ކައުންސިލް އިންތިހާބަށް ވާދަކުރާ ކެނޑިޑޭޓުންގެ ކަންކަން ހަމަ އެކަނި އީފާސް މެދުވެރިކޮށް ކުރަން މަޖުބޫރު ކޮށްފަވާތީ، ޕީއެންއެފް އިން އިލެކްޝަންސް ގެ މައްޗަށް ދައުވާކޮށްފި
ޕީއެންއެފް ގެ ރައީސް ޔާމީން ވިދާޅުވީ ހަމައެކަނި އީފާސް ބޭނުންކުރަން ނިންމުމުގެ ގާނޫނީ ބާރު އިލެކްޝަންސް އަށް ނުލިބޭ ކަމަށާއި ދިވެހިރާއްޖޭގެ ހުރިހާ މުއާމަލާތެއް ކުރަނީ ކަރުދާހުން ކަމަށް. އަދި ޝަރުއީ ކޯޓު ތަކުގައި ވެސް ހެތްކެއް ބަލައިގަންނަނީ، އޭގެ އަސްލު ކިތާބީ ނުވަތަ ޝަފަހީ ހެކި އޮންނަ ނަމަ، ކަމަށް.
ކުރީގެ ރައީސް އަބްދުﷲ ޔާމީން | ޕީޕަލްސް ނެޝަނަލް ފްރަންޓް (ޕީއެންއެފް)
ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްގީ އަށް މަސައްކަތްކުރާ ކޮމިޓީ ތަކުގެ އިންތިހާބަށް ކުރިމަތިލާ ކެނޑިޑޭޑުން ފޯމް ހުށަހެޅުމުގެ ހުރިހާ ކަމެއް އީފާސް މެދުވެރިކޮށް ކުރަން މަޖުބޫރު ކޮށްފަވާތީ، ޕީއެންއެފް އިން އިލެކްޝަންސް އާ ދެކޮޅަށް ދައުވާ އުފުލައިފި އެވެ.
މިކަމާ ގުޅިގެން އާދީއްތަ ދުވަހުގެރޭ ޕީއެންއެފް އިން ބޭއްވި ޖަލްސާ އެއްގައި އެ ޕާޓީ ގެ ރައީސް އަބްދުالله ޔާމީން އަބްދުލްގައްޔޫމް ވިދާޅުވީ، ހަމައެކަނި އީފާސް ބޭނުންކޮށްގެން ކެންޑިޑޭޓުންގެ ކަންކަން ކުރިއަށް ގެންދިޔުމަށް ގާނޫނީ ގޮތުން ވެސް އިލެކްޝަންސް އަށް ބާރު ނުލިބޭ ކަމަށާއި މި މައްސަލައިގައި މިހާރު އިލެކްޝަންސް އާއި ދެކޮޅަށް ކޯޓުގައި ދައުވާ އުފުލާފައިވާނެ ކަމަށެވެ.
ޔާމީން އިތުރަށް ވިދާޅުވީ ޝަރުއީ ކޯޓު ތަކުގައި ވެސް ހެތްކެއް ބަލައިގަންނަނީ، އޭގެ އަސްލު ކިތާބީ ނުވަތަ ޝަފަހީ ހެކި އޮންނަ ނަމަ، ކަމަށެވެ. އެހެންކަމުން، ކަރުދާހުން ކުރާ މުއާމަލާތް އެއްކޮށް ހުއްޓައިލުމުގެ ބާރު އިލެކްޝަންސް ކޮމިޝަނަށް ލިބިގެން ނުވާ ކަމަށެވެ.
ގާނޫނުން ބާރު ނުލިބޭ އެއްވެސް ގަވާއިދެއް ހެދުމުގެ އެއްވެސް އިޚްތިޔާރެއް އިލެކްޝަންސް އަދި އެހެންތަނަކަށް ވެސް ނޯންނާނެ. އިލެކްޝަސް އާއި ބެހޭ ގާނޫނު އެ އޮތީ އޭ. އިލެކްޝަންސް އާ ބެހޭ ގާނޫނުގަ އީފާސް ގެ ވާހަކަ އެއް ނޯންނާނެ. ޓެކްނޮލޮޖީ ބޭނުންކޮށްގެން މި ބޭނުންކުރާ އެކި އެކި ވަސީލަތްތައް އޭގެ ޒާތުގަ، އިތުރު ކިތާބީ ހެކި ނެތި، އެއީ އޮރިޖިނަލް ކިތާބީ ހެކި ނެތި ނޫނީ ޝަފަހީ ހެކި، އެޔަށް ބާރުދޭ ހެކި ނެތި ޝަރީއަތުގެ މަޖިލީހުގަ އެ، އޭގެ ޒާތުގަ ސްޓޭންޑްއެލޯން ހެތްކެއްގެ ގޮތުގަ ބަލައެއް ނުގަނޭ. ދިވެހިރާއްޖޭގެ ހުރިހާ ކަމެއް މި ހިނގަނީ ކަރުދާހުން. ޝަރީއަތުގެ މަޖިލީހަށް އިލެކްޓޯނިކް ވަސީލަތެއް ވަތް ނަމަވެސް، އެމީހުން އެބަ ބޭނުންވޭ ކަރުދާހުން ހާޑް ކޮޕީ މީހާ ސޮއެ ކޮށްފަ އޮންނަ. އެދެއްތޯ ހެތްކެއްގެ ގޮތުގަ މިބަލައިގަންނަނީ. އެއީ އަޅުގަނޑުމެން މިކުރާ ކަންކަމުގަ ފައިސަލާ ކުރާ އެންމެ ފަހު ބާރު. އަދި އަޅުގަނޑުމެން ހުރިހާ ކަމަކަށް ދާން އޮތް ތަން 3 ކޯޓުގެ މަރުހަލާ. އިލެކްޝަންސް މިކުރާ ކަންކަމުގަ އީފާހާ ދެންވެސް ހުރި އެއްޗެއް ބޭނުންކުރި ނަމަވެސް ހަގީގަތުގަ ޝަރުއީ މަރުހަލާގަ ބޭނުންކުރާ އެއްޗަކަށް މި އޮތީ ކަރުދާސް. އެހެން ވީމަ ކަރުދާސް ފޯމު ފުރާ ފުރުން ނައްތާލެވޭނެ ގޮތެއް އޮންނާނެހޭ. އަދި އެއް ނެތް. އޮންނާނި އެންމެ ގޮތެއް، އެއީ ގާނޫނަށް އެގޮތަށް އިސްލާހު ގެނައުން. އެކަމެއް ކޮށްފައެއް ނެތް. އެހެންވީމަ އަޅުގަނޑުމެން މި އުޅެނީ މި މައްސަލަ ހިފައިގެން އިލެކްޝަންސް ގޮވައިގެން ކޯޓަށް ވަދެޕީއެންއެފް ގެ ރައީސް އަބްދުالله ޔާމީން އަބްދުލްގައްޔޫމް
މައްސަލަ ކުރިއަށް ގެންދާނެ ކަމާމެދު ސުވާލު އުފައްދަވާ ޔާމީން ވިދާޅުވީ، ދިވެހިރާއްޖޭގެ ޝަރުއީ ކޯޓުތަކުގައި މިނިވަންކަން ނެތް ކަމަށެވެ. ކޯޓުގައި އެ މައްސަލަ ކުރިއަށް ނުގެންދިޔަ ނަމަވެސް، ހަމައެކަނި އީފާސް ބޭނުންކުރަން ނިންމުމުގެ ގާނޫނީ ބާރު އިލެކްޝަންސް އަށް ލިބިގެން ނުވާކަން ދިވެހިރައްޔިތުން ގަބޫލު ކުރާނެ ކަމަށެވެ. އަދި މިކަހަލަ ވިޔާނުދާ ކަންކަން އިލެކްޝަންސް އިން އެކުރަނީ ރައީސް މުއިއްޒު އިލެކްޝަންސްގެ ކަންކަމުގެ ތެރެޔަށް ވަދެގެން ކަމަށް ޔާމިން ތުހުމަތު ކުރެއްވި އެވެ.
މި އަހަރުގަ ބާއްވާ މި އިންތިހާބު ތަކަށް ވާދަކުރާ ކެންޑިޑޭޓުންގެ ފޯމް އަދި އަދި އަމިއްލަ ގޮތުން ވާދަކުރާ ކެނޑިޑޭޓުން ފުރިހަމަ ކުރަންޖެހޭ 50 މީހުންގެ ތާއީދު ފޯމު ވެސް ފުރަން ޖެހެނީ އީފާސް މެދުވެރިކޮށެވެ. މިކަމާ ގުޅިގެން އިދިކޮޅު އެންމެ ބޮޑު ޕާޓީ އެމްޑީޕީ އިން ވެސް ކަންބޮޑުވުން ފާޅުކޮށްފަ ވާއިރު، ޕީއެންއެފް އިން ވަނީ ފާއިތުވެ ދިޔަ ހަފްތާގެ އަންގާރަ ދުވަހު މިކަމަށް ހައްލެއް ހޯދުމަށް އިލެކްޝަންސް ކޮމިޝަނުގެ ވެރިންނާ ބައްދަލުވެސް ކުރައްވާފަ އެވެ.
އެ ދުވަހު ޕީއެންއެފް ގެ ފަރާތުން ބުނީ ހަމައެކަނި އޮންލައިންކޮށް ކެންޑިޑޭޓުންނަށް ފޯމު ހުށަހެޅޭ ގޮތަށް އިންތިޒާމްތައް ހަމަޖެއްސުމަކީ ބަލައިގަނެވޭ ކަމެއް ނޫން ކަަމަށެވެ. އަދި އިލެކްޝަންސް ކޮމިޝަނަށް ގޮސްގެން ފޯމު ހުށަހެޅުމުގެ މަސައްކަތް ކުރެވޭނެ މަގު އިލެކްޝަންސް ކޮމިޝަނުން ފަހިކޮށްދޭން ޖެހޭނެ ކަމަށާއި އެއީ ކުރިއަރާފައިވާ މުޖުތަމައުތަކުގައި ވެސް އަމަލުކުރާ ގޮތް ކަމަށެވެ.
ކުރިޔަށް އޮތް ލޯކަލް ކައުންސިލް އިންތިހާބު ކާމިޔާބު ކުރުމަށްޓަކާ ސަރުކާރުން ދަނީ އެކި ގޮތްގޮތުން ނުފޫޒު ފޯރުވާ، ސާރުކާރު މުވައްޒަފުންނަށް ބިރު ދެއްކަމުގެ އަމަލުތައް ވެސް ހިންގަމުން ކަމަށް ގިނަ ފަރާތްތަކަކުން ތުހުމަތު ކުރެ އެވެ.
