ކައުންސިލް އިންތިޚާބަށް ސަރުކާރުން ނުފޫޒު ފޯރުވަމުންދާއިރު، އޭސީސީއަށް އެ މަންޒަރެއް ނުފެނޭ: ވަހީދު
ވަހީދު ވިދާޅުވީ އީސީން މަސައްކަތް ކުރަމުންދަނީ ސަރުކާރުގެ ކެންޑިޑޭޓުންނަށް ފަސޭހައިން ކަންކަން މަގުފަހިވާ ގޮތަށް ކަމަށް. އަދި އިންތިޚާބާ ގުޅިގެން ގޯއްޗާއި، ފްލެޓު ދިނުމުގެ އިތުރުން ވަޒީފާތައް ބަހަމުންދާއިރު، ކޮރަޕްޝަނާއި، ނުފޫޒު ހުއްޓުވުމަށް ކަމާގުޅުން ހުރި އެއްވެސް މުއައްސަސާއަކުން އަދި އިދާރާއަކުން މަސައްކަތް ނުކުރާ ކަމަށް އޭނާ ވިދާޅުވި.
އެންޓި ކޮރަޕްޝަން ކޮމިޝަން ހުންނަ އިމާރާތް | ރާއްޖެއެމްވީ
ކުރިއަށް އޮތް ލޯކަލް ކައުންސިލް އިންތިޚާބަށް ރައީސް ޑރ.މުހައްމަދު މުއިއްޒުގެ ސަރުކާރުން ނުފޫޒު ފޯރުވަމުންދާ ކަމަށާއި، އެމަންޒަރު އެންޓި ކޮރަޕްޝަން ކޮމިޝަން (އޭސީސީ) އަށް ނުފެންނަ ކަމަށް އެމްޑީޕީގެ ކައުންސިލް އިންތިޚާބުގެ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވެއްޖެ އެވެ.
ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވަހީދު ވިދާޅުވީ، މިސަރުކާރުގެ ބޭފުޅުން އިންތިޚާބާ ގުޅިގެން ދައްކަމުންދާ ވާހަކަތަކާއި، ކައުންސިލް އިންތިޚާބުގައި ސަރުކާރުގެ ފަރާތުން ވާދަކުރާ ޕީއެންސީގެ ހުރިހާ ކެންޑިޑޭޓުން ފޯމް ވައްދާނެކަމުގެ ޔަގީންކަން މިހާރު ދީފައިވާއިރު، ކުރަމުންދާ މަސައްކަތްތަކުން ވަރަށް ބޮޑަށް އިންތިޚާބަށް ނުފޫޒު ފޯރުވަމުންދާ މަންޒަރު ފެންނަ ކަމަށެވެ.
އީސީގެ "މައި ޕޯޓަލް" އަށް ޕީއެންސީ އަށް އެކްސަސް އޮބައޮތްކަން ފާހަގަކުރައްވައި ވަހީދު ވިދާޅުވީ ކޮމިޝަނުން އެކަން ދޮގުކޮށް، އެކްސަސް އޮންނަނީ ހުއްދަ އޮތް ފަރާތްތަކަށް ކަމަށް ބުނި ނަމަވެސް އެބޭފުޅުންގެ ހުއްދައާއެކު، ޕީއެންސީން ޕޯޓަލްއަށް އެކްސަސް ވަމުންދާ ކަމަށެވެ.
ވަހީދު ވިދާޅުވީ އީސީން މަސައްކަތް ކުރަމުންދަނީ ސަރުކާރުގެ ކެންޑިޑޭޓުންނަށް ފަސޭހައިން ކަންކަން މަގުފަހިވާ ގޮތަށް ކަމަށެވެ. އަދި މިނިވަން އިންސާފުވެރި އިންތިޚާބަކަށް ޖާގަ ނުދިނުމަށް ކުރަންޖެހޭ މަސައްކަތްތައް ސަރުކާރުން ކުރަމުންދާ ކަމަށް އޭނާ ވިދާޅުވި އެވެ.
އެގޮތުން އިންތިޚާބާ ގުޅިގެން ގޯއްޗާއި، ފްލެޓު ދިނުމުގެ އިތުރުން ވަޒީފާތައް ބަހަމުންދާ ކަމަށް ވަހީދު ވިދާޅުވި އެވެ. ނަމަވެސް ސަރުކާރުން މި އިންތިޚާބަށް ނުފޫޒު ފޯރުވުމަށް ހިންގާ އެއްވެސް ކަމެއް ކަމާގުޅުން ހުރި އެއްވެސް އިދާރާއަކަށް އަދި މުއައްސަސާއަކަށް ނުފެންނަ ކަމަށާއި، ކޮރަޕްޝަން ހުއްޓުވުމަށް މަސައްކަތް ކުރަން ޖެހޭ އޭސީސީއަށް ވެސް އެ މަންޒަރު ނުފެންނަ ކަމަށް ވަހީދު ވިދާޅުވި އެވެ.
މި އިންތިޚާބަށް ވާންޖެހޭ ފުރިހަމަ ތައްޔާރީ އުސޫލެއް ރޭވުމެއްގެ ތެރެއިން އިންތިޒާމެއްގެ ތެރެއިން މިދަނީ ކުރަމުން. ނަމަވެސް ސަރުކާރުގެ ޕާޓީގެ ތެރެއިން މިފެންނަނީ ނުފޫޒާ ބާރުގެ ބޭނުން ކޮށްގެން އިންތިޚާބު ކާމިޔާބު ކުރުމަށް މަސައްކަތް ކުރާ މަންޒަރު. ސަރުކާރުން މިއިންތިޚާބު ކާމިޔާބު ކުރުމަށްޓަކައި އެތައް ނުފޫޒެއް އެބަ ބޭނުން ކުރޭ. އިންތިޚާބާ ދިމާކޮށް ގޯއްޗާއި، ފްލެޓު ދިނުމަށް އެބަ މަސައްކަތް ކުރޭ. އަދި އެތައް ސަތޭކަ ވަޒީފާއެއްގެ ފުރުސަތު ހުޅުވާލައިފި. އެހެންވީމަ މިއިން އެއްވެސް ބެލޭނެ އެއްވެސް މުއައްސަސާއެއް މިރާއްޖޭގައި ނެތް. ލާމަރުކަޒީ ގާނޫނަށް މާލީ ބާރުވެރިކަން ހަނި ކުރުމަށްޓަކައި ގެނައި ބަދަލާއެކު އޭސީސީގެ ފަރާތުން ވަނީ އެގާނޫނަށް ގެނައި ބަދަލަށް މަރުހަބާ ކިޔާފައި. އެހެންނަމަވެސް ކޮބައިތޯ މިއަދު ސަރުކާރުން ކުރަމުންދާ ކަންކަން.އެމްޑީޕީގެ ކައުންސިލް އިންތިޚާބުގެ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު
މީގެ އިތުރުން ވިދާޅުވީ މިނިވަން، ރީތި އިންތިޚާބެއް ބޭއްވުމަށް މަސައްކަތް ކުރަން ޖެހޭ ކަމަށާއި، ރައްޔިތުންނަށް ސުވާލު އުފެދޭ ކަންކަމުގައި ކަމާގުޅުންހުރި މުއައްސަސާތަކުން ޖަވާބުދާރީވެ، ރައްޔިތުންގެ އިތުބާރު ލިބޭ ގޮތަށް މަސައްކަތް ކުރަން ޖެހޭ ކަމަށެވެ.
