އީރާން އަށް ހަމަލާ ދިނުމަށް ސައުދީގެ އެއާ ސްޕޭސް ބޭނުން ނުކުރެވޭނެ: ވަލީ އަހުދު މުޙައްމަދު ބިން ސަލްމާން

އީރާންއާ ދެކޮޅަށް ހަމަލާ ދިނުމަށް، ސައުދީ އަރަބިއްޔާގެ އެއާ ސްޕޭސް އާއި އެ ޤައުމުގެ ބިމުގެ ސަރަހައްދު ވެސް ބޭނުން ނުކުރެވޭނެ ކަމަށް، ސައުދީގެ ވަލީ އަހުދު މުޙައްމަދު ބިން ސަލްމާން ވިދާޅުވެއްޖެ އެވެ.

ވަލީ އަހުދު މުޙައްމަދު ބިން ސަލްމާން މިހެން ވިދާޅުވެފައި ވަނީ، އަންގާރަ ދުވަހު އީރާންގެ ރައީސް މަސްއޫދު ޕެޒެޝްކިއާންއާ ފޯނުން ގުޅުއްވައި ދެއްކެވި ވާހަކައިގަ އެވެ. އެ މަޝްވަރާގައި އީރާންގެ ރައީސް ވަނީ އެ ޤައުމުގެ އެންމެ ފަހުގެ ކުރިއެރުންތަކާއި، އަސްކަރީ ހަމަލާއެއް އަތުވެދާނެ ކަމަށް ވަމުން އަންނަ ތައްޔާރީތައް ހިއްސާ ކުރައްވައިފަ އެވެ.

މި ދަނޑިވަޅަކީ އީރާން އަށް އަމާޒުކޮށް އަސްކަރީ ހަމަލާއެއް ދީފާނެ ކަމަށް ބުނެ، އެމެރިކާ އިން އިންޒާރު ދެމުން އަންނަ ވަގުތެކެވެ. އެމެރިކާގެ ރައީސް ޑޮނަލްޑް ޓްރަމްޕް އަންނަނީ ތަކުރާރުކޮށް އެ އިންޒާރު ދެއްވަމުންނެވެ. އިންޒާރު ތަކަށް ފަހު، އެމެރިކާގެ އަސްކަރީ ބައެއް އުޅަނދުތައް ވަނީ މެދު އިރުމަތީގެ ސަރަހައްދަށް ޖަމާވެފަ އެވެ. 

އެމެރިކާ އިން ބުނެފައި ވަނީ މިދިޔަ އަހަރުގެ ޖޫން މަހުގެ ތެރޭގައި، އީރާންގެ ނިއުކްލިއާ ތިން މަރުޒަކަށް ދިން ހަމަލާގައި އެ ޤައުމުގެ ނިއުކްލިއާ ޕްރޮގްރާމް ނައްތާލެވިފައިވާ ކަމަށެވެ. ނަަމަވެސް، އީރާން އިން ބުނެފައި ވަނީ އެ ހަމަލާގައި އެ ޤައުމުގެ ނިއުކްލިއާ ޕްރޮގްރާމް އަށް ލިބުނު ގެއްލުންތައް ރިކަވާ ކޮށްފައިވާ ކަމަށެވެ. 

އީރާންގެ ރައީސްއާ ކުރެއްވި މަޝްވަރާގައި ވަލީ އަހުދު މުޙައްމަދު ބިން ސަލްމާން ވަނީ އިސްލާމީ ޖުމްހޫރިއްޔާ އާއި، އީރާންގެ ސިޔާދަތަށް ޙުރުމަތްތެރި ވުމަކީ މުހިންމު ކަމެއް ކަމަށް ފާހަގަ ކުރައްވައިފަ އެވެ. އަދި އީރާން އަށް އަމާޒު ކޮށް ދޭ އެއްވެސް ހަމަލާއެއްގައި، އަދި ހަރުކަށި އަމަލެއްގައި ސައުދީގެ އެއާ ސްޕޭސް އަދި ބިން ބޭނުން ކުރުމުގެ ފުރުސަތު ނުދެއްވާނެ ކަމަށް ވެސް ވަލީ އަހުދު ވަނީ ވިދާޅުވެފަ އެވެ. 

މެދު އިރުމަތީގެ ސަރަހައްދުގައި ހަނގުރާމައެއް ފެށި ދާނެ ކަމުގެ ބިރު ބޮޑުވެފައިވާއިރު، އީރާންއާ ދެކޮޅަށް އެމެރިކާ އިން ހަމަލާ ދިނުމަކީ ސައުދީ އަރަބިއްޔާ އިން ދެކޮޅު ހަދާ ކަމެއް ކަމަށް ފާހަގަ ކޮށްފައިވެ އެވެ. އީރާން އާއި ސައުދީއާ ދެމެދު އޮތް ގުޅުން ނުތަނަވަސްވެފައި ވީ ނަމަވެސް، މިހާރު ދެ ޤައުމުން ވެސް އަންނަނީ ގުޅުން ރަނގަޅު ކުރުމަށް ގިނަ މަސައްކަތް ތަކެއް ކުރަމުންނެވެ.