އެމެރިކާގެ މަގު ތަކުގައި މީހުން މަރުވާ މަންޒަރު ބަލަން ޓްރަމްޕް ބޭނުމެއް ނުވޭ

އެމެރިކާގެ މަގު ތަކުގައި މީހުން މަރުވާ މަންޒަރު ބަލަން އެ ޤައުމުގެ ރައީސް ޑޮނަލްޑް ޓްރަމްޕް ބޭނުންފުޅު ނުވާ ކަމަށް، އެމެރިކާގެ ރިޔާސީ ގަނޑުވަރު ވައިޓް ހައުސް އިން ބުނެފި އެވެ.

އެމެރިކާގެ ފެޑަރަލް އޮފިސަރުން ހޮނިހިރު ދުވަހު ވަނީ އުމުރުން 37 އަހަރުގެ ނަރުހެއް ކަމަށްވާ، އެލެކްސް ޕްރެޓީ މަރާލައިފަ އެވެ. އެކަމާ ގުޅިގެން އެމެރިކާގެ ގިނަ ރައްޔިތުން ތަކެއް ނުރުހުން އަމާޒުވެފައިވާއިރު، ގިނަ ބަޔަކު އަންނަނީ އެކަމުގެ ކަންބޮޑުވުން ފާޅުކޮށް މުޒާހަރާ ކުރަމުންނެވެ.

އެކަމާ ގުޅޭ ގޮތުން ނޫސްވެރިންނާ ވާހަކަ ދައްކަވަމުން ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ވިދާޅުވީ، އެމެރިކާގެ މަގު ތަކުގައި މީހުން މަރުވާ މަންޒަރު ބެލުމަކީ ރައީސް ޓްރަމްޕް ބޭނުންފުޅުވާ ގޮތެއް ނޫން ކަމަށެވެ. އެހެން ނަމަވެސް، އިންތިހާ އަށް ކުށް ކުރާ އަދި ޤާނޫނާ ޚިލާފަށް އުޅޭ މީހުން ފޮނުވާލުމަށް ކުރާ މަސައްކަތަށް ފަސް ޖެހުމެއް ނާންނާނެ ކަމަށް ވެސް އޭނާ ވިދާޅުވެފައިވެ އެވެ. ހޮނިހިރު ދުވަހު ހިނގި މި ހާދިސާ އަކީ، މިނެސޯޓާގައި މި މަހު މަރާލި ދެ ވަނަ މީހާ އެވެ. 

ނޫސްވެރިންނާ ވާހަކަ ދައްކަވަމުން ލެވިޓް ވިދާޅުވީ، ހޮނިހިރު ދުވަހު ހިނގައި ދިޔަ ކަންތައްތަކާ ގުޅޭ ގޮތުން އިތުރަށް ސާފު ކުރަން ޖެހޭ ކަންކަން ހުރި ކަމަށެވެ. ލެވިޓް ވިދާޅުވީ އެ ހާދިސާ ހިނގާފައި ވަނީ  މިނެސޯޓާގައި ޑިމޮކްރެޓުންގެ ލީޑަރުން ގަސްތުގައި ހަފުތާ ތަކެއް ވަންދެން ހެދި ދެކޮޅު ވެރި ކަމުގެ ނަތީޖާގެ ސަބަބުން ހިނގާފައިބާ ހިތާމަވެރި ހާދިސާއެއް ކަމަށެވެ. 

ރޮއިޓާސް އިން ބުނެފައި ވަނީ، ޕްރެޓީ ބިން މައްޗަށް ވައްޓާލާފައި ވަނިކޮށް އޭނާގެ އަތުން ފެނުނީ ފޯނެއް ކަމަށާއި އެއީ ހަތިޔާރެއް ނޫން ކަމަށެވެ. ޕްރެޓީ އަކީ ހަތިޔާރު ގެންގުޅުމުގެ ހުއްދަ ވެސް އޮންނަ މީހަކަށް ވާއިރު، އޮފިސަރުން އޭނާ މަރާލާފައި ވަނީ ހަތިޔާރު ހަމަލާ ދޭން އުޅުނު ކަމަށް ތުހުމަތު ކޮށްފަ އެވެ. ނަމަވެސް، އެއީ ދޮގެއް ކަމަށް ވީޑިއޯ ފުޓޭޖާ ހަވާލާދީ ގިނަ މީޑިއާ ތަކުގައި ވަނީ ބުނެފަ އެވެ. 

ލެވިޓް ވިދާޅުވީ، ޤާނޫނާ ޚިލާފަށް އުޅޭ މީހުން ފޮނުވާލުމާއި، އެމެރިކާ އަކީ އަލުން ސަލާމަތާއި ރައްކާތެރިކަން އޮތް ޤައުމަކަށް ހެދުމަށް ޓްރަމްޕް ކުރައްވާ މަސައްކަތް ހުއްޓާ ނުލައްވާނެ ކަމަށެވެ. އަދި އެކަމުގައި ފަސް ޖެހުމެއް ވެސް ނެތް ކަމަށާއި، އެ މަސައްކަތުގައި ހަރަކާތްތެރިވާ ހުރިހާ ފަރާތްތަކަށް ވެސް މަރުޙަބާ ދަންނަވާ ކަމަށް އޭނާ ވިދާޅުވި އެވެ. 

އެމެރިކާގެ އެކި ސްޓޭޓް ތަކުގައި ޓްރަމްޕްގެ އެންގެވުމަށް މި އޮޕަރޭޝަން ކުރިއަށް ގެންދަމުން އަންނައިރު، އިދިކޮޅު ޑިމޮކްރަޓިކް ޕާޓީ އާއި ގިނަ އާންމުން ވެސް އަންނަނީ އެކަމަށް ފާޑު ކިޔަމުންނެވެ.