ކައުންސިލް އިންތިޚާބުގައި މާލެސިޓީ ކައުންސިލަށް ވާދަ ކުރާ އެމްޑީޕީގެ ކެންޑިޑޭޓުންނާ ކުރީގެ ރައީސް ސޯލިހު ބައްދަލު ކުރައްވައިފި
28 ޖެނުއަރީ 2026 | ބުދަ 04:11އެމްޑީޕީން ބުނީ، މި ބައްދަލު ކުރެއްވުމުގައި އެމްޑީޕީގެ ޓިކެޓުގައި މާލެ ސިޓީ ކައުންސިލަށް ވާދަކުރާ ކެނޑިޭޓުންނާއި، ރައީސް ސޯލިހު ބައްދަލު ކުރައްވައި ހިއްވަރު ދެއްވާފައިވާ ކަަމަށް. އަދި އިންތިޚާބާ ގުޅޭގޮތުންނާއި، ކެންޕޭން ކުރިއަށްދާ ގޮތާ ގުޅޭ ގޮތުން މަޝްވަރާ ކުރެއްވި ކަމަށް.
ލޯކަލް ކައުންސިލް އިންތިޚާބުގައި މާލެސިޓީ ކައުންސިލަށް ވާދަ ކުރާ އެމްޑީޕީގެ ކެންޑިޑޭޓުންނާ ކުރީގެ ރައީސް އިބްރާހިމް މުހައްމަދު ސޯލިހު ބައްދަލު ކުރެއްވުން | ރާއްޖެއެމްވީ
ކުރިއަށް އޮތް ލޯކަލް ކައުންސިލް އިންތިޚާބުގައި މާލެސިޓީ ކައުންސިލަށް ވާދަ ކުރާ އެމްޑީޕީގެ ކެންޑިޑޭޓުންނާ ކުރީގެ ރައީސް އިބްރާހިމް މުހައްމަދު ސޯލިހު ބައްދަލު ކުރައްވައިފި އެވެ.
މި ބައްދަލު ކުރެއްވުން އޮތީ އަންގާރަ ދުވަހުގެ ރޭގެ ވަގުތެއްގަ އެވެ.
އެމްޑީޕީން ބުނީ، ކުރިއަށް އޮތް ލޯކަލް ކައުންސިލް އިންތިޚާބު އަދި އަންހެނުންގެ ތަރައްގީ އަށް މަސައްކަތްކުރާ ކޮމެޓީ އަށް އެމްޑީޕީގެ ޓިކެޓުގައި މާލެ ސިޓީ ކައުންސިލަށް ވާދަކުރާ ކެނޑިޭޓުންނާއި، ރައީސް ސޯލިހު ބައްދަލު ކުރައްވައި ހިއްވަރު ދެއްވާފައިވާ ކަަމަށެވެ. އަދި އިންތިޚާބާ ގުޅޭގޮތުންނާއި، ކެންޕޭން ކުރިއަށްދާ ގޮތާ ގުޅޭ ގޮތުން މަޝްވަރާ ކުރެއްވި ކަމަށެވެ.
ކައުންސިލް އިންތިޚާބަށް ތައްޔާރުވުމުގެ މަސައްކަތްތައް ކުރަމުންދާއިރު، އެމްޑީޕީން އަންނަ މަހު 12، ގައި އިންތިޚާބުގެ ކެމްޕެއިން ލޯންޗު ކުރުމަށް ވަނީ ނިންމާފަ އެވެ.
މީގެ އިތުރުން އިންތިޚާބާ ގުޅިގެން ހުރި ބައެއް ކަންބޮޑުވުންތަކާ ގުޅިގެން އެ ޕާޓީން ވަނީ އެމައްސަލަތައް ހައްލު ކޮށްދިނުމަށް އިލެކްޝަން ކޮމިޝަނަށް ގޮވާލާފަ އެވެ.
އެގޮތުން ކައުންސިލް އަދި ޑަބްލިއުޑީސީ އަށް ވާދަކުރާ ކެންޑިޑޭޓުންގެ ފޯމު މެނުއަލްކޮށް ވެސް ބަލައިގަތުމަށާއި، އިންތިޚާބަށް އެތައް ބަޔަކަށް ކުރިމަތި ނުލެވިދާނެ ކަމުގެ ބިރު ހީވެ، މައްސަލަތައް ހައްލުކޮށް ދިނުމަށް އެ ޕާޓީން ގޮވާލާފައިވެ އެވެ.
އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ދީފައިވާ މުއްދަތަކީ ކުރު މުއްތަކަށް ވުމުން ވަރަށް ގިނަ ދަތިތަކާއި ކުރިމަތިވާ ކަމަށް އެމްޑީޕީން ބުނެފައިވެ އެވެ.
ކައުންސިލް އިންތިޚާބަށް ކުރިމަތިލުމުގެ ފުރުސަތު ހުޅުވާލީ 17 ޖެނުއަރީން ފެށިގެން 01 ފެބްރުއަރީ، ވާ އާދީއްތަ ދުވަހުގެ 15:30 ގެ ނިޔަލަށް ކަމަށެވެ.
މި ފަހަރުގެ އިންތިޚާބު ގައި ކައުންސިލްތަކުގެ ޖުމްލަ 225 ދާއިރާއަކަށް މެންބަރުން އިންތިޚާބު ކުރަން ޖެހެ އެވެ. ލޯކަލް ކައުންސިލްތަކަށް 678 މެންބަރުން އިންތިޚާބު ކުރަންޖެހޭއިރު، އަންހެނުންގެ ތަރައްގީ އަށް މަސައްކަތްކުރާ ކޮމެޓީތަކަށް 678 މެންބަރުން އިންތިޚާބު ކުރަންޖެހެ އެވެ.
އެހެންކަމުން މިފަހަރުގެ އިންތިޚާބުގައި ޖުމްލަ 1356 މެންބަރުން އިންތިޚާބު ކުރާނެ ކަމަށް އިލެކްޝަން ކޮމިޝަނުން ބުނެ އެވެ.
