އެމެރިކާ މި ދެކެނީ ރަން ޒަމާނެއް، މިޑް ޓާމް އިންތިޚާބު ގެއްލިއްޖެ ނަމަ ވަރަށް ގޯސް ވާނެ: ޓްރަމްޕް

މިއަހަރު އޮންނަ އެމެރިކާގެ މިޑް ޓާމް އިންތިޚާބުގައި، ވެރިކަން ކުރާ ރިޕަބްލިކަން ޕާޓީ ބަލިވެއްޖެ ނަމަ ވަރަށް ގޯސް ކަންކަން ވާނެ ކަމުގެ އިންޒާރު، އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ.

މިނިއަޕޮލިސްގައި ހިނގި އަނިޔާވެރި ހާދިސާ ތަކާއި، އެމެރިކާގެ އިޤްތިޞާދަށް ދިމާވެފައިވާ ގޮންޖެހުން ތަކުގެ ސަބަބުން އާންމު ރައްޔިތުން ބޮޑު ކަންބޮޑުވުމެއްގެ ތެރޭގައި ވަނިކޮށް، އަންގާރަ ދުވަހު ޓްރަމްޕް ވަނީ މިޑް ޓާމް އިންތިޚާބުގެ ކެމްޕެއިން ފައްޓަވައިފަ އެވެ. 

އައިއޯވާގައި އޮތް ކެމްޕެއިން ރެލީއެއްގައި ބައިވެރިވެ ވަޑައިގެން، ޓްރަމްޕް ވަނީ ވާހަކަ ދައްކަވައިފަ އެވެ. އެގޮތުން ޓްރަމްޕް ވިދާޅުވީ އޭނާ ނިސްބަތްވެ ވަޑައިގަންނަވާ ރިޕަބްލިކަން ޕާޓީ އިން، މިއަހަރުގެ ނޮވެމްބަރު މަހު އޮންނަ މިޑް ޓާމް އިންތިޚާބުގައި ސެނެޓާއި، ހައުސްގެ މެޖޯރިޓީ ހޯދަން ޖެހޭ ކަމަށެވެ. ޓްރަމްޕް މިހެން ވިދާޅުވެފައިވާއިރު، އެމެރިކާގެ ޚިޔާލު ހޯދުމުގެ ވޯޓު ތަކުން ދައްކަނީ ޓްރަމްޕްގެ ތާއީދު ދަށްވަމުން އަންނަ ކަމަށެވެ. 

ވެރި ކަމުގެ ދެ ވަނަ ދައުރެއް ފުރުއްވަމުން ގެންދަވާ ޓްރަމްޕް ވިދާޅުވީ އައިއޯވާ އަށް ވަޑައިގެންނެވީ ހަމައެކަނި އެ ސްޓޭޓް ދެކެ ލޯބިވާތީ ނޫން ކަމަށެވެ. އެކަމަކު، މިޑް ޓާމް އިންތިޚާބު ކާމިޔާބު ކުރުމަށްޓަކައި ކެމްޕެއިން ފެށުމަށް ވަޑައިގެންނެވީ ކަމަށާއި، މިޑް ޓާމް އިންތިޚާބު ކާމިޔާބު ކުރަން ޖެހޭ ކަމަށް ޓްރަމްޕް ވިދާޅުވި އެވެ. 

ޓްރަމްޕް ވެރިކަން ކުރައްވަމުން އަންނަ ގޮތުން އޭނާ ގެ ސަރުކާރާ މެދު ރައްޔިތުންގެ މެދުގައި ނުތަނަވަސްކަން އުފެދިފައި އޮތްއިރު، ޓްރަމްޕް ވިދާޅުވީ ރިޕަބްލިކަން ޕާޓީ އަށް މިޑް ޓާމް އިންތިޚާބު ގެއްލިއްޖެ ނަމަ، ވަރަށް ގިނަ ގޯސް ކަންކަން ވާނެ ކަމަށެވެ. އެގޮތުން މިހާތަނަށް ވާހަކަ ދައްކަމުން އައި ވަރަށް ގިނަ ރަނގަޅު ވާހަކަ ތަކާއި، ރަނގަޅު ކަންކަން ކުރުމުގެ ފުރުސަތު ގެއްލިގެން ދާނެ ކަމަށް ވެސް ޓްރަމްޕް ވިދާޅުވި އެވެ. 

ކެމްޕެއިން ކުރެއްވުމަށް ޓްރަމްޕް ދެއްކެވި ވާހަކަ އަށް ވުރެ ބޮޑަށް، މިނިސޯޓާގައި މި މަހު ހިނގި ހާދިސާ ތަކަށް ވަނީ މާ ބޮޑު ސަމާލު ކަމެއް ލިބިފަ އެވެ. އެ ސަރަހައްދުގައި އާންމުންގެ ތެރެއިން ދެ މީހަކު މަރުވެފައިވާއިރު، އެކަމާ ދެކޮޅަށް މުޒާރަރާ ވެސް އަންނަނީ ކުރަމުންނެވެ. އެންމެ ފަހުން ދެ ވަނަ މީހަކު މަރާލާފައި ވަނީ މިދިޔަ ހޮނިހިރު ދުވަހު އެވެ. އެކަމާ ގުޅޭ ގޮތުން ވާހަކަ ދައްކަވާނެ ކަމަށް ފޮކްސް ނިއުސް އަށް ޓްރަމްޕް ވިދާޅުވި ނަމަވެސް، އައިއޯވާގައި ދެއްކެވި ވާހަކައިގައި އެ ހާދިސާގެ ވާހަކަ އޭނާ ދައްކާވަފައި ނުވެ އެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސް އިން ބުނެފައިވާ ގޮތުގައި މިޑް ޓާމް އިންތިޚާބުގެ ކެމްޕެއިންގައި ޓްރަމްޕް ވަރަށް ގިނަ ދަތުރު ތަކެއް ކުރައްްވާނެ އެވެ. އެގޮތުން ކޮންމެ ހަފުތާ އަކު ވެސް، އެކި ހިސާބު ތަކަށް ވަޑައިގެން ކެމްޕެއިން ކުރައްވާނެ ކަމަށް ވައިޓް ހައުސް އިން ބުނެފައިވެ އެވެ. އެމެރިކާގެ ތާރީޚަށް ބަލާއިރު، މިޑް ޓާމް އިންތިޚާބުގައި ސަރުކާރަށް ނޫނެކޭ ބުނެ ރައްޔިތުން ވޯޓު ދީފައި އެބަ ހުއްޓެވެ. 

އައިއޯވާގައި ވާހަކަ ދައްކަވަމުން އިތުރަށް ޓްރަމްޕް ވިދާޅުވެފައި ވަނީ، އެމެރިކާ މިހާރު ދެކެމުން އަންނަނީ އައު ރަން ޒަމާނެއް ކަމަށެވެ. އެގޮތުން ޤައުމުގައި ތަކެތީގެ އަގު ދަށް ވަމުން އަންނަ ކަމަށް ޓްރަމްޕް ފާހަގަ ކުރެއްވި އެވެ. އެހެން ނަމަވެސް، ވޯޓުލާން ތިބި ރައްޔިތުންނަށް އެކަން ޤަބޫލު ކުރަން ދަތި ވާނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ.