ކައުންސިލް އިންތިހާބަށް އެތައް ބަޔަކަށް ކުރިމަތި ނުލެވިދާނެ ކަމުގެ ބިރު ހީވެ، މައްސަލަތައް ހައްލުކޮށްދިނުމަށް އެމްޑީޕީ އިން ގޮވާލައިފި
27 ޖެނުއަރީ 2026 | އަންގާރަ 13:11އިންތިހާބަށް ކުރިމަތިލުމަށް އީސީ އިން ދީފައިވާ މުއްދަތު ކުރުވުމުން ކެންޑިޑޭޓުންނަށް ދަތިތައް ކުރިމަތިވާ ކަމަށް އެހެން ސިޔާސީ ޕާޓީތަކުން ވެސް ދަނީ ބުނަމުން. އަދި އޮންލައިންކޮށް އެކަނި އިންތިޚާބަށް ކުރިމަތިލެވުމަކީ ކެންޑިޑޭޓުން ގެ ބޮޑު ކަންބޮޑުވުމެއް.
އެމްޑީޕީ އެމްބަރުން ހިނގާލުމެއްގެ ތެރެއިން | ރާއްޖެއެމްވީ
އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބަށް ކުރިމަތިލުމުގައި ކެންޑިޑޭޓުންނަށް ދިމާވާ ދަތިތަކާ ގުޅިގެން އިންތިހާބަށް އެތައް ބަޔަކަށް ކުރިމަތި ނުލެވިދާނެ ކަމުގެ ބިރު ހީވެފައި ވާތީ، އެ މައްސަލަތަކަށް ހައްލު ހޯދާ ދިނުމަށް، އިދިކޮޅު އެމްޑީޕީން ގޮވާލައިފި އެވެ.
އެކްސްގައި ކުރި ޕޯސްޓެއްގައި، އެމްޑީޕީން ބުނީ އިންތިހާބަށް ކުރިމަތިލުމަށް އިލެކްޝަންސް ކޮމިޝަނުން ދީފައިވާ މުއްދަތަކީ ކުރު މުއްތަކަށް ވުމުން ވަރަށް ގިނަ ދަތިތަކާއި ކުރިމަތިވާ ކަމަށެވެ. ކެނޑިޑޭޓުންގެ ރިކޯޑު ސާފުކުރުމާއި އެހެނިހެން ކަންކަން ފުރިހަމަކުރަން ދުވަސް ނަގާކަން އެ ޕާޓީ އިން ފާހަގަކުރެ އެވެ. އެހެންކަމުން އިލެކްޝަނުން އިންތިހާބަށް ކުރިމަތިލާން ދިނީ އެކަށީގެންވާ މުއްދަތެއް ނޫން ކަމަށް އެމްޑީޕީން ބުނެ އެވެ.އެހެންކަމުން އެމްޑީޕީ ގެ ކެންޑިޑޭޓުންނަށް އިންތިޚާބުގައި ވާދަކުރުމަށް ކުރިމަތިވާ ދަތިތައް ހައްލުކޮށްދިނުމަށް އީސީ އަށް އެމްޑީޕީ އިން ވަނީ ގޮވާލާފަ އެވެ.
އިންތިހާބަށް ކުރިމަތިލުމަށް ދީފައިވާ މުއްދަތު ކުރުވުމުން، މެނުއަލްކޮށް އިންތިޚާބަށް ކުރިމަތިލުމުގެ ފުރުސަތު ދިނުމަށާއި، 24 ގަޑިއިރު އޮންލައިންކޮށް އިންތިހާބަށް ކުރިމަތިލެވޭ ގޮތް ހަމަޖައްސާދިނުމަށް އެމްޑީޕީ އިން މީގެ ކުރިން ގޮވާލި އެވެ. މި މައްސަލަ އާއި މެދު އެެހެން ޕާޓީތަކުގެ ކަންބޮޑުވުން ވެސް އެބަހުއްޓެވެ. މީގެ އިތުރުން ކައުންސިލް އިންތިހާބަށް ވާދަކުރާ ކެންޑިޑޭޓުންގެ ކަންކަން ހަމަ އެކަނި އީފާސް މެދުވެރިކޮށް ކުރަން މަޖުބޫރު ކޮށްފައި ވާތީ، ޕީއެންއެފް އިން އިލެކްޝަންސް ގެ މައްޗަށް ދައުވާ ކުރުމަށް ވަނީ ނިންމާފަ އެވެ.
ކައުންސިލް އިންތިހާބަށް ވާދަކުރާ ކެނޑިޑޭޓުންގެ ކަންކަން ހަމަ އެކަނި އީފާސް މެދުވެރިކޮށް ކުރަން މަޖުބޫރު ކޮށްފަވާތީ، ޕީއެންއެފް އިން އިލެކްޝަންސް ގެ މައްޗަށް ދައުވާކޮށްފި
އީސީ އިން ލޯކަލް ކައުންސިލް އިންތިޚާބާއި ޑަބްލިއުޑީސީ އިންތިހާބަށް ކުރިމަތިލުމުގެ ފުރުސަތު ހުޅުވާލާފައި ވަނީ ފެބްރުއަރީ 1 ވަނަ ދުވަހުގެ 15:00 އާއި ހަމައަށެވެ. މި އިންތިޚާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރުމަށް ވަނީ ހަމަޖެހިފަ އެވެ.
