ކައުންސިލް އިންތިހާބާ ދިމާކޮށް ކުރީގެ މައްސަލައެއްގައި އަނެއްކާވެސް ޒާޔާ ފުލުހަށް ހާޒިރު ކުރަނީ
27 ޖެނުއަރީ 2026 | އަންގާރަ 13:41މި މައްސަލާގައި މީގެ ކުރިން ވެސް ސުވާލުކޮށް ބަޔާން ނަގައި ފޯނު އަތުލައި ޕާސްވޯޑް ތައްވެސް އަތުލާފައިވާތީ އަލުން ހާޒިރުކުރަން ޖެހޭ ސަބަބެއް ނެތް ކަމަށް ޒާޔާ ވިދާޅުވި އެވެ. އިންތިހާބުގައި ވާދަކުރާތީ ހުރަސްއަޅަން މަސައްކަތްކުރާ ކަމަށާއި ފަހަތަށް ނުޖެހޭނެ ކަމަށް ޒާޔާ ފާހަގަކުރެއްވި.
ޒާޔާ | އެކްސް
ލޯކަލް ކައުންސިލް އިންތިހާބާ ދިމާކޮށް 4 މަސް ކުރީގެ މައްސަލައެއްގައި ސުވާލުކުރަން ކަމަށް ބުނެ އެމްޑީޕީގެ ގައުމީ މަޖިލީހުގެ މެމްބަރު ފާތިމަތު ޒާޔާ ފުލުހަށް ހާޒިރުވުމަށް އަންގާ ޗިޓް ފޮނުވައިފި އެވެ.
ފުލުހުން ޒާޔާ އަށް ފޮނުވި ޗިޓް ގައި މައްސަލައިގެ ހުލާސާގައި ބުނެފައިވަނި، ޒާޔާ ފުލުހަށް ހާޒިރު ކުރަނީ 2025 އޮކްޓޯބަރު 4 ވަނަ ދުވަހުގެ 23:08 ހާއިރު ފޭސްބުކްގައި ޒާޔާ ފާތިމަތު ގެ ނަމުގައި ހިންގަމުންގެންދާ އެކައުންޓަކުން ދިވެހި ފުލުހުންނަށް އިންޒާރު ދީފައިވާ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް ކަމަށެވެ.
މި މައްސަލާގައި މީގެކުރިން ވަނީ ކޯޓު އަމުރެއްގެ ދަށުން ޒާޔާގެ ފޯނު ފުލުހުން އަތުލާފަ އެވެ. އަދި ހަމަ އެ ދުވަހު އިރު އޮއްސުނު ފަހުން ގަލޮޅު ފުލުހަށް ހާޒިރު ކޮށް އިތުރު ކޯޓު އަމުރެއްގެ ދަށުން ފޯނުގެ ޕާސްވޯޑް ވެސް ވަނީ އަތުލާފަ އެވެ. އެ ދުވަހު ކަންހިނގާ ދިޔަގޮތް ހާމަކުރައްވާ ޒާޔާ ވިދާޅުވީ ފަނަރަ ވަރަކަށް ފުލުހުންގެ ފައުޖަކުން އައިސް ޒާޔާ ގާތު ވަރަށް ހަރުކަށި ކޮށް ސައިކަލުން ފައިބަން އެންގި ކަމާށާއި އަދި ބަލާ ފާސް ކުރަން ބޭނުންވާ ކަމަށް ބުނި ކަމަށެވެ.
ހަމަ އެ މައްސަލާގައި އަނެއްކާވެސް އަންނަ ބުދަ ދުވަހު ޒާޔާ ފުލުހަށް ހާޒިރު ވުމަށް އެންގުމާއި ގުޅިގެން ޒާޔާ ރާއްޖެ އެމްވީ އަށް ވިދާޅުވީ، މި މައްސަލާގައި މީގެ ކުރިން ވެސް ސުވާލުކޮށް ބަޔާން ނަގާފައިވާ ކަމަށާއި އަނެއްކާވެސް ހަމަ އެއް މައްސަލައެއްގައި ފުލުހަށް ހާޒިރު ކުރަންޖެހޭ ސަބަބެއް ނޯންނާނެ ކަމަށެވެ. އަދި އޭރު ފުރިހަމަ އެއްބާރުލުން ދީފައިވާނެ ކަމަށް ޒާޔާ ވިދާޅުވި އެވެ.
މީގެ އެތައް މަސްދުވަހެއް ކުރިން ބަލަންފެށި މައްސަލައެއް އަނެއްކާ އަލުން ފަށައިގެން މައްސަލަ ބަލަން މިއުޅޭނީ އަޅުގަނޑު ކައުންސިލް އިންތިހާބު ގައި ވާދަ ކުރާތީ ހުރަސް އެޅުމުގެ ގޮތުން. އެއުޅެނީ ރައްޔިތުން އަޅުގަނޑާ ދޭތެރޭ ދެކޭގޮތް ބަދަލުކުރަން. ފަހަތަކަށް ނުޖެހޭނަން.އެމްޑީޕީގެ ގައުމީ މަޖިލީހުގެ މެމްބަރު ފާތުމަތު ޒާޔާ
ޒާޔާ ވިދާޅުވީ، ބިރުދައްކައިގެން ފަހަތަށް ޖައްސަން އުޅުނަސް ފަހަތަށް ނުޖެހޭނެ ކަމަށެވެ. އަދި ފޭސްބުކް ގައި ޒާޔާ ކުރި ޕޯސްޓުގެ މައްސަލަ ބަލަނީ ވައްކަމާއި ޚިޔާނާތުގެ މައްސަލަ ބަލާ ޑިޕާޓްމަންޓުން ކަމަށް ޒާޔާ ވިދާޅުވި އެވެ.
މި މައްސަލާގައި މީގެ ކުރިން ފުލުހުން އަމަލުކޮށްފައިވާގޮތް ހާމަ ކުރައްވާ ޒާޔާ ވިދާޅުވީ، ދަރިފުޅާ އެކު ހުއްޓާ އަންގި ލައްވައިގެން ތިބި ފުލުހުން ޒާޔާ މަޑު ކުރުމަށްފަހު ހަށިގަނޑާއި، ދަބަހާއި، ސައިކަލު ގެ މަޑިދަށަށް ދަންދެން ބަލާ ފާސް ކުރި ކަމަށެވެ. ޒާޔާ ފާހަގަ ކުރި ގޮތުގައި އެ ދުވަހު ފުލުހުން ކަންތައް ކުރި ގޮތުން ކައިރީގައި ހުރި ދަރިފުޅަށް ނަފްސާނީ ގޮތުން އަސަރު ކުރާނެ ކަމަށް ގަބޫލު ކުރާ ކަމަށެވެ.
