ދެން ދޭ ހަމަލާ އެއް ކުރިއަށްވުރެ މާ ނުރައްކާތެރިވާނެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު އީރާނަށް އަނެއްކާ ވެސް ވަރުގަދަ އިންޒާރެއް ދެއްވައިފި
އީރާނާ ދިމާލަށް އެމެރިކާގެ އަސްކަރީ ކަނޑުގެ ލަޝްކަރެއް ދަތުރުކުރަމުންދާކަން ޓްރަމްޕް ހާމަކުރައްވައި، އީރާނުން އަވަހަށް މަޝްވަރާގެ މޭޒަށް އައިސް ނިއުކްލިއަރ ހަތިޔާރު ނުހިމެނޭ އެއްބަސްވުމަކަށް އައުމަށް ގޮވާލެއްވި.
ވޮޝިންޓަން ޑީސީގައި ހުންނަ ވައިޓް ހައުސްގެ ސައުތު ލޯންގައި، 2026 ވަނަ އަހަރުގެ ޖެނުއަރީ މަހުގެ 16 ވަނަ ދުވަހު ރައީސް ޑޮނަލްޑް ޓްރަމްޕް "މެރިން ވަން" ހެލިކޮޕްޓަރަށް އަރާވަޑައިގަތުމުގެ ކުރިން ނޫސްވެރިންނާ ވާހަކަދައްކަވަނީ. | ގެޓީ އިމޭޖަސް
އީރާނަށް އޮތް ވަގުތު ކުޑަތަންވަމުންދާ ކަމަށާއި، ދެން ދޭ ހަމަލާ އެއް ކުރިއަށްވުރެ މާ ނުރައްކާތެރިވާނެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު އީރާނަށް އަނެއްކާ ވެސް ވަރުގަދަ އިންޒާރެއް ދެއްވައިފި އެވެ.
ޓްރަމްޕް ވިދާޅުވީ، އީރާނާ ދިމާލަށް ބޮޑު އަސްކަރީ ކަނޑުގެ ލަޝްކަރެއް ދަތުރުކުރަމުންދާކަން ތަކުރާރުކުރައްވައި، އެއްބަސްވުމަކަށް އައުމަށް އޭނާ ތެހެރާނަށް އިލްތިމާސްކުރައްވާ ކަމަށެވެ.
ޓްރޫތް ސޯޝަލްގައި ކުރެއްވި ދިގު ޕޯސްޓެއްގައި ޓްރަމްޕް ވިދާޅުވީ، އެމެރިކާގެ އަސްކަރީ ފައުޖު ދަތުރުކުރަމުންދަނީ ވަރަށް ބާރުމިނުގައި، ނުހަނު ވަރުގަދަ ބާރަކާއި އަދި ސާބިތު އަޒުމަކާ އެކު ކަމަށެވެ.
"މިއީ މަތިންދާބޯޓު އުފުލާ މަނަވަރު 'އަބްރަހަމް ލިންކަން' އިސްވެ އޮވެ ކުރާ ދަތުރެއް، މީގެ ކުރިން ވެނެޒުއޭލާ އަށް ފޮނުވި ފައުޖަށްވުރެ މާ ބޮޑު ލަޝްކަރެއް،" އޭނާ ވިދާޅުވިއެވެ.
އެ ލަޝްކަރު އޮތީ ހަވާލުކުރެވިފައިވާ މިޝަން ފުރިހަމަކުރުމަށް ތައްޔާރަށް ކަމަށާއި، ބޭނުންވެއްޖެ ހާލަތެއްގައި ބާރުގެ ބޭނުންކުރުމަށް ފަސްނުޖެހޭނެ ކަމަށްވެސް އޭނާ އިންޒާރު ދެއްވި އެވެ.
ޓްރަމްޕްގެ ޕޯސްޓުގައި ވިދާޅުވެފައިވަނީ، އީރާނުން އަވަހަށް މަޝްވަރާގެ މޭޒަށް އައިސް، ނިއުކްލިއަރ ހަތިޔާރު ނުހިމެނޭ، ހުރިހާ ފަރާތްތަކަށް އިންސާފުވެރި އަދި ހަމަހަމަ އެއްބަސްވުމަކަށް އަންނާނެ ކަމަށް އުންމީދު ކުރައްވާ ކަމަށެވެ. އަދި ވަގުތު ފާއިތުވަމުންދާކަމާއި، މިއީ ވަރަށް ނާޒުކު ވަގުތެއްކަން އޭނާ ފާހަގަކުރެއްވި އެވެ.
"މީގެ ކުރިންވެސް އަހަރެން އީރާނަށް އެންގިން އެއްބަސްވުމެއް ގާއިމުކުރަން. ނަމަވެސް އެމީހުން އެކަން ނުކުރުމުން 'އޮޕަރޭޝަން މިޑްނައިޓް ހެމަރ' ހިންގައި އީރާނަށް ބޮޑެތި ގެއްލުންތަކެއް ދިނިން. ދެން ދޭ ހަމަލާ މާ ނުރައްކާތެރިވާނެ! އެފަދަ ކަމެއް ތަކުރާރުވިޔަނުދީ،" ޓްރަމްޕް ވިދާޅުވި އެވެ.
އީރާނުގެ ދާޚިލީ ކަންކަމުގެ ތެރެއަށް އެމެރިކާ އިން ވަދެދާނެ ކަމުގެ އެކި ކަހަލަ އިޝާރާތްތައް ޓްރަމްޕް ވަނީ ކުރައްވާފަ އެވެ.
ޖޫން މަހު އިޒްރޭލުން އީރާނުގެ ނިއުކްލިއަރ އަދި ބެލިސްޓިކް މިސައިލް ޕްރޮގްރާމްތައް ބަލިކަށިކޮށްލުމަށް ކުރި 12 ދުވަހުގެ ހަނގުރާމައިގައި ވޮޝިންޓަނުން ބައިވެރިވެފައިވާއިރު، އޭގެ ތެރޭގައި އީރާނުގެ ނިއުކްލިއަރ މަރުކަޒުތަކަށް އެމެރިކާ އިން ދިން ވަރުގަދަ ވައިގެ ހަމަލާތައް ހިމެނެއެވެ.
އަންގާރަ ދުވަހު ދެއްވި ތަގުރީރެއްގައި ވެސް ޓްރަމްޕް ވަނީ އެމެރިކާގެ އަސްކަރީ ފައުޖެއް އީރާނާ ދިމާލަށް މިހާރުވެސް ދަތުރުކުރަމުންދާކަން ހާމަކުރައްވައި، އީރާނުން އެމެރިކާއާ އެކު އެއްބަސްވުމަކަށް އައުމަށް އެދިވަޑައިގަންނަވާ ކަމަށް ވިދާޅުވެފަ އެވެ. "ވަރަށް ފުރިހަމަ އަސްކަރީ ފައުޖެއް މިހާރުވެސް އީރާނާ ދިމާލަށް ދަތުރުކުރަމުން އެބަދޭ. އަހަރެން އުންމީދު ކުރަނީ އެމީހުން އެއްބަސްވުމަކަށް އަންނާނެ ކަމަށް،" އޭނާ ވިދާޅުވި އެވެ.
