ޓީސީ އަތުން ހޯދި އުނދަގޫ މޮޅާ އެކު، ނިއު ރޭޑިއަންޓް އިން މަގާމު ދަމަހައްޓައިފި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން ހޯދި އުނދަގޫ މޮޅާ އެކު، ނިއު ރޭޑިއަންޓް ސްޕޯޓްސް ކުލަބުން މަގާމު ދަމަހައްޓައިފި އެވެ.

އާދީއްތަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ނިއު ރޭޑިއަންޓް އިން ކާމިޔާބު ކުރީ 2-0 އިންނެވެ. ޓީސީ އަތުން އުނދަގޫ މޮޅެއް ނިއު ރޭޑިއަންޓަށް ލިބުނު މެޗުގެ ދެ ލަނޑު ވެސް އެ ޓީމުން ޖެހީ މެޗުގެ އެންމެ ފަހު ވަގުތުގެ ތެރޭގަ އެވެ.

މެޗުގައި ނިއު ރޭޑިއަންޓް އިން ލަނޑު ޖެހުމަށް ގިނަ މަސައްކަތް ތަކެއް ކުރި ނަމަވެސް، ޓީސީގެ ކުޅުންތެރިން ވަނީ ޑިފެންސްގައި ރަނގަޅު ކުޅުމެއް ދައްކައިފަ އެވެ. ޓީސީ އިން ވެސް ވަނީ އެ ޓީމަށް ލިބުނު ފުރުސަތު ތަކުގެ ބޭނުން ހިފުމަށް މަސައްކަތް ކޮށްފަ އެވެ. ނަަމަވެސް، މެޗު އެއްވަރުވާން ދަނިކޮށް ނިއު ރޭޑިއަންޓް އިން ވަނީ ދެ ލަނޑު ޖަހައިފަ އެވެ. 

އެގޮތުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ނިއު ރޭޑިއަންޓް އިން ވަނީ ދެ ލަނޑު ޖަހައިފަ އެވެ. އެގޮތުން އެ ދެ ލަނޑު ވެސް ނިއު ރޭޑިއަންޓް އަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ އަލްހާޖީ ގޭރޯ އެވެ. ފުރަތަމަ ލަނޑު އޭނާ ޖެހީ އިތުރު ވަގުތުގެ ހަތް ވަނަ މިނެޓުގަ އެވެ. އެއީ ޓީސީގެ ކުޅުންތެރިޔަކަށް ހެދުނު ގޯހެއްގެ ފައިދާ ނަގައި އޭނާ ޖެހި ލަނޑެކެވެ. އިތުރު ވަގުތުގެ ނުވަ ވަނަ މިނެޓުގައި ގޭރޯ ވަނީ ދެ ވަނަ ލަނޑެއް ވެސް ޖަހައިފަ އެވެ.

މޮޅާއެކު ނިއު ރޭޑިއަންޓް އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅެފައިވާ 14 މެޗުން 27 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ހަތަރު ވަނައިގައި ބުރު ސްޕޯޓްސް ކުލަބަށް ލިބެނީ 26 ޕޮއިންޓެވެ. އެއް ވަަނައިގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަށް ލިބެނީ 14 މެޗުން 40 ޕޮއިންޓެވެ. 

މިފަހަރުގެ ލީގުގައި ނިއު ރޭޑިއަންޓް ވަނީ އަށް މެޗުން މިހާތަނަށް މޮޅުވެފަ އެވެ. ތިން މެޗު އެއްވަރުވެފައިވާއިރު، ތިން މެޗުން ވަނީ ބަލިވެފަ އެވެ.