އެމެރިކާ އާއި އިޒްރޭލުގެ އިންޒާރުތަކާ ގުޅިގެން، ދޭ ކޮންމެ ހަމަލާއަކަށް "ހިތާމަކުރަންޖެހޭ ފަދަ ވަރުގަދަ ރައްދެއް" ދޭނެ ކަމަށް އީރާނުން ބުނެފި

އީރާނަށް ދޭ ކޮންމެ ހަމަލާއަކަށް "ނުހަނު ހިތާމަކުރަންޖެހޭ ފަދަ ވަރުގަދަ ރައްދެއް" ދޭނެ ކަމުގެ އިންޒާރު އެގައުމުން ދީފިއެވެ. އަދި އީރާނަކީ ކުރިއަށްވުރެ މާ ގާބިލު ގައުމެއް ކަމަށްވެސް އެގައުމުން ވަނީ ފާހަގަކޮށްފަ އެވެ.

އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަގާއީ ހޯމަ ދުވަހު ތެހެރާންގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، އެމެރިކާ އިން ގަލްފް ސަރަހައްދުގައި ހިންގަމުންދާ އަސްކަރީ ހަރަކާތްތަކާއި ތަމްރީނުތަކަށް ވަނީ ރައްދު ދެއްވާފައެވެ.

އޭނާ ވިދާޅުވީ، އީރާނާ ދެކޮޅަށް ކުރިއަށްދަނީ "ހައިބްރިޑް" ނުވަތަ އެކި ގޮތްގޮތުން ދެވޭ ހަމަލާތަކެއް ކަމަށާއި، ޖޫން މަހުގެ ހަމަލާތަކަށް ފަހު ފާއިތުވި މަސްތަކުގައި އެމެރިކާ އާއި ޒަޔަނިސްޓު އިސްތިއުމާރުގެ ސަބަބުން އާ ނުރައްކާތަކަކާ ކުރިމަތިލާން ޖެހިފައިވާ ކަމަށެވެ.

އީރާނުގެ ބާޒާރުތަކުގައި ތަކެތީގެ އަގުބޮޑުވުމާއި ފައިސާގެ އަގު ދަށްވުމާ ގުޅިގެން، ސަރުކާރުގެ ސަމާލުކަމަށް އެކަން ގެނައުމަށް ވިޔަފާރިވެރިން ކުރި ސުލްހަވެރި މުޒާހަރާތަކަށް ފަހު، ބޭރުގެ ނުފޫޒާއެކު ޖެނުއަރީ 8 ގައި ފެށުނު ހަމަނުޖެހުންތައް އެތައް ދުވަހަކަށް ދެމިގެންދިޔަކަން އޭނާ ފާހަގަކުރެއްވި އެވެ.

އިޒްރޭލުންނާއި އެމެރިކާގެ ރައީސް ޑޮނަލްޑް ޓްރަމްޕްގެ ފާޅުކަން ބޮޑު ހިތްވަރު ދިނުމާއެކު ހިންގި މި ހަމަނުޖެހުންތަކުގައި އާންމުންގެ މުދަލާއި ސަރުކާރުގެ އިމާރާތްތަކަށް ބޮޑެތި ގެއްލުންތަކެއް ދީފައިވެ އެވެ. އަދި މި ހަމަނުޖެހުންތަކުގައި ސަލާމަތީ ބާރުތަކުގެ މީހުންނާއި އަންހެނުންނާއި ކުޑަކުދިން ހިމެނޭހެން އެތައް ހާސް އާންމުންނެއް މަރާލާފައިވާ ކަމަށް ބަގާއީ ވިދާޅުވި އެވެ.

އީރާނުގެ ކަމާބެހޭ ފަރާތްތަކުން ކަށަވަރުކޮށްދޭ ގޮތުގައި، މި ހަމަނުޖެހުންތަކުގައި އެމެރިކާ އާއި އިޒްރޭލުގެ ޖާސޫސީ އިދާރާތަކުން ވަނީ ސީދާ ގޮތެއްގައި ބައިވެރިވެ، ހަމަނުޖެހުން ހިންގި މީހުންނާއި ހަތިޔާރު އެޅި ޓެރަރިސްޓުންނަށް ފައިސާ އާއި ތަމްރީނު އަދި މީޑިއާގެ އެހީތެރިކަން ފޯރުކޮށްދީފަ އެވެ.

ބަގާއީ އިތުރަށް ވިދާޅުވީ، ސަރަހައްދުގެ ހަމަޖެހުން ގެއްލުމަކީ ހަމައެކަނި އީރާނަށް އޮތް ނުރައްކަލެއް ނޫންކަން ސަރަހައްދުގެ އެހެން ގައުމުތަކަށް ވެސް އެނގޭ ކަމަށާއި، އެހެންކަމުން މިއީ އެ ހުރިހާ ގައުމުތަކެއްގެ ވެސް ކަންބޮޑުވުމެއް ކަމަށެވެ.

"އީރާނުގެ އަމިއްލަ ގާބިލުކަމަށް ފުރިހަމަ އިތުބާރު އެބައޮތް. އަދި ޖޫން މަހުގެ ތަޖުރިބާތަކުގެ އަލީގައި، ކޮންމެ ހަމަލާއަކަށް ވެސް ކުރިއަށްވުރެ ވަރުގަދަ އަށް ތައްޔާރު އަދި ހިތާމަކުރަންޖެހޭ ފަދަ ރައްދެއް ދޭނަން،" އޭނާ ވިދާޅުވިއެވެ.

މީގެ އިތުރުން، އދ. ގެ ހިއުމަން ރައިޓްސް ކައުންސިލުން ދާދި ފަހުން އީރާނާ ދެކޮޅަށް ފާސްކުރި ގަރާރު ބަގާއީ ވަނީ ކުށްވެރިކުރައްވާފަ އެވެ. އޭނާ ވިދާޅުވީ އެ ގަރާރުގެ ސަބަބުން ބައިނަލްއަގުވާމީ މުޖުތަމައުގެ މެދުގައި ބައިބައިވުން އުފެދިފައިވާ ކަމަށެވެ.