ތަރައްގީގެ މަޝްރޫއުތައް ހުއްޓިފައިވާއިރު، ސަރުކާރުގެ ކައުންސިލަރުން ތިއްބަވަނީ ހަނު، މަސައްކަތް ކުރިއަށް ނުދާކަން ހާމަ ވަނީ ރާއްޖެޓީވީގެ ހާލު ކިހިނެއް ޕްރޮގްރާމުން: ވަހީދު

ތަރައްގީގެ މަޝްރޫއުތައް ހުއްޓިފައިވާއިރު، ސަރުކާރުގެ ކައުންސިލަރުން ތިއްބަވަނީ ހަނު ކަމަށާއި، މަސައްކަތް ކުރިއަށް ނުދާކަން ހާމަ ވަނީ ރާއްޖެޓީވީގެ ހާލު ކިހިނެއް ޕްރޮގްރާމުން ކަމަށް އެމްޑީޕީގެ ކައުންސިލް އިންތިޚާބުގެ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވެއްޖެ އެވެ.

ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވަހީދު ވިދާޅުވީ، ރައީސް ޑރ.މުހައްމަދު މުއިއްޒުގެ ސަރުކާރަކީ ކައުންސިލަށް މަލާމަތްކޮށް ފުރައްސާރަ ކުރާ ސަރުކާރެއް ކަމަށާއި، އަގު ވައްޓާލުމުގެ ގޮތުން މިހާރު ވެސް ގިނަ މަސައްކަތްތައް ކޮށްފައިވާ ކަމަށެވެ. ކައުންސިލްގެ މަސައްކަތްތަކާއި، ކުރާ ހަރަދުތަކަކީ ވެސް ބޭކާރު އެއްޗެއްގެ ގޮތުގައި ސިފަ ކޮށްފައިވާ ކަމަށް އޭނާ ވިދާޅުވި އެވެ.

މި ސަރުކާރުން ކައުންސިލްތަކުގެ ބާރު ހަނި ކުރަމުންދާއިރު، އަތޮޅުތެރޭގެ ތަރައްގީގެ މަޝްރޫއުތައް ހުއްޓުވާފައިވާ ކަމަށް ވަހީދު ވިދާޅުވި އެވެ. ނަމަވެސް ސަރުކާރުގެ ކައުންސިލަރުން ތިއްބަވަނީ ހަނު ކަމަށާއި، އެއްވެސް ބަހެއް ރައްޔިތުންގެ ހައްގުގައި ބަހެއް ނުބުނާ ކަމަށެވެ. އަދި ހަގީގަތް ހާމަވެގެން ދަނީ ރާއްޖެޓީވީން ގެނެސްދޭ ހާލު ކިހިނެއް ޕްރޮގްރާމުން ކަމަށް ވަހީދު ވިދާޅުވި އެވެ. 

ކުރީސަރުކާރުން ރާއްޖޭގެ އެކި ރަށްރަށުގައި ފަށާފައި ހުރި މަޝްްރޫއުތައް ކުރިއަށް ނުދޭ. އެހެންނަމަވެސް ސަރުކާރު އޮތް ކައުންސިލްތަކުން އެއާމެދު އެއްވެސް ވާހަކައެއް އެއްވެސް ބަހެއް ނުބުނޭ. އެމްޑީޕީގެ ކައުންސިލަރުން ތިބި ތަންތަނުގައި ރާއްޖެޓީވީގެ ހާލު ކިހިނެއް ޕްރޮގްރާމްގައި ވެސް އަޅުގަނޑުމެންނަށް ފެނިގެން ދަނީ އެތައް ވާހަކަތަކެއް ދައްކާތަން. އެ ޕްރޮޖެކްޓްތައް ނުހިނގާތީ އެކަމުގެ ކަންބޮޑުވުންތައް ފާޅު ކުރަމުންދާތަން. އެހެންނަމަވެސް ސަރުކާރުގެ ކެންޑިޑޭޓުން ސަރުކާރުގެ ކައުންސިލަރުން ތިއްބެވި ތަންތަނުގައި އަޅުގަނޑުމެންނަށް ނުފެނޭ ރައްޔިތުންގެ ހައްގުގައި އެބަސް ބުނާ ތަނެއް. އެވާހަކަ ދައްކާތަނެއް. އެހެންވީމަ ތިބޭފުޅުން ވިސްނަވާ ރައްޔިތުން ވިސްނަވާ ކުރިއަށް އޮތް އިންތިޚާބުގައި ކިހިނެތްތޯ އަމަލު ކުރަނީ.

އެމްޑީޕީގެ ކައުންސިލް އިންތިޚާބުގެ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު

ހާލު ކިހިނެއް ޕްރޮގްރާމް ވަހީދު ފާހަގަކުރެއްވިއިރު، ގިނަ ބައެއްގެ މަގުބޫލުކަން މިޕްރޮގްރާމަށް ވަނީ ލިބިފަ އެވެ. މި ޕްރޮގްރާމުން ރައްޔިތުންގެ ހަގީގީ ކަންބޮޑުވުންތަކާއި، ރަށްރަށުގެ ހާލަތު ވަރަށް ރަނގަޅަށް ގެނެސްދެ އެވެ. އެއާއެކު  ސަރުކާރުން ސިއްރު ކުރުމަށް ނުވަތަ ހަގީގަތް ފޮރުވުމަށް މަސައްކަތް ކުރާ ގިނަ ކަންކަން ރައްޔިތުންނަށް ހާމަވަގެން ދެ އެވެ.

މީގެ އިތުރުން ވަހީދު ވަނީ ރައްޔިތުންގެ ހައްގުގައި ބަސްބުނެ ކަންކަމުގައި ވަކާލާތު ކުރާނެ ބަޔަކަށް ފުރުސަތު ދިނުމަށް ގޮވާލާފަ އެވެ. އަދި އެމްޑީޕީ ކައުންސިލަރުން އިންތިޚާބު ކޮށްގެން ރައްޔިތުންނަށް ދެރައެއް ނުލިބޭނެ ކަމަށާއި، ރައްޔިތުންގެ ހައްގުގައި އަބަދުވެސް މަސައްކަތް ކުރާނެ ކަމަށް އޭނާ ވިދާޅުވި އެވެ.

ނަމަވެސް ސަރުކާރުގެ ކެންޑިޑޭޓުންނަށް އިންތިޚާބު ކޮށްފިނަމަ އެ ކައުންސިލަރުން ޖަވާބުދާރީ ވާނީ ސަރުކާރާއި، ސަރުކާރުގެ ވަޒީރުންނަށް ކަމަށް ވަހީދު ވިދާޅުވި އެވެ. އަދި ކައުންސިލްތައް ހިންގަމުންދާނީ ޕީއެންސީގެ ޖަގަހައިން ކަމަށް އޭނާ ވިދާޅުވި އެވެ.