ބިން ހިއްކުމުގެ މަޝްރޫޢުތައް ކުރިއަށް ގެންދަނީ ތިމާވެށީގެ ޤާނޫނުތަކަށް ގޮންޖެހުމަށް ފަހު، ފާރަވެރިވާ އިދާރާތައް ބިރުވެރިކަމެއްގެ ތެރޭގައި ބައިތިއްބައިގެން: މާޒް ސަލީމް
27 ޖެނުއަރީ 2026 | އަންގާރަ 10:32އެމްޑީޕީގެ މަޖިލިސް މެންބަރު މާޒް ސަލީމް ވިދާޅުވީ ސަރުކާރުން ބިންހިއްކުމުގެ މަޝްރޫޢުތައް ކުރިއަށް ގެންދަނީ އީއާރުއޭގެ ފަންނީ މުވައްޒަފުންނަށް ވަޒީރުގެ ހުއްދައަކާނުލައި ޝަކުވާތައް ނުބެލުމަށް އެންގުމަށް ފަހުގައި ކަމަށް. އަދި އެ މައްސަލަ އޭސީސީ އިން ބަލަން ޖެހޭ ކަމަށް ވިދާޅުވި.
ރައީސުލްޖުމްހޫރިއްޔާ، ރަސްމާލެ ހިއްކާ ސަރަޙައްދަށް ޒިޔާރަތްކުރެއްވުން - 12-11-2025 | ރާއްޖެއެމްވީ
ބިން ހިއްކުމުގެ މަޝްރޫޢުތައް ކުރިއަށް ގެންދަނީ ތިމާވެށީގެ ޤާނޫނުތަކަށް ގޮންޖެހުމަށް ފަހު، ފާރަވެރިވާ އިދާރާތައް ބިރުވެރިކަމެއްގެ ތެރޭގައި ބައިތިއްބައިގެން ކަމަށް އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
އޭނާ އެފަދައިން ވިދާޅުވީ ތިމާވެއްޓަށް ގެއްލުން ލިބޭ ގޮތަށް ސިޔާސީ މަންފާތަކެއް ހޯދުމަށް ބިންހިއްކުމުގެ މަސައްކަތްތައް ސަރުކާރުން ކުރިއަށް ގެންދާތީ އެންޓިކޮރަޕްޝަން ކޮމިޝަން (އޭސީސީ) އަށް މައްސަލަ އެއް ހުށަހެޅުއްވުމަށް ފަހު ރާއްޖެ އެމްވީ އަށް ދެއްވި އިންޓަރވިއު އެވެ.
އޭނާ ވިދާޅުވީ މި ސަރުކާރުން ބިން ހިއްކުމުގެ މަޝްރޫޢުތައް ސަރުކާރުން ހިންގަމުން ގެންދަނީ ތިމާވެށީގެ މިފަދަ ކަންކަމަށް ފާރަވެރިވެ މިފަދަކަންކަން ބަލާ ތަޙުޤީގު ހިންގުމަށް ޤާނޫނުނުން މަތިކޮށްފައިވާ މުއައްސަސާތަކު ގެ ބާރު ކަނޑުވާލުމަށް ފަހު ގަވައިދުތަކަށް ބަދަލު ގެނެސްގެން ކަމަށެވެ. ހަމައެހެންމެ، ތިމާވެށީގެ ކަންކަން ބެލެހެއްޓުމަށް ސަރުކާރުން އުފައްދާފައިވާ އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރުއޭ) ގެ ފަންނީ މުވައްޒަފުން ތިބީ ބިރުވެރިކަމެއްގެ ތެރޭގައި ތާށިކޮށްފައި ކަމަށް ވެސް އޭނާ ވަނީ ވިދާޅުވެފަ އެވެ. އެފަދަ އެއް މިސާލަކީ ރަސްމާލެ ކަމަށް ވެސް ސަލީމް ވިދާޅުވި އެވެ. ރަސްމާލެ ހިއްކަމުންދާ ގޮތުން ތިމާވެއްޓަށް ބޮޑެތި ގެއްލުންތަކެއް ވާއިރު ސަރުކާރުން އެކަމަށް ފަރުވާލެއް ނުބަހައްޓާ ކަމަށް އޭނާ ވިދާޅުވި އެވެ.
"އެމީހުންނަށް އަންގާފައި ވަނީ ތިމާވެށީގެ ކަންކަން ބެލެހެއްޓުމަށް މަތިކޮށްފައިވާ ވަޒީރު ގެ ހުއްދަ ނެތި ޝަކުވާ ތައް ނުބެލުމަށް. އަދި ވަޒީރު އަންގާ ގޮތެއްގެ މަތީން މަޝްރޫއުތަކަށް ހުއްދަ ދެމުން ގެންދިއުމަށް. ތިމާވެށީގެ ކަންކަމަށް ބެލުމެއް ނެތި ހިތު ހުރި ގޮތަކަށް ކަންކަން ކުރިއަށް ގެންދިއުމަށް މި ސަރުކާރުން މަގު ތަނަވަސް ކޮށްދީފައި އޮތުމުގެ ސަބަބުން އިއާދަ ނުކުރެވޭ ވަރުގެ ބޮޑެތި ގެއްލުންތައް ރާއްޖޭގެ ނާޒުކު ތިމާވެއްޓަށް ދަނީ ލިބެމުން. އޭސީސީ އިން މި މައްސަލަ ބަލަން ޖެހޭ." ސަލީމް ވިދާޅުވި އެވެ.
ސަލީމް އިތުރަށް ވިދާޅުވީ އެކަންކަމާ އިހުތިޖާޖު ކުރުމުން ވެސް ސަރުކާރުން އެއްވެސް ފަރުވާލެއް ބެހެއްޓުމެއް ނެތި ބޭނުން ގޮތަކަށް ކަންކަން ކުރަމުންދާ ކަމަށެވެ. ހަދަންޖެހޭ ދިރާސާތައް ފުރިހަމަ ނުކޮށް، އަދި އީއައިއޭ ރިޕޯޓު ހެދިނަމަވެސް ދޭން ޖެހޭ ހުއްދަ އަށް ބެލުމެއްނެތި، އަދި ބައެއް ފަހަރު ޝަރުތު ކޮށްފައިވާ ކަންކަމަށް އެއްވެސް ބެލުމެއްވެސް ނެތި ކަންކަން ކުރަމުންދާ ކަމަށް އޭނާ ވިދާޅުވި އެވެ.
ހަމަ އެހެންމެ ލިބެމުންދާ ގެއްލުންތައް ބަލާ ފިޔަވަޅު އަޅަން އުފައްދާފައިވާ އީއާރުގެ މަސައްކަތައް ސިޔާސީ ނުފޫޒު ފޯރުވާ އެ ތަނުގެ މަސައްކަތްތަކަށް ހުރަސް އަޅަމުންދާ ކަމަށް ސަލީމް ވިދާޅުވި އެވެ. އެއްވެސް ރިޕޯޓެއް ނުހަދާ އެމަސައްކަތްތައް ހިންގުމުގެ ނަތީޖާއަކީ އަގުބޮޑު ޑައިވް ސައިޓްތައް މުޅިން ހަލާކުވެެގެން ދިއުން ކަމަށް ވެސް ސަލީމް ވިދާޅުވި އެވެ. ތިމާވެށި ރަށްކާތެރިކޮށް ދެމެހެއްޓުމާބެހޭ ޤާނޫނު އާއި ޚިލާފަށްކަމަށް ވާތީއާއި އަދި އަވަސްއަރުވާލައިގެން ތިމާވެއްޓަށް މިވަރުގެ ބޮޑު ގެއްލުމެއް ދީގެން ބިންހިއްކަން ޖެހޭ ޙާލަތެއް ނެތް ކަމަށް އޭނާ ވިދާޅުވި އެވެ.
