ޣަފޫރުގެ ޗެލެންޖެއް ސަރުކާރަށް: "ޑޮލަރުގެ ދަތިކަން ދިމާވަނީ ޑޮލަރު ނެތިގެނެއް ނޫން، ހިސާބުތަކުން އެކަން ދައްކާނަން"
25 ޖެނުއަރީ 2026 | އާދީއްތަ 13:18400 މިލިއަން ޑޮލަރުގެ ޕްރޮޖެކްޓްތައް ބޭރުގެ ކުންފުނިތަކަށް ދިނުމުން ޑޮލަރު ރާއްޖެއިން ބޭރަށް ދާކަމަށާއި މި ސަރުކާރަކީ ވަގު ސަރުކާރެއް ކަމަށް ޣަފޫރު ވަނީ ވިދާޅުވެފަ.
ރައީސް ޑރ.މުހައްމަދު މުއިއްޒު އަދި އެމްޑީޕީގެ ވަގުތީ ޗެއަރޕަރސަން އަބްދުލް ޣަފޫރު މޫސާ | ރާއްޖެއެމްވީ ގްރެފިކްސް
ޑޮލަރުގެ ދަތިކަން ދިމާ ވަނީ ރާއްޖޭގައި ޑޮލަރު ނެތިގެން ނޫންކަން ހިސާބުން ސާބިތުކޮށްދޭނެ ކަމަށް އެމްޑީޕީގެ ވަގުތީ ޗެއަރޕަރސަން އަބްދުލް ޣަފޫރު މޫސާ ވިދާޅުވެއްޖެ އެވެ.
ޣަފޫރު އެފަދައިން ވިދާޅުވީ އެމްޑީޕީން ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަދައްކަވަމުންނެވެ.
ޑޮލަރުގެ އެވްރެޖް ރޭޓަށް ބަލާ ނަމަ، މިއަދު ރާއްޖޭގައި ޑޮލަރު ލިބެން ހުރީ 20.25 ލާރި އަށް ކަމަށް ޣަފޫރު ވަނީ ވިދާޅުވެފަ އެވެ. 2025 ވަނަ އަހަރަކީ ރާއްޖޭގެ މާލިއްޔާ އަށް އެންމެ ގިނައިން ބޭރު ފައިސާ ރާއްޖެ އަށް ވަތް އަހަރު ކަމަށާއި ޑޮލަރުގެ ނިސްބަތް އެ މިންވަރުގައި ހުންނަން ޖެހޭ މަގުބޫލު އެއްވެސް ސަބަބެއް ނެތް ކަމަށް ޣަފޫރު ވަނީ ވިދާޅުވެފަ އެވެ.
400 މިލިއަން ޑޮލަރުގެ ޕްރޮޖެކްޓް ހުރީ ރާއްޖެ އިން ބޭރުގެ ކުންފުނިތަކަށް ދީފައި ކަމަށާއި އެކަމުގެ ސަަބުން ރާއްޖެ އިން ބޭރަށް ޑޮލަރު ދާ ކަމަށް ވެސް އޭނާ ވަނީ ވިދާޅުވެފަ އެވެ. އޭނާ ވިދާޅުވީ ޑޮލަރު ގެ ދަތިކަން ދިމާވަނީ ޑޮލަރު ނެތިގެން ނޫން ކަމަށާއި އެ ކަން ހިސާބުތަކުން ދައްކާނެ ކަމަށެވެ.
"20 ރުފިޔާ 20 ލާރިއަށް ޑޮލަރަށް އަރަން ޖެހުނު ސަބަބު އަޅުގަނޑު މި ކިޔާދެނީ. ބެންކް އޮފް މޯލްޑިވްސްގައި ހުރި ރައްޔިތުންގެ ޑޮލަރާއި، ސަރުކާރުގެ ޑޮލަރާއި، މާރުކޮށްގެން ލިބޭ ޑޮލަރުގެ ތެރެއިން 400 މިލިއަން ޑޮލަރުގެ ޕްރޮޖެކްޓް ރާއްޖެ އިން ބޭރުގެ ކުންފުންޏަށް ދީ އެ ފައިސާ ދަނީ ރާއްޖެ އިން ބޭރުކުރަމުން. އެމްއޭސީއެލް އަށް ލިބޭ ޑޮލަރު ރަސްމާލެ ހިއްކައިގެން ދަނީ ބޭރު ކުރަމުން. ރާއްޖޭގެ މި އޮތް ޑޮލަރުގެ ދަތިކަމަކީ މި ސަރުކާރުން ދޭ އަނިޔާ." ޣަފޫރު ވިދާޅުވި އެވެ.
މީގެ އިތުރުން، މި ސަރުކާރަކީ ވަގު ސަރުކާރެއް ކަމަށް ވެސް އޭނާ ވަނީ ސިފަކުރައްވާފަ އެވެ. މި ސަރުކާރުން ކުރާހާ ވެސް ކަމަކީ ޑިމޮކްރަސީގެ ނަމުގައި ރާއްޖޭ ގެ ޑިމޮކްރަސީ ގެ ނިޒާމް ހަލާކުކުރުން ކަމަށް އޭނާ ވިދާޅުވި އެވެ. ޣަފޫރު ވަނީ ވިދާޅުވެފަ އެވެ.
