މާލޭ ސިޓީ ކައުންސިލް ގެ ޖަލްސާތަކުގެ ކޯރަމް ގެއްލުވާލަނީ މުއިއްޒު ގެ މޭޔަރކަމުގައި ހިންގާފައިވާ ވައްކަމުގެ މައްސަލަތައް ބަލާތީ ގަސްތުގައި: ބިގޭ
މި ސަރުކާރުން ރައްޔިތުންގެ ބާރުވެރިކަން ވަނީ ގެއްލުވާލާފައި، ދެން އަންނަ އެމްޑީޕީގެ ވެރިކަމެއްގައި ލާމަރުކަޒީ ނިޒާމްގެ ބާރުތައް އިއާދަކުރާނެ.
ރައްޔިތުން ގެ މަޖިލީހުގެ އަލިފުށީ ދާއިރާ ގެ ކުރީ ގެ މެމްބަރު މުހައްމަދު ރަޝީދު ހުސެއިން (ބިގޭ) އެމްޑީޕީ ގެ ހަރުގެ ޖަލްސާގައި ވާހަކަދައްކަވަނީ. | ރާއްޖެ އެމްވީ
މާލޭ ސިޓީ ކައުންސިލް ގެ ޖަލްސާތަކުގެ ކޯރަމް ގެއްލުވާލަނީ މިހާރު ގެ ރައީސް ޑރ.މުހައްމަދު މުއިއްޒު ގެ މޭޔަރކަމުގައި ހިންގާފައިވާ ވައްކަމުގެ މައްސަލަތައް ބަލާތީ ގަސްތުގައި ކަމަށް ރައްޔިތުން ގެ މަޖިލީހުގެ އަލިފުށީ ދާއިރާ ގެ ކުރީ ގެ މެމްބަރު މުހައްމަދު ރަޝީދު ހުސެއިން (ބިގޭ) ވިދާޅުވެއްޖެ އެވެ.
އޭނާ އެފަދައިން ވިދާޅުވީ ހޯމަ ދުވަހުގެ ރޭ އެމްޑީޕީ ހަރުގެ ޖަލްސާ ގައި ވާހަކަދައްކަވަމުންނެވެ.
މާލޭ ސިޓީ ކައުންސިލްގެ ބައްދަލުވުމުގެ ކޯރަމް ހަމަ ނުވެގެން އުޅެނީ ކައުންސިލް މެމްބަރުން ގެ ފަރުވާކުޑަކަމުން ނުވަތަ މަސައްކަތަށް ޒިންމާދާރު ނުވެގެން އެކަނި ނޫން ކަމަށް ބިގޭ ވަނީ ފާހަގަކުރައްވާފަ އެވެ. ކައުންސިލް ގެ ކޯރަމް ގެއްލުވާލަނީ މުއިއްޒު އާ ގުޅުން ހުރި މައްސަލަތައް އެޖެންޑާ ކުރާތީ އެކަންކަން ކުރިއަށް ގެންދިޔަ ނުދިނުމަށް ކަމަށް އޭނާ ވިދާޅުވި އެވެ. އޭނާ ވަނީ މުއިއްޒު ގެ މޭޔަރ ކަމުގައި ކޮށްފައިވާ ވައްކަންތައް ބެލުން ކުރިއަށް ގެންދިއުމަށް ޕީއެންސީ ގެ ކައުންސިލް މެމްބަރުން ފުރުސަތު ނުދެނީ ރައްޔިތުންނަށް އެކަންކަން ހިނގައި ދިޔަ ގޮތް ސާފު ވެދާނެތީ ބިރުން ކަމަށް ވެސް ވިދާޅުވެފަ އެވެ.
"މާލޭ ސިޓީ (ކައުންސިލް) ގައި ކަންކަން ހިނގަނީ ރަނގަޅަކަށް ނޫން. ކަންކަން ބައްލަވާ ދާ ގޮތް. އަޅުގަނޑުމެން ގެ ވަށައިގެން މި ފެންނަނީ. ކައުންސިލް ގެ ކޯރަމް ގެއްލުވާލަނީ މުއިއްޒު ގެ މައްސަލަތައް އެޖެންޑާ ކުރަން ފެށި ހިސާބުން ގަސްތުގައި. ހަމައެކަނި އެންމެ ކަމެއް ނޫން. ކިތަންމެ ކިތަންމެ ކަމެއް އެގޮތަށް އެބަ ކުރޭ." އޭނާ ވިދާޅުވި އެވެ.
ބިގޭ އިތުރަށް ވިދާޅުވީ މި ސަރުކާރުން ރައްޔިތުން ގެ ބާރުވެރިކަން ގެއްލުވާލާފައިވާ ކަމަށެވެ. އަދި ކައުންސިލްތަކުގެ ބާރު ވެސް ސަރުކާރުން ނިގުޅައިގަނެފައިވާ ކަމަށް ބިގޭ ވަނީ ފާހަގަކުރައްވާފަ އެވެ.
"މިއީ އެމްޑީޕީ ގެ މެޖޯރިޓީ އެއް ކައުންސިލްތަކުގައި އޮންނަން ޖެހޭ ހިސާބަކީ. ލާމަރުކަޒީ ނިޒާމުގެ ތެރެއިން ކަންކަން ކުރަން އަޅުގަނޑުމެން ފުރުސަތު ހޯދާ ދިނިން. އެ ހުރިހާ ފުރުސަތެއް މި ވަނީ އެ ރަށެއް ގެ ފުއްޓަރުން އޮޔާލާފައި." ބިގޭ ވިދާޅުވި އެވެ.
މިއީ މަޑުމަޑުން ބަލަހައްޓައިގެން ތިބެވޭނެ ކަމެއް ނޫން ކަމަށާއި ދެން އަންނަ އެމްޑީޕީ ގެ ވެރިކަމެއްގައި ލާމަރުކަޒީ ނިޒާމް ގެ ބާރުތައް އިއާދަކުރާނެ ކަަމަށް އޭނާ ވިދާޅުވި އެވެ. ކުރިއަށް އޮތް ލޯކަލް ކައުންސިލް އިންތިޚާބުގައި އެމްޑީޕީ އަށް އާއްމުން ވޯޓު ދޭން ޖެހޭ ކަމަށާއި ކައުންސިލްތަކުގެ ބާރު ކިރިޔާ ވެސް ދެމި އޮންނާނީ އޭރުން ކަމަށް ވެސް ބިގޭ ވިދާޅުވި އެވެ.
