އީރާނާ ދިމާލަށް އެމެރިކާގެ އިތުރު ވަރުގަދަ ލަޝްކަރެއް ދަތުރު ކުރަމުންދާ ކަމަށް ޓްރަމްޕް ވިދާޅުވެއްޖެ

އީރާނާ ދިމާލަށް އެމެރިކާގެ އިތުރު ވަރުގަދަ އަސްކަރީ ކަނޑުގެ ލަޝްކަރެއް ދަތުރުކުރަމުންދާ ކަމަށާއި، އީރާނުން އެމެރިކާ އާ އެކު އެއްބަސްވުމަކަށް އައުމަށް އުއްމީދުކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އަންގާރަ ދުވަހު ދެއްވި ތަޤުރީރެއްގައި ޓްރަމްޕް ވިދާޅުވީ، "މިހާރު ވެސް އީރާނާ ދިމާލަށް އެމެރިކާގެ ވަރަށް ފުރިހަމަ އަސްކަރީ ލަޝްކަރެއް ދަތުރުކުރަމުން އެބަދޭ،" ކަމަށެވެ. އަދި އީރާނުން އެމެރިކާ އާ އެކު އެއްބަސްވުމަކަށް އަންނާނެ ކަމަށް އުއްމީދުކުރައްވާ ކަމަށް ވެސް އޭނާ ވިދާޅުވި އެވެ.

އީރާނުގައި ކުރަމުންދިޔަ މުޒާހަރާތައް ހުއްޓުވުމަށް އެޤައުމުގެ ސަރުކާރުން ބާރުގެ ބޭނުންކޮށް، މުޅި ޤައުމުން އިންޓަނެޓްގެ ޚިދުމަތް ކަނޑާލާފައިވާ ދަނޑިވަޅެއްގައި، އެމެރިކާ އިން އެކަމުގެ ތެރެއަށް ވަނުމާ މެދު ޓްރަމްޕް ގެންދަވަނީ ތަފާތު ވާހަކަތައް ކުރައްވަމުންނެވެ. އީރާނުގެ ދީނީ ލީޑަޝިޕާ އިދިކޮޅު ފަރާތްތަކުން ދެކޭގޮތުގައި، އެޤައުމަށް ބަދަލެއް ގެނެވޭނީ ބޭރުގެ ނުފޫޒު ފޯރުވައިގެންނެވެ.

މި ހަފުތާގައި 'އެކްސިއޯސް' ނިއުސް ސައިޓަށް ދެއްވި އިންޓަވިއުއެއް ގައި ޓްރަމްޕް ވިދާޅުވީ، އީރާނު ކައިރީގައި އެމެރިކާގެ ވަރުގަދަ ލަޝްކަރެއް އެބައޮތް ކަމަށާއި، އެއީ ވެނެޒުއޭލާ ކައިރީގައި އޮތް ލަޝްކަރަށް ވުރެ ވެސް ބޮޑު ލަޝްކަރެއް ކަމަށެވެ.

ނަމަވެސް، ޓްރަމްޕް އިތުރަށް ފާހަގަކުރެއްވި ގޮތުގައި އީރާނުން ބޭނުން ވަނީ އެއްބަސްވުމަކަށް އަންނާށެވެ. "އެމީހުން ބޭނުން ވަނީ އެއްބަސްވުމަކަށް އަންނަން. އެކަން އަހަންނަށް ޔަޤީން. އެތައް ފަހަރަކު އެމީހުން ގުޅައިފި. އެމީހުން ބޭނުންވަނީ ވާހަކަދައްކަން،" ޓްރަމްޕް ވިދާޅުވި އެވެ.

އެމެރިކާގެ ސެންޓްރަލް ކޮމާންޑުން މި ހަފުތާގެ ކުރީކޮޅު ހާމަކޮށްފައިވާ ގޮތުގައި، 'ޔޫ.އެސް.އެސް އަބްރަހަމް ލިންކަން' އިސްވެ އޮންނަ އަސްކަރީ މަނަވަރުތަކުގެ ގްރޫޕެއް މިހާރު ވަނީ މެދުއިރުމަތީގެ ކަނޑުގެ ސަރަޙައްދަށް ފޯރާފަ އެވެ. ނަމަވެސް، އެ ލަޝްކަރު މިހާރު އޮތް ސީދާ ތަނެއް ހާމަކޮށްފަ އެއް ނުވެ އެވެ.