަތުރުކުރަމުންދާ ދަނޑިވަޅެއްގަ އެވެ. އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ މި އުޅަނދުތައް ފޮނުވަނީ "ފަހަރުގައި" އަސްކަރީ ފިޔަވަޅެއް އަޅަން ޖެހިދާނެތީ ކަމަށެވެ.
"އަޅުގަނޑުމެންގެ ވަރުގަދަ އަސްކަރީ ފްލީޓެއް އެ ސަރަހައްދަށް ދަތުރުކުރަމުން އެބަދޭ. ފަހަރުގައި އޭގެ ބޭނުން ހިފަން ނުޖެހިވެސް ހިނގައިދާނެ،" ބުރާސްފަތި ދުވަހު ޓްރަމްޕް ވިދާޅުވިއެވެ.
އިންގިލާބީ މައިދާނަކީ ދައުލަތުން ބާއްވާ އެކި އެއްވުންތަކަށް ބޭނުންކުރާ މުހިންމު ތަނެކެވެ. އަދި ގައުމީ އެކި މުނާސަބަތުތަކާ ގުޅުވައިގެން އެތަނުގައި ހުންނަ ކުރެހުންތަކަށް ބަދަލު ގެނެ އެވެ. ހޮނިހިރު ދުވަހު އީރާނުގެ ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ކޮމާންޑަރު އިންޒާރު ދެއްވި ގޮތުގައި، އެ ފައުޖު އޮތީ "ކޮންމެ ވަގުތަކުވެސް ހަމަލާދޭން ތައްޔާރަށް، ބަޑީގެ ޓްރިގަރ ގައި އިނގިލި އަޅައިގެން" ކަމަށެވެ.
އެމެރިކާ އާއި އީރާން އާ ދެމެދު މަސްލަހަތު ގޯސްވި ކަމަށް އެމެރިކާ އިން ދައްކަނީ، އީރާނުގައި ކުރި މުޒާހަރާތައް ހުއްޓުވުމަށް ސަރުކާރުން ބާރުގެ ބޭނުންކޮށް، އެތައް ބަޔަކު މަރައި އެތައް ހާސް ބަޔަކު ހައްޔަރުކުރުމާ ގުޅިގެން ކަމަށެވެ. ތަންތާ ރޯކޮށް އިމާރާތްތަކަށް ގެއްލުންދީ ހެދި މުޒާހަރާތައް އެމެރިކާ އިން ސިފަ ކުރަމުން ގެންގޮސްފައި ވަނީ ސުލްހަވެރި މުޒާހަރާތަކެއްގެ ގޮތުގަ އެވެ. އެ ގޮތުން ސުލްހަވެރި މުޒާހަރާވެރިން މެރުން ކުރިއަށްގެންދާ ނަމަ ނުވަތަ ހައްޔަރުކުރި މީހުން މަރާ ނަމަ، އަސްކަރީ ފިޔަވަޅު އަޅާނެ ކަމުގެ އިންޒާރު ޓްރަމްޕް ކުރިން ދެއްވާފައިވެ އެވެ.
ފާއިތުވި ދުވަސްތަކުގައި އިތުރު މުޒާހަރާ އެއް ހިނގާފައި ނުވާއިރު، ހައްޔަރުކޮށްފައި ތިބި 800 އެއްހާ މީހުން މެރުން ޓްރަމްޕް ގެ ސަބަބުން އީރާނުން ހުއްޓާލާފައިވާ ކަމަށް އޭނާ ދާދި ފަހުން ވިދާޅުވި އެވެ. ނަމަވެސް އީރާނުގެ ޗީފް ޕްރޮސިކިއުޓަރު ވަނީ އެއީ "ކަނޑައެޅިގެން ދޮގެއް" ކަމަށް ވިދާޅުވެފަ އެވެ.
އެހެންނަމަވެސް، އަސްކަރީ ފިޔަވަޅު އެޅުމުގެ ފުރުސަތު އަދިވެސް އެބައޮތް ކަމަށް ޓްރަމްޕް ވަނީ އިޝާރާތް ކުރައްވާފަ އެވެ. އޭނާ ވިދާޅުވި ގޮތުގައި ދެން ދޭ އަސްކަރީ ހަމަލާއެއްގެ ކުރިމަތީގައި، މިދިޔަ ޖޫން މަހު އީރާނުގެ ނިއުކްލިއާ މަރުކަޒުތަކަށް ދިން ހަމަލާތަކަކީ "ވަރަށް އާދައިގެ" ކަމަކަށް ވެގެންދާނެ އެވެ.
އެމެރިކާގެ ސެންޓްރަލް ކޮމާންޑުން މީސްމީޑިއާ ގައި ބުނެފައި ވަނީ، އެގައުމުގެ އެފް-15އީ މަރުކާގެ ހަނގުރާމަމަތީ މަތިންދާބޯޓުތައް މިހާރު މެދުއިރުމަތީގައި ހަރަކާތްތެރިވަމުންދާ ކަމަށާއި، މިއީ ސަރަހައްދީ ސަލާމަތާއި ހަމަޖެހުން ގާއިމުކުރުމަށް ކުރާ މަސައްކަތެއް ކަމަށެވެ. ހަމަ އެއާ އެކު، އިނގިރޭސިވިލާތުގެ ޑިފެންސް މިނިސްޓްރީން ބުނި ގޮތުގައި، ދިފާއީ ބޭނުމަކަށްޓަކައި އެގައުމުގެ ޓައިފޫން މަތިންދާބޯޓުތައް ވަނީ ގަތަރަށް ފޮނުވާފަ އެވެ.
