އީރާނުން މިދިޔަ އަހަރުގެ ޖޫން މަހު އިޒްރޭލަށް ދިން ވަރުގަދަ މިސައިލް ހަމަލާތަކުން ބޮޑެތި ގެއްލުންތަކެއް ލިބުނު ކަމަށް އެއްބަސްވެއްޖެ

މިދިޔަ ޖޫން މަހު 12 ދުވަހަށް ދެމިގެންދިޔަ ހަނގުރާމައިގައި އީރާނުން ދިން ވަރުގަދަ މިސައިލް ހަމަލާތަކުގައި އިޒްރޭލުގެ "ސްޓްރެޓީޖިކް" ނުވަތަ އެންމެ މުހިންމު އަމާޒުތަކަށް ބޮޑެތި ގެއްލުންތަކެއް ލިބިފައިވާކަމަށް އިޒްރޭލުގެ ކުރީގެ މިލިޓަރީ އެފެއާޒް މިނިސްޓަރު އަވިގްޑޯރ ލިބަރމަން އެއްބަސްވެއްޖެ އެވެ.

ބުރާސްފަތި ދުވަހު ވާހަކަދައްކަމުން ލިބަރމަން ބުނީ، "ދުނިޔޭގެ އެންމެ މޮޅު ވައިގެ ސިފައިން ތިބީ އަހަރެމެންގެ އަތުގައި ކަމަށްވީ ނަމަވެސް، ހަމައެއާއެކު އީރާނުގެ ބެލިސްޓިކް މިސައިލްތަކުގެ (އިމާދު-1، ޝަހާބް-3، އަދި ޚައްރަމްޝަހަރު ފަދަ މިސައިލްތަކުގެ) ހަގީގީ ބާރު ފެނިއްޖެ؛" ކަމަށެވެ.

އިޒްރޭލުގެ ކުރީގެ ވަޒީރު އިތުރަށް ފާހަގަކުރި ގޮތުގައި، އީރާނުން ވަނީ އިޒްރޭލުގެ މުހިންމު އަމާޒުތަކަށް ހަމަލާދީފަ އެވެ. މިކަމުގެ ތަފްސީލަށް ދާން ބޭނުންނުވާ ކަމަށާއި، މިވަގުތު އިތުރު ތަފްސީލު ދެވެން ނެތް ކަމަށް އޭނާ ބުންޏެވެ.

"އީރާނުން ވަނީ އަހަރެމެންގެ ލެބޯޓްރީތަކާއި، އެތައް އަހަރެއް ވަންދެން އެއްކޮށްފައިވާ ހުރިހާ ދިރާސާތަކާއި މަސައްކަތުގެ ނަތީޖާތައް އެއްކޮށް ސުންނާފަތިކޮށްލާފައި؛" ލިބަރމަން ބުންޏެވެ.

އީރާނުގެ އިސްލާމިކް ރިވޮލިއުޝަން ގާޑް ކޯޕްސް (އައި.އާރް.ޖީ.ސީ) އިން ބަދަލުހިފުމުގެ ގޮތުން 'އޮޕަރޭޝަން ޓްރޫ ޕްރޮމިސް III' ފެށީ 2025 ޖޫން 13 ވަނަ ދުވަހުގެ ރޭގަނޑުގެ ވަގުތެއްގަ އެވެ. މިއީ އެމެރިކާގެ އެހީތެރިކަމާއެކު އިޒްރޭލުން އީރާނުގެ ނިއުކްލިއާ މަރުކަޒުތަކާއި، އަސްކަރީ އިންފްރާސްޓްރަކްޗަރ އަދި ތެހެރާނާއި އެހެނިހެން ސިޓީތަކުގެ އާންމުން ދިރިއުޅޭ އިމާރާތްތަކަށް ދިން ވަރުގަދަ ހަމަލާތަކަށް ރައްދު ދިނުމުގެ ގޮތުން ދިން ހަމަލާތަކެކެވެ.

އިޒްރޭލުން ވަނީ އީރާނުގެ އަސްކަރީ އިސް ކޮމާންޑަރުންނާއި ނިއުކްލިއާ ސައިންސްވެރިން އަވަހާރަކޮށްލާފަ އެވެ. އަދި އެ ލާއިންސާނީ އަމަލުތަކުގައި ކުޑަކުދިންނާއި އަންހެނުން ހިމެނޭހެން އާންމުންގެ އެތައް ބަޔަކު ޝަހީދުކޮށްލާފައިވެ އެވެ.

އީރާނުގެ އެންމެ ފަހުގެ އޮޕަރޭޝަންގައި، އިޒްރޭލުން އިސްތިއުމާރުކޮށްފައިވާ ފަލަސްތީނުގެ ބިންތަކުގެ އެކި ސަރަހައްދުތަކަށް އަމާޒުކޮށް އައި.އާރް.ޖީ.ސީ އިން ވަނީ ފުޅާދާއިރާއެއްގައި މިސައިލާއި ޑްރޯން ހަމަލާތައް ފޮނުވާލާފަ އެވެ.

ލިބަރމަން އިތުރަށް ބުނީ، "އީރާނުން ވަނީ މުހިންމު އަމާޒުތަކަށް ހަމަލާދީފައި، އަދި އަހަރެމެން މިވަގުތު ތިބީ ދިފާއީ ގޮތުން ތައްޔާރަކަށް ނޫން؛" ކަމަށެވެ.

"ދިފާއީ ދާއިރާ އިން އަހަރެމެން ތައްޔާރު ނޫން ކަމަށްވާތީ، އީރާނަށް ދޭން އުޅޭ ހަމަލާ ފަސްކުރުމަށް ނަތަންޔާހޫ ވަނީ ޓްރަމްޕްގެ ކިބައިން އެދިފައި؛" އޭނާ ބުންޏެވެ.

ހުޅަނގުގެ މީޑިއާ ރިޕޯޓްތަކުން ބުނާ ގޮތުގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ދާދި ފަހުން އެމެރިކާގެ ރައީސް ޑޮނަލްޑް ޓްރަމްޕްގެ ކިބައިން އީރާނަށް ދޭން ރާވާފައިވާ އަސްކަރީ ހަމަލާ ފަސްކުރުމަށް އެދިފަ އެވެ.

އިޒްރޭލުގެ މީޑިއާ ރިޕޯޓްތަކުން ބުނާ ގޮތުގައި، ނަތަންޔާހޫ އެގޮތަށް އެދުމުގެ ފަހަތުގައި އެކި ސަބަބުތައް ހުރުން އެކަށީގެންވެ އެވެ.

ތަޖުރިބާކާރުން ބުނާ ގޮތުގައި، ނަތަންޔާހޫ މިކަމަށް ފަސްޖެހުމުން އެނގެނީ އިޒްރޭލުގެ ވައިގެ ދިފާއީ ނިޒާމުގައި އާ ބޮޑެތި ބާގަނޑުތަކެއް ހުރިކަމެވެ. އަދި އީރާނުގެ ބެލިސްޓިކް މިސައިލް ހަމަލާއަކަށް ކުރިމަތިލުމުގެ ގާބިލުކަން އިޒްރޭލުގެ ކިބައިގައި ނެތް ކަމެވެ. އެ ފަރާތްތަކުން ބުނާ ގޮތުގައި، އެމެރިކާ އާއި އިޒްރޭލުން އީރާނަށް ދޭ ކޮންމެ ހަމަލާއަކަށް، މީގެ ކުރިން ދުވަހަކުވެސް ތަޖުރިބާކޮށްފައި ނުވާ ފަދަ ވަރުގަދަ ރައްދެއް ލިބޭނެ އެވެ.

ވޯލް ސްޓްރީޓް ޖާނަލްގައި ޝާއިޢުކުރި ލިޔުމެއްގައި، އީރާނުގެ ޚާރިޖީ ވަޒީރު އައްބާސް އަރަގްޗީ ވަނީ، ނާކާމިޔާބުވެފައިވާ އުދުވާނުތަކާއި އީރާނު ހަލަބޮލިކުރުމަށް ކުރި މަސައްކަތްތަކަށްފަހު، އެމެރިކާގެ ސިޔާސަތުތަކަށް އަސާސީ ބަދަލެއް ގެނައުމަށް ގޮވާލައްވާފަ އެވެ.

އަރަގްޗީ ވިދާޅުވީ އޭނާ "ހަނގުރާމައަށް ނަފުރަތުކުރާ" ކަމަށެވެ. ނަމަވެސް، އަލުން އަސްކަރީ ކުރިމަތިލުމަކަށް އިޒްރޭލުން މަސައްކަތްކޮށްފި ނަމަ އެކަމުގެ ނުރައްކާ ބޮޑުވާނެ ކަމަށް އިންޒާރު ދެއްވިއެވެ.

2025 ވަނަ އަހަރުގެ މެދުތެރޭގައި އީރާނުން ދެއްކި ކެތްތެރިކަމާ ޚިލާފަށް، އީރާނުގެ އަސްކަރިއްޔާއިން މިހާރު "އަތުގައި ހުރި ހުރިހާ ބާރެއް ބޭނުންކޮށްގެން ރައްދު ހަމަލާ ދިނުމަށް އެއްވެސް ޖެހިލުމެއް ނުވާނެ" ކަމަށް އަރަގްޗީ ވިދާޅުވި އެވެ.

އަދި އިޒްރޭލުގެ ހަނގުރާމަ އަށް ލޯބިކުރާ ފަރާތްތަކުން ދައްކާ ވާހަކަތައް އޭނާ ބަލައިނުގަންނަވާ ކަމަށާއި، މިފަދަ ކުރިމަތިލުމެއް ވެގެންދާނީ މުޅި ސަރަހައްދު ބަނދެލާނެ، އަދި ދުނިޔޭގެ އެކި ކަންކޮޅުތަކުގެ އާންމުންނަށް އޭގެ އަސަރު ފޯރާނެ، ވަރަށް "ނުރައްކާތެރި" އަދި ދިގުދެމިގެންދާނެ ކަމެއް ކަމަށް ވިދާޅުވެ އޭނާ އިންޒާރު ދެއްވި އެވެ.