އީރާނަށް ހަމަލާ ދިނުމަށް ޔޫއޭއީ ގެ އެއްވެސް ސަރަހައްދެއް ބޭނުން ކުރަން ހުއްދަ ނުދޭނެ ކަމަށް އެ ގައުމުން އަންގައިފި
26 ޖެނުއަރީ 2026 | ހޯމަ 16:57އީރާނަށް ދޭ އެއްވެސް ހަމަލާއެއްގައި ލޮޖިސްޓިކް އެހީތެރިކަން ފޯރުކޮށްދިނުމަށް ވެސް ޔޫއޭއީން ވަނީ އިންކާރުކޮށްފަ.
އަބޫދާބީގެ ޝައިހް ޒައިދު މިސްކިތުގެ ބޭރުގައި ޔޫއޭއީގެ ދިދަ ފެންނަ މަންޒަރެއް. | ގެޓީ އިމޭޖަސް
އީރާނަށް އެއްވެސް ހަމަލާއެއް ދިނުމަށް ޔުނައިޓެޑް އަރަބް އެމިރޭޓްސް (ޔޫއޭއީ) ގެ ސަރަހައްދު ބޭނުން ކުރުމުގެ ފުރުސަތު ނުދޭނެ ކަމަށް އެ ގައުމުގެ ފޮރިން މިނިސްޓްރީން ހޯމަ ދުވަހު ނެރުނު ބަޔާނެއްގައި ބުނެފި އެވެ.
ޔޫއޭއީން ބަޔާން ނުރުނު އިރު އެމެރިކާ ގެ ހަނގުރާމަމަތީ ލަޝްކަރެއް ގަލްފް ސަރަހައްދަށް ހޯމަ ދުވަހު ވަނީ ވަދެފަ އެވެ.
ޔޫއޭއީގެ ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ، އީރާނާ ދެކޮޅަށް ހިންގާ އެއްވެސް ހަރުކަށި އަސްކަރީ އަމަލެއްގައި އެ ގައުމުގެ ވައިގެ ސަރަހައްދާއި، ބިމާއި، ނުވަތަ ކަނޑުގެ ސަރަހައްދު ބޭނުންކުރުމުގެ ފުރުސަތު ނުދިނުމަށް ޔޫއޭއީން ނިންމާފައިވާ ނިންމުން އަލުން ކަށަވަރުކޮށްދޭ ކަމަށެވެ.
ޔޫއޭއީގެ ވެރިރަށް އަބޫދާބީ ކައިރީގައި އޮންނަ އަލް-ޛަފްރާ އެއާބޭސް ގައި އެމެރިކާގެ އެތައް ހާސް އަސްކަރީ ފްލީޓެއް ތިބެއެވެ. މިއީ ގަލްފް ސަރަހައްދުގައި އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ މުހިންމު ތަންތަނުގެ ތެރެއިން އެއް ތަނެވެ.
އީރާނަށް ދޭ އެއްވެސް ހަމަލާއެއްގައި ލޮޖިސްޓިކް އެހީތެރިކަން ފޯރުކޮށްދިނުމަށް ވެސް ޔޫއޭއީން ވަނީ އިންކާރުކޮށްފަ އެވެ. އެ ބަޔާނުގައި އިތުރަށް ބުނެފައިވަނީ، މިހާރު ކުރިމަތިވެފައިވާ މައްސަލަތަކަށް އޮތް އެންމެ ރަނގަޅު ހައްލަކީ މަޝްވަރާކުރުމާއި، މަސްލަހަތު ފިނިކުރުމާއި، ބައިނަލްއަގުވާމީ ގާނޫނުތަކަށް ބޯލެނބުމުގެ އިތުރުން ދައުލަތްތަކުގެ މިނިވަންކަމާއި ސިޔާދަތަށް އިހުތިރާމްކުރުން ކަމަށެވެ.
