ކައުންސިލް އިންތިޚާބަށް ފޯމު ހުށަހަޅުމުގެ ވަގުތު އިތުރު ކޮށްދިން ނަމަވެސް މައްސަލައަށް ހައްލެއް ނުލިބޭ، ދުވަސް އިތުރު ކޮށްދޭން ޖެހޭ: އެމްޑީޕީ

ކުރިޔަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ އިންތިޚާބަށް ވާދަކުރާ ކެންޑިޑޭޓުންގެ ފޯމު ހުށަހަޅުމުގެ ވަގުތު އިލެކްޝަން ކޮމިޝަން (އީސީ)ން އިތުރު ކުރި ނަމަވެސް މައްސަލައަށް ހައްލު ނުލިބޭ ކަމަށާއި، ދުވަސް އިތުރު ކޮށްދިނުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އަނެއްކާ ވެސް ގޮވާލައިފި އެވެ. 

ބުދަ ދުވަހު ހެނދުނު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ކައުންސިލް އިންތިޚާބުގެ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ އިންތިޚާބަށް ކުށުގެ ރިކޯޑު ސާފު ކުރުމަށް މަސައްކަތް ކުރާއިރު ގުޅުންހުރި މުއައްސަސާތައް ކަމަށްވާ، ކަރެކްޝަނަލް ސަރވިސް އާއި ޖުޑީޝަލް ސަރވިސްއިން އެ ފޯމް ލިބުމަށް ވަރަށް ބޮޑަށް ލަސްވަމުންދާ ކަމަށާއި، މި މުއައްސަސާތަކުން އިންތިޚާބަށް ތައްޔާރުވެފައިވާ ކަމަށް ނުބެލެވޭ ކަމަށެވެ.

އެހެންކަމުން އިންތިޚާބަށް ފޯމް ހުށަހަޅުމަށް އިތުރު ދުވަސް ބޭނުންވާ ކަމަށާއި، އިތުރަށް 10 ދުވަސް ދިނުމަށް އޭނާ ގޮވާލެއްވި އެވެ. އަދި ވިދާޅުވީ އިތުރަށް ދުވަސް ނުދޭ ކަމަށްވާ ނަމަ އެހެން ގޮތަކަށް އެ ހައްގު ހޯދުމަށް މަސައްކަތް ކުރާނެ ކަމަށެވެ.

މިއާއެކު ބުދަ ދުވަހުގެ މެންދުރުފަހުން އީސީން ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އަށް ކުރިމަތިލުމަށް އެދޭ ފަރާތްތަކުގެ ފޯމު އޮންލައިންކޮށް ކޮންމެ ދުވަހަކު ހުށަހެޅޭނެ ވަގުތު 2 ގަޑިއިރަށް އިތުރުކޮށްފައިވާ ކަމަށެވެ.

އެގޮތުން 28 ޖެނުވަރީ 2026 ދުވަހުން ފެށިގެން 1 ފެބްރުވަރީ 2026 ވާ އާދިއްތަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30ން ހަވީރު 05:30ށް އަދި ހުކުރު ދުވަހު މެންދުރުފަހު 03:30ން ރޭގަނޑު 08:00ށް އިތުރުކޮށްފައިވާ ކަމަށެވެ. 

މިކަމަށް އިޝާރާތް ކުރައްވައި ރާއްޖެއެމްވީއަށް ވަހީދު ވިދާޅުވީ، އިންތިޚާބާ ގުޅިގެން ހުރި ކަންބޮޑުވުންތައް ހައްލު ކޮށްދިނުމަށް އީސީގެ ހެޔޮ ނިޔަތެއް ނެތް ކަމަށާއި، އެކޮމިޝަނުން މަސައްކަތް ކުރަނީ ސަރުކާރުގެ ހިންގާ ޕާޓީ، ޕީއެންސީއަށް ކަންކަން ފަހިވާ ގޮތަށް ކަމަށެވެ.

ވަހީދު ވިދާޅުވީ އިންތިޚާބަށް ފޯމް ހުށަހަޅުމަށް ދުވަސް އިތުރު ކޮށް ދިނުމަށް އެދިފައިވަނީ ގިނަ ކެންޑިޑޭޓުންގެ އެދުމުގެ މަތީން ކަމަށާއި، މިހާރު އޮންލައިން ކޮށް ހުށަހަޅާ ފޯމް ދެ ދުވަސް ނުވަތަ 3 ދުވަސް ފަހުން ރިޖެކްޓްވާ ކަމަށެވެ. އަދި ގިނަ ފަހަރު ފޯމް ރިޖެކްޓް ވަނީ އައިޑީކާޑު ނުވަތަ ކުށުގެ ރިކޯޑު ފޯމްގައި ދިމާވާ މައްސަލަ އަކުން ކަމަށް އޭނާ ވިދާޅުވި އެވެ. އަދި ވަގުތު ދެ ގަޑިއިރަށް އިތުރު ކުރި ނަމަވެސް މައްސަލައަށް ހައްލު ނުލިބޭ ކަމަށް ވަހީދު ވިދާޅުވި އެވެ.