އީރާނަށް ހަމަލާއެއް ދީފިނަމަ، އެ ސަރަހައްދުގައި ހުރި އެމެރިކާގެ އިންވެސްޓްމަންޓްތަކަށް ހަމަލާދީފާނެ ކަމުގެ އިންޒާރު ނުފޫޒު ގަދަ ދީނީ އިލްމުވެރިއަކު ދެއްވައިފި

އީރާނަށް ހަމަލާ އެއް ދީފިނަމަ، އެ ސަރަހައްދުގައި ހުރި އެމެރިކާގެ އިންވެސްޓްމަންޓްތަކަށް ހަމަލާދީފާނެ ކަމުގެ އިންޒާރު އީރާނުގެ ނުފޫޒު ގަދަ ދީނީ އިލްމުވެރިއަކު ދެއްވައިފި އެވެ.

އީރާނުގެ ނުފޫޒުގަދަ ދީނީ އިލްމުވެރިއަކު ހުކުރު ދުވަހު އިންޒާރު ދެއްވި ގޮތުގައި، އިސްލާމީ ޖުމްހޫރިއްޔާއަށް އެމެރިކާއިން އެއްވެސް ހަމަލާއެއް ދީފިނަމަ، ބަދަލުހިފުމުގެ ގޮތުން އެ ސަރަހައްދުގައި ހުރި އެމެރިކާއާ ގުޅުންހުރި އިންވެސްޓްމަންޓްތަކަށް އީރާނުން ހަމަލާ ދީފާނެ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވީ، އީރާނާ ދިމާލަށް އެމެރިކާގެ އަސްކަރީ މަނަވަރުތަކެއް ދަތުރުކުރަމުންދާ ކަމަށާއި، ނަމަވެސް އެތަކެތީގެ ބޭނުން ކުރަން ނުޖެހޭނެ ކަމަށް އުންމީދު ކުރައްވާ ކަމަށެވެ. މީގެ އިތުރުން، މުޒާހަރާކުރާ މީހުން މެރުމާއި ނިއުކްލިއާ ޕްރޮގްރާމް އަލުން ފެށުމާ ދެކޮޅަށް އޭނާ ވަނީ ތެހެރާނަށް ދެއްވާ އިންޒާރުތައް އާކުރައްވާފަ އެވެ.

ތެހެރާނު ގައި ބޭއްވި ހުކުރު ނަމާދުގެ ބޮޑު ޖަމާއަތެއްގައި ވާހަކަދައްކަވަމުން، އިމާމް މުހައްމަދު ޖަވާދު ހައްޖު އަލީ އަކްބަރީ ވިދާޅުވީ، "ކަލޭމެން މި ސަރަހައްދުގައި އިންވެސްޓްކޮށްފައިވާ އެއް ޓްރިލިއަން ޑޮލަރަކީ އަހަރެމެންގެ މިސައިލްތަކުގެ ފާރަވެރިކަމުގެ ދަށުގައިވާ ތަކެތި" ކަމަށެވެ. ނަމަވެސް އޭނާ އިޝާރާތް ކުރެއްވީ ސީދާ ކޮން އިންވެސްޓްމަންޓްތަކަކަށް ކަމެއް ހާމައެއް ނުކުރައްވަ އެވެ.

މީގެ އިތުރުން، ފަހަކަށް އައިސް އީރާނުގައި ކުރިއަށްދިޔަ މުޒާހަރާތަކާ ގުޅިގެން ހައްޔަރުކުރި 800 މީހެއްގެ މަރުގެ އަދަބު ދިނުން އީރާނުން ހުއްޓާލާފައިވާ ކަމަށް ޓްރަމްޕް ވިދާޅުވި ވާހަކަ، އީރާނުގެ ޕްރޮސިކިއުޓާ ޖެނެރަލް މުހައްމަދު މުވައްހިދީ ވަނީ ދޮގުކުރައްވާފަ އެވެ. މުވައްހިދީ ވިދާޅުވި ގޮތުގައި އެއީ މުޅިން ދޮގު ވާހަކައެކެވެ. އެފަދަ އަދަދެއްގެ ބަޔަކު ނެތް ކަމަށާއި، އަދި އަދުލު އިންސާފުގެ ދާއިރާއިން އެފަދަ ނިންމުމެއް ނިންމާފައި ނުވާނެ ކަމަށް ވެސް އޭނާ ވިދާޅުވި އެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ ވެސް މިދިޔަ ހަފުތާގައި ފޮކްސް ނިއުސް އަށް ދެއްވި އިންޓަވިއުއެއްގައި ވިދާޅުވީ، މުޒާހަރާތަކާ ގުޅިގެން އެއްވެސް މީހަކު ދަންޖެއްސުމުގެ އެއްވެސް ރޭވުމެއް ނެތް ކަމަށެވެ.