އިރާނުން އީޔޫ އަށް އިންޒާރު - އައި.އާރް.ޖީ.ސީ ޓެރަރިސްޓް ޖަމާއަތެއް ކަމަށް ކަނޑައަޅައިފި ނަމަ ނަތީޖާ ހިތިވާނެ

އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އަކީ ޓެރަރިސްޓް ޖަމާއަތެއްގެ ގޮތުގައި ވިލާތުގެ އިއްތިހާދު (އީޔޫ) އިން ކަނޑައަޅައިފި ނަމަ، އޭގެ ނަތީޖާ ވަރަށް ހިތިވާނެ ކަމުގެ އިންޒާރު އެ ގައުމުން ދީފި ކަމަށް އިރާނުގެ ދައުލަތުގެ މީޑިއާތަކުން އަންގާރަ ދުވަހު ރިޕޯޓްކޮށްފި އެވެ.

އިރާނުން މި އިންޒާރު ދީފައިވަނީ، އައި.އާރް.ޖީ.ސީ އަކީ ޓެރަރިސްޓް ޖަމާއަތެއްގެ ގޮތުގައި ކަނޑައެޅުމަށް އިޓަލީގެ ފޮރިން މިނިސްޓަރު ބްރަސަލްސް އަށް ބާރުއެޅުއްވުމާ ގުޅިގެންނެވެ.

އިޓަލީގެ އެންމެ އިސް ޑިޕްލޮމޭޓް އެންޓޯނިއޯ ޓަޖާނީ ހޯމަ ދުވަހު ވިދާޅުވީ، މި ހަފުތާގެ ފަހުކޮޅު ބްރަސަލްސް ގައި ބާއްވާ ވިލާތުގެ އިއްތިހާދުގެ ޚާރިޖީ ވަޒީރުންގެ ބައްދަލުވުމުގައި، އެހެން ބައިވެރިންނާ ގުޅިގެން މި ހުށަހެޅުން ހުށަހަޅުއްވާނެ ކަމަށެވެ.

އިރާނުގައި ކުރިއަށްދިޔަ މުޒާހަރާތައް ބާރުގެ ބޭނުންކޮށްގެން ހުއްޓުވުމާ ގުޅިގެން، އެ ގައުމަށް ވަނީ ބައިނަލްއަގުވާމީ ބޮޑެތި ފިއްތުންތަކެއް ކުރިމަތިވެފަ އެވެ. މިދިޔަ ޑިސެމްބަރު މަހުގެ 28 ވަނަ ދުވަހު ތެހެރާންގެ ގްރޭންޑް ބާޒާރު ގައި އިގްތިސާދީ ދަތިތަކާ ގުޅިގެން ފެށުނު މި މުޒާހަރާތައް، މުޅި ގައުމަށް ފެތުރިގެންދިޔަ އެވެ. އަދި މުޒާހަރާގެ ބައިވެރިން ސިޔާސީ ބަދަލުތަކަށް ގޮވާލަން ފެށުމާއެކު، މިއީ 1979 ވަނަ އަހަރުގެ ފަހުން އިރާނުގެ ވެރިކަމަށް ކުރިމަތިވި އެންމެ ބޮޑު ގޮންޖެހުމަށް ވެގެންދިޔަ އެވެ.

މި މަހުގެ ކުރީކޮޅު މުޒާހަރާތައް މަޑުޖެހިފައިވާއިރު، އިރާނުގެ ސަލާމަތީ ބާރުތަކުން ވަނީ 1979 ވަނަ އަހަރުގެ އިސްލާމީ އިންގިލާބަށްފަހު ހިންގި އެންމެ ލޭއޮހޮރުވުން ބޮޑު އޮޕަރޭޝަނުގައި ބާރުގެ ބޭނުންކޮށްގެން މި ހަރަކާތްތައް ހުއްޓުވާފަ އެވެ.

އިރާނުގެ ރަސްމީ ނިއުސް އެޖެންސީ "އިރްނާ" އިން ރިޕޯޓްކޮށްފައިވާ ގޮތުގައި، ތެހެރާނުން ވަނީ އިޓަލީން އިރާނަށް ކަނޑައަޅާފައި ހުންނަވާ ސަފީރު ޕައޮލޯ އަމަޑޭއީ ޚާރިޖީ ވުޒާރާ އަށް ހާޒިރުކޮށްފަ އެވެ. އަދި އިޓަލީގެ ފޮރިން މިނިސްޓަރު ޓަޖާނީގެ ވާހަކަތަކަކީ ޒިންމާދާރުކަން ކުޑަ ވާހަކަތަކެއް ކަމަށް ބުނެ އެކަން ކުށްވެރިކޮށް، ވިލާތުގެ އިއްތިހާދުން މި ފިޔަވަޅު އަޅައިފިނަމަ އޭގެ ނަތީޖާ ވަރަށް ނުރައްކާތެރިވާނެ ކަމުގެ އިންޒާރު ވަނީ ދީފައެވެ.

މީގެ އިތުރުން، އިރާނާ މެދު ގެންގުޅޭ ނުބައި ސިޔާސަތުތަކާ މެދު އަލުން ވިސްނުމަށް އިރާނުގެ ޚާރިޖީ ވުޒާރާ އިން އިޓަލީގެ ސަރުކާރަށް ގޮވާލާފައިވާ ކަމަށްވެސް އިރްނާ އިން ރިޕޯޓްކޮށްފައިވެއެވެ.