އިރާނުގެ އިސް ލީޑަރަށްޓަކައި ޤުރުބާންވުމަށް މިލިއަނުން މީހުން ތިބީ ތައްޔާރަށް ކަމަށް ބަޙްރޭނުގެ އެންމެ އިސް ދީނީ ޢާލިމު ވިދާޅުވެއްޖެ

އިރާނުގެ ރޫޙާނީ އިސްލީޑަރަށްޓަކައި ޤުރުބާންވުމަށް މިލިއަނުން މީހުން ތިބީ ތައްޔާރަށް ކަމަށް ބަޙްރޭނުގެ އެންމެ އިސް ދީނީ ޢާލިމު ވިދާޅުވެއްޖެ އެވެ.

އިރާނާއި އެޤައުމުގެ ދީނީ އަދި ސިޔާސީ ލީޑަރާ ދެކޮޅަށް އެމެރިކާ އިން ބަހުގެ ހަމަލާތައް ވަރުގަދަކުރަމުންދާ ދަނޑިވަޅެއްގައި، އިރާނުގެ ރޫޙާނީ އިސް ލީޑަރު އާޔަތުﷲ ސައްޔިދު ޢަލީ ޚާމަނާއީ އަށް ޓަކައި ފުރާނަ އިން ޤުރުބާންވުމަށް މިލިއަނުން މީހުން ތިބީ ތައްޔާރަށް ކަމަށް ބަޙްރޭނުގެ އެންމެ އިސް ދީނީ ޢާލިމު އިންޒާރު ދެއްވައިފިއެވެ.

އަންގާރަ ދުވަހު ބަޙްރޭނުގެ ޝައިޚް ޢީސާ ޤާސިމް ނެރުއްވި ބަޔާނެއްގައި ވިދާޅުވީ، އާޔަތުﷲ ޚާމަނާއީ އަކީ އެމަނިކުފާނުގެ ދީނީ އިލްމީ ޤާބިލުކަމާއި، މަތިވެރި ދަރަޖައާއި، އަދި ސިޔާސީ ހިކުމަތްތެރި ލީޑަޝިޕްގެ ސަބަބުން މުޅި ދުނިޔޭގައި ވެސް ފާހަގަކޮށްލެވޭ ތަފާތު ލީޑަރެއް ކަމަށެވެ.

"އެމަނިކުފާނަކީ އިރާނުގެ މިލިއަނުން ގުނާލެވޭ މީހުން އެބޭފުޅަކަށްޓަކައި ފުރާނަ ފިދާކުރަން ތައްޔާރަށް ތިބި ލީޑަރެއް. އަދި އެމަނިކުފާނުގެ އަމުރުފުޅުތަކަކީ ދީނީ އަމުރުފުޅުތަކެއް ކަމުގައި އެމީހުން ދެކޭ،" ޝައިޚް ޢީސާ ޤާސިމް ވިދާޅުވި އެވެ.

މީގެ އިތުރުން، ދުނިޔޭގެ އެކި ކަންކޮޅުތަކުގައި ތިބި މުސްލިމުން އާޔަތުﷲ ޚާމަނާއީ އަށް ތާއީދުކުރާ ކަމަށާއި، ހަމަޖެހުމާއި، ސުލްހަ އާއި، އަދި އިންސާނުންގެ މެދުގައި އަޚުވަންތަކަން ޤާއިމުކުރެއްވުމަށް އެމަނިކުފާނު ކުރައްވާ މަސައްކަތްޕުޅުތަކަށް އެއްބާރުލުންދޭ ކަމަށްވެސް އެބަޔާނުގައި ފާހަގަކުރައްވާފައިވެ އެވެ.

ޝައިޚް ޢީސާ ޤާސިމް މި ބަޔާން ނެރުއްވާފައި ވަނީ، އެމެރިކާގެ ރައީސް ޑޮނަލްޑް ޓްރަމްޕް 'ޕޮލިޓިކޯ' ނޫހަށް ދެއްވި ބަސްދީގަތުމެއްގައި އާޔަތުﷲ ޚާމަނާއީ އަށް ނިސްބަތްކުރައްވައި ބޭއަދަބީ ބަސްތަކެއް ބޭނުންކުރެއްވިތާ ހަފުތާއެއްހާ ދުވަސް ފަހުންނެވެ.

މީގެ ކުރިން ޖެނުއަރީ 17 ވަނަ ދުވަހު އާޔަތުﷲ ޚާމަނާއީ ދެއްވި ތަޤުރީރެއްގައި، ޖެނުއަރީ މަހުގެ ކުރީކޮޅު އިރާނުގައި ހިނގައިދިޔަ ބޮޑެތި ހަމަނުޖެހުންތަކަށް ހިތްވަރުދީ، ޓެރަރިސްޓުންނަށް އެހީތެރިވުމުގެ ޒިންމާ ޓްރަމްޕް އުފުލަންޖެހޭނެ ކަމަށް ވިދާޅުވެފައިވެ އެވެ.

އާޔަތުﷲ ޚާމަނާއީ ވިދާޅުވި ގޮތުގައި، ޓްރަމްޕް ވަނީ ޓެރަރިސްޓް ޖަމާޢަތްތަކަކީ އިރާނުގެ ރައްޔިތުން ތަމްސީލުކުރާ ބައެއްގެ ގޮތުގައި ދައްކަވަން މަސައްކަތް ކުރައްވާފަ އެވެ. އަދި އެއީ "ބޮޑުވެގެންވާ އިތުރުފުޅެއް" ކަމަށް ވެސް އެމަނިކުފާނު ސިފަކުރެއްވި އެވެ.

ޝައިޚް ޢީސާ ޤާސިމްގެ ބަޔާނުގައި އިތުރަށް ވިދާޅުވީ، ޖެނުއަރީ 13 ވަނަ ދުވަހު އިރާނުގެ އެކި ކަންކޮޅުތަކުގައި މިލިއަނުން މީހުން މަގުތަކަށް ނުކުމެ ހަމަނުޖެހުންތައް ކުށްވެރިކުރުމަކީ، ބޭރުގެ ނުފޫޒުން ހިންގާ ހަލާކުކުރުމުގެ އަމަލުތަކާ ދެކޮޅަށް އާޔަތުﷲ ޚާމަނާއީއަށް އޮތް ރައްޔިތުންގެ ފުރިހަމަ ތާއީދު ހާމަވެގެންދިޔަ ކަމެއް ކަމަށެވެ.

އަދި އިރާނުގެ އިސްލާހަށް މަސައްކަތްކުރާ ކަމަށް ބުނެ ޓްރަމްޕް ދައްކަވާ ވާހަކަތައް އިރާނުގެ އެއްވެސް ރައްޔިތަކު ގަބޫލުނުކުރާނެ ކަމަށާއި، ސަބަބަކީ ޖޫން މަހު އިޒްރޭލުގެ އަނިޔާވެރި ސަރުކާރުން ކުރި ހަނގުރާމަ އަށް ޓްރަމްޕް ތާއީދުކޮށް، އެކަމުގައި ބައިވެރިވެފައިވާތީ ކަމަށްވެސް ޝައިޚް ޢީސާ ޤާސިމް ވިދާޅުވި އެވެ.