ކުރީގެ މައްސަލައެއްގައި ޒާޔާ ފުލުހަށް ހާޒިރުވާން ފޮނުވި ޗިޓު ކެންސަލް ކޮށްފި
28 ޖެނުއަރީ 2026 | ބުދަ 08:00ލޯކަލް ކައުންސިލް އިންތިހާބުގައި ހުޅުމާލޭ އުތުރަށް އެމްޑީޕީން ވާދަކުރާ ޒާޔާ އަށް ފުލުހުން ފޮނުވި ޗިޓު ކެންސަލް ކޮށްފި. ފޭސްބުކުން ފުލުހުންނަށް އިންޒާރު ދިން މައްސަލައިގައި ބަޔާން ނަގަން ބުދަ ދުވަހު ހާޒިރުވުމަށް އަންގާފައި އޮތް ނަމަވެސް އަލުން ވަރަށް އަވަހަކަށް ޗިޓު ފޮނުވާނެ ކަމަށް ފުލުހުން ބުނެފައިވޭ. މީގެ ކުރިން ކޯޓު އަމުރުގެ ދަށުން ޒާޔާގެ ފޯނާއި ޕާސްވޯޑް އަތުލާފައި ވޭ.
އެމްޑީޕީގެ ގައުމީ މަޖިލީހުގެ މެމްބަރު ފާތިމަތު ޒަހިއްޔާ (ޒާޔާ) އެމްޑީޕީގެ ހަރަކާތްތެއްގައި ބައިވެރިވެވަޑަިއގަންނަނަވަނީ | ރާއްޖެއެމްވީ
ލޯކަލް ކައުންސިލް އިންތިހާބާ ދިމާކޮށް 4 މަސް ކުރީގެ މައްސަލައެއްގައި ސުވާލުކުރަން ކަމަށް ބުނެ އެމްޑީޕީގެ ގައުމީ މަޖިލީހުގެ މެންބަރު ފާތިމަތު ޒަހިއްޔާ (ޒާޔާ) ފުލުހަށް ހާޒިރުވުމަށް އަންގާ، ފޮނުވި ޗިޓު ކެންސަލްކޮށްފި އެވެ.
ކުރިއަށް އޮތް ލޯކަލް ކައުންސިލް އިންތިޚާބުގައި ހުޅުމާލޭ އުތުރު ދާއިރާއަށް އެމްޑީޕީގެ ޓިކެޓްގައި ވާދަކުރާ ޒާޔާ އަށް އަންގާރަ ދުވަހު ފުލުހުން ވަނީ ޗިޓެއް ފޮނުވާފަ އެވެ. ފުލުހުން ޒާޔާ އަށް ފޮނުވި ޗިޓް ގައި މައްސަލައިގެ ހުލާސާގައި ބުނެފައިވަނީ، ޒާޔާ ފުލުހަށް ހާޒިރު ކުރަނީ 2025 އޮކްޓޯބަރު 4 ވަނަ ދުވަހުގެ 23:08 ހާއިރު ފޭސްބުކްގައި ޒާޔާ ފާތިމަތު ގެ ނަމުގައި ހިންގަމުންގެންދާ އެކައުންޓަކުން ދިވެހި ފުލުހުންނަށް އިންޒާރު ދީފައިވާ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް ކަމަށެވެ.
އެހެން ކަމުން ބުދަ ދުވަހުގެ މެންދުރު 2:00 އަށް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވުމަށް އޭނާ އަށް ވަނީ އަންގާފަ އެވެ.
ނަމަވެސް ބުދަ ދުވަހު ސޯޝަލް މީޑީއާ ގައި ކުރި ޕޯސްޓެއްގައި ޒާޔާ ވިދާޅުވީ އޭނާ ފުލުހަށް ހާޒިރު ވުމަށް ފޮނުވި ޗިޓު ކެންސަލް ކޮށްފައިވާ ކަމަށާ އެ ބަޔާން ނަގަން އަނެއްކާ ވެސް ވަރަށް އަވަހަކަށް ޗިޓު ފޮނުވާނެ ކަމަށް ފުލުހުން އޭނާ އަށް ގުޅުމަށްފަހު ބުނެފައިވާ ކަމަށެވެ.
މި މައްސަލާގައި މީގެ ކުރިން ވަނީ ކޯޓު އަމުރެއްގެ ދަށުން ޒާޔާގެ ފޯނު ފުލުހުން އަތުލާފަ އެވެ. އަދި ހަމަ އެ ދުވަހު އިރު އޮއްސުނު ފަހުން ގަލޮޅު ފުލުހަށް ހާޒިރު ކޮށް އިތުރު ކޯޓު އަމުރެއްގެ ދަށުން ފޯނުގެ ޕާސްވޯޑް ވެސް ވަނީ އަތުލާފަ އެވެ. އެ ދުވަހު ކަންހިނގި ގޮތް ހިއްސާކޮށް ޒާޔާ ވިދާޅުވެފައި ވަނީ 15 ވަރަކަށް ފުލުހުންގެ ފައުޖަކުން އައިސް ޒާޔާ ގާތު ވަރަށް ހަރުކަށި ކޮށް ސައިކަލުން ފައިބަން އެންގި ކަމާށާއި އަދި ބަލާ ފާސް ކުރަން ބޭނުންވާ ކަމަށް ބުނި ކަމަށެވެ.
ޒާޔާ ވިދާޅުވީ، ބިރުދައްކައިގެން ފަހަތަށް ޖައްސަން އުޅުނަސް ފަހަތަށް ނުޖެހޭނެ ކަމަށެވެ. އަދި ފޭސްބުކް ގައި ޒާޔާ ކުރި ޕޯސްޓުގެ މައްސަލަ ބަލަނީ ވައްކަމާއި ޚިޔާނާތުގެ މައްސަލަ ބަލާ ޑިޕާޓްމަންޓުން ކަމަށް ޒާޔާ ވިދާޅުވި އެވެ.
މި މައްސަލާގައި މީގެ ކުރިން ފުލުހުން އަމަލުކޮށްފައިވާގޮތް ހާމަ ކުރައްވާ ޒާޔާ ވިދާޅުވީ، ދަރިފުޅާ އެކު ހުއްޓާ އަންގި ލައްވައިގެން ތިބި ފުލުހުން ޒާޔާ މަޑު ކުރުމަށްފަހު ހަށިގަނޑާއި، ދަބަހާއި، ސައިކަލު ގެ މަޑިދަށަށް ދަންދެން ބަލާ ފާސް ކުރި ކަމަށެވެ. ޒާޔާ ފާހަގަ ކުރި ގޮތުގައި އެ ދުވަހު ފުލުހުން ކަންތައް ކުރި ގޮތުން ކައިރީގައި ހުރި ދަރިފުޅަށް ނަފްސާނީ ގޮތުން އަސަރު ކުރާނެ ކަމަށް ގަބޫލު ކުރާ ކަމަށެވެ.
