މި ތިބީ ބަޑީގެ ޓްރިގަރ ގައި އަތް އަޅައިގެން، އިޒްރޭލާއި އެމެރިކާ އިން ގޯހެއް ނުހަދާތި: އީރާނުގެ ޗީފް ކޮމާންޑަރު

މި ތިބީ ބަޑީގެ ޓްރިގަރ ގައި އަތް އަޅައިގެން ކަމަށާއި، ނުބައި ހިސާބެއް ހަދައިގެން ގޯހެއް ނުހެއްދުމަށް އީރާނުގެ ޗީފް ކޮމާންޑަރު އެމެރިކާ އަށާއި އިޒްރޭލަށް ވަރުގަދަ އިންޒާރެއް ދެއްވައިފި އެވެ.

އީރާނުގެ އިސްލާމީ ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ޗީފް ކޮމާންޑަރު، ދުޝްމަނުންނަށް އިންޒާރު ދެއްވަމުން ވިދާޅުވީ، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީގެ އަމުރުފުޅުތައް ތަންފީޒު ކުރުމަށްޓަކައި އެ ގައުމުގެ ސިފައިން ތިބީ  ކޮންމެ ވަގުތަކު ވެސް ހަމަލާދޭން ފުރިހަމަ އަށް ތައްޔާރުވެގެން ކަމަށެވެ.

މޭޖަރ ޖެނެރަލް މުޙައްމަދު ޕަކްޕޯ ބުރާސްފަތި ދުވަހު ފޮނުއްވި މެސެޖެއްގައި ވިދާޅުވީ، މުޖުރިމު، ނުލަފާ އަދި އިންސާނިއްޔަތާ ޚިލާފު ދުޝްމަނުން، ޚާއްޞަކޮށް އެމެރިކާ އާއި ނަސްލީ ތަފާތުކުރުންތަކުގެ މައްޗަށް ބިނާވެފައިވާ ފޭކް ޒަޔަނިސްޓް އިސްތިޢުމާރީ ބާރުން، ތާރީޚީ ތަޖުރިބާތަކުންނާއި ޖޫން މަހުގެ 12 ދުވަހުގެ ހަނގުރާމައިގައި ކުރިމަތިވި ކަންކަމުން ފިލާވަޅު ލިބިގަންނަން ޖެހޭނެ ކަމަށެވެ. އަދި ހިސާބުތައް ޖެހުމުގައި އެފަރާތްތަކުން އެއްވެސް ގޯހެއް ނުހެދުމަށް އޭނާ ގޮވާލެއްވި އެވެ.

އޭނާ އިތުރަށް ވިދާޅުވީ، އެފަރާތްތަކުން އެއްވެސް ގޯސް ހިސާބެއް ޖަހައިފި ނަމަ، އެބައިމީހުންނަށް ކުރިމަތި ވާނީ މާ ހިތްދަތި އަދި މާ ބޮޑަށް ހިތާމަކުރަން ޖެހޭ ފަދަ ނަތީޖާއަކާ ކަމަށެވެ.

އެމެރިކާ އާއި ޒަޔަނިސްޓުންގެ ދެކޮޅުވެރިކަމާއި ނުބައި އަމަލުތަކުން ޤައުމު ސަލާމަތްކުރުމަށާއި، ދިފާޢީ ބާރު ވަރުގަދަކުރުމަށް އައި.އާރު.ޖީ.ސީ އިން ކުރިއަށް ވުރެ ބޮޑަށް ތައްޔާރުވެފައިވާކަން އޭނާ ފާހަގަކުރެއްވި އެވެ.

ޑިސެމްބަރު މަހުގެ ފަހުކޮޅު އީރާނުގައި އިޤްތިޞާދީ ދަތިތަކާ ގުޅިގެން ފެށުނު މުޒާހަރާތައް، އެމެރިކާ އާއި އިޒްރޭލުގެ ލީޑަރުންގެ ހިތްވަރު ދިނުމާ އެކު ހަމަނުޖެހުން ހިންގާ ބަޔަކު ވަނީ މުޒާހަރާތައް އަމިއްލަ މަންފާ އަށް ބަދަލުކޮށްލާފަ އެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ ދައުލަތުގެ މުއައްސަސާތައް ހިފުމަށް ހަތިޔާރު އެޅި ހަމަނުޖެހުން ހިންގާ މީހުންނަށް ފާޅުގައި ގޮވާލައްވައި، އީރާނާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު ދެއްވާފަ އެވެ.

އީރާނުގެ ޚާރިޖީ ވަޒީރު އައްބާސް އަރަގްޗީ "ވޯލް ސްޓްރީޓް ޖާނަލް" ގައި ލިޔުއްވާފައިވާ ގޮތުގައި، ޓްރަމްޕްގެ އިންޒާރުތަކަކީ އިޒްރޭލުގެ ފަރާތުން އެމެރިކާ އިތުރު ހަނގުރާމައެއްގެ ތެރެއަށް ވައްދައި، "ބޮޑު ލޭއޮހޮރުވުމެއް" ހިންގުމަށްޓަކައި ޓެރަރިސްޓް ޖަމާޢަތްތަކަށް ދިން ހިތްވަރެކެވެ.

އީރާނުގެ ސެކިއުރިޓީ ކައުންސިލުން ނެރުނު ބަޔާނެއްގައި ބުނެފައި ވަނީ، އެމެރިކާ އާއި އިޒްރޭލުގެ އިސްތިޢުމާރީ ބާރުތަކުން އަޑީގައި ތިބެގެން ހިންގި މި "ނުލަފާ ޢަމަލުތަކުގައި" އާންމުންނާއި ސަލާމަތީ ބާރުތަކުގެ މީހުން ހިމެނޭހެން 2,427 މީހުން ޝަހީދުވެފައިވާ ކަމަށެވެ. އަދި ހަމަނުޖެހުންތަކުގެ ތެރޭގައި އިތުރު 690 މީހުން މަރުވެ، ޖުމްލަ 3,117 މީހުން މަރުވެފައިވާ ކަމަށް އެ ބަޔާނުގައިވެ އެވެ.