ކައުންސިލް އިންތިޚާބަށް މުއިއްޒު ނެރުއްވާ ކެންޑިޑޭޓުން ޕްރޮމޯޓު ކުރުމަށް މާލޭ ރަށްވެހިންނަށް ދޫކޮށްފައިވާ ގޯތީގެ ވާހަކަ ދައްކަވަން މުލީއާގޭ ގައި ބައްދަލުވުމެއް ބާއްވައިފި
މުލީއާގޭ ގައި ބޭއްވި ބައްދަލުވުމުގައި ރައީސް މުއިއްޒު ވަނީ ގިރާވަރު ފަޅުހިއްކުން މި ހަފްތާގައި ފެށިގެންދާނެ ކަމަށާއި ދެ މަހެއްގެ ތެރޭގައި ނިމި ރޯދަ ކުރިން ގޯތީގެ ރަޖިސްޓްރީތައް ހަވާލުކޮށް ނިންމާނެ ކަމަށް ވިދާޅުވެފަ. އަދި 2027 ގައި ގިރާވަރު މާލެ އާ ގުޅާލުމަށް ބްރިޖްގެ މަސައްކަތް ފަށާނެ ކަމަށާއި ހުޅުމާލޭ ފޭސް 3 ގެ ގޯތިތަކުގެ ރަޖިސްޓްރީ ވެސް ރޯދަ ކުރިން ހަވާލުކުރާނެ ކަމަށް ވިދާޅުވި.
ގުޅީފަޅު، ހުޅުމާލެ އަދި ގިރާވަރުން ގޯތި ލިބުނު ބައެއް ފަރާތްތަކާ އެކު ރައީސް މުއިއްޒު މުލީއާގޭގައި ބޭއްވި ބައްދަލުވުމުގެ ތެރެއިން - ޖަނަވަރީ 26، 2026. | އެކްސް
ކުރިއަށް އޮތް ލޯކަލް ކައުންސިލް އިންތިޚާބު އަދި އަންހެންނުންގެ ތަރައްގީ އަށް މަސައްކަތް ކުރާ ކޮމިޓީގެ އިންތިޚާބު ގައި މާލެ އިން ރައީސް މުއިއްޒު ނެރުއްވާ ކެންޑިޑޭޓުން ޕްރޮމޯޓު ކުރުމަށް މާލޭ ރަށްވެހިންނަށް ދޫކޮށްފައިވާ ގޯތީގެ ކަންތަކާ ބެހޭ އިވެންޓެއް މުލީއާގޭ ގައި ބާއްވައިފި އެވެ.
ހޯމަ ދުވަހުގެ މެންދުރުފަހު 3:00 ން ހަވީރު 5:00ށް ދެމިގެން ދިޔަ މި ބައްދަލުވުމުގައި ކައުންސިލް އިންތިޚާބު ގައި މާލޭގެ މޭޔަރު ކަމަށް މުއިއްޒު އިޚްތޔާރު ކުރައްވާފައިވާ ކަމަށް ވިދާޅުވެފައިވާ ކެންޑިޑޭޓް މުސާ އަލީ ޖަލީލް އާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ރައީސާ ކަމަށް ނެރޭ ކެންޑިޑޭޓް އައިޝަތު އަލައިކާ އަދުނާން ވަނީ ބައިވެރިވެފަ އެވެ.
ބައްދަލުވުމަށް ދިޔަ ބައިވެރިޔަކު ނަން ނުޖެހުމަށް ޝަރުތު ކޮށް ބުނީ، އެ ދެ ފަރާތުން އެ ބައްދަލުވުމުގައި ބައިވެރިވި ރަސްމީ ހައިސިއްޔަތެއް އޮތް ކަމަށް ގަބޫލު ނުކުރާ ކަމަށާއި، އޭގެ ހަމަ އެކަނި ބޭނުމެއް ކަމަށް ގަބޫލު ކުރެވެނީ ކެންޑިޑޭޓުން ޕްރޮމޯޓު ކުރުން ކަމުގައެވެ.
"ނުސީދާ ކޮށް ރައީސް މުއިއްޒު އެ ވިދާޅުވާން އުޅެނީ ކަންނޭނގެ ދެން މި މީސް މީހުން ހޮވައިގެންނޭ، ގޯތީގެ ކަންކަން ކަލޭމެންނަށް ހަމަ ޖެހޭނީ،" އޭނާ ބުންޏެވެ.
މި ބައްދަލުވުމުގައި ލޯކަލް ކައުންސިލް އިންތިޚާބުގައި ވެރިކަން ކުރާ ޕާޓީގެ ކެމްޕޭން މެނޭޖަރުކަން ހަވާލު ކޮށްފައިވާ އިނގުރައިދޫ ދާއިރާގެ ރައްޔިތުންގެ މަޖިލީހުގެ މެމްބަރު އިބްރާހީމް ފަލާހް ވެސް ބައިވެރިވެ ވަޑައިގަތެވެ.
މައުލޫމާތު ލިބިފައިވާ ގޮތުގައި މި ބައްދަލުވުމުގައި ރައީސް މުއިއްޒު ވަނީ ގިރާވަރު ފަޅުހިއްކުން، މި ހަފްތާ ގައި ފެށިގެން ދާނެ ކަމަށާއި، ދެ މަސް ތެރޭގައި ހިއްކާ ނިމޭނެ ކަމަށާއި ރޯދައިގެ ކުރިން ،ގިރާވަރުން ދޫކޮށްފައިވާ ގޯތީގެ އައު ރަޖިސްޓްރީތައް ހަވާލުކޮށް ނިންމާނެ ކަމަށް ވިދާޅުވެފަ އެވެ.
އޭގެ އިތުރުން ގިރާވަރު ފަޅު ހިއްކާ ނިމެންވާއިރަށް، ފެނާއި ނަރުދަމާގެ މަސްކަތް ފެއްޓޭނެ ކަމަށާއި އަދި ގޯތިތަށް ހަވާލު ކުރަން ފަށާނެ ކަމަށް ވެސް މުއިއްޒު ވިދާޅުވި އެވެ.
ބައްދަލުވުމުގައި 2027 ގަ ގިރާވަރު މާލެ އާއި ގުޅާލެވޭ ބްރިޖްގެ މަސައްކަތް ފެއްޓޭނެ ކަމަށް ވެސް މުއިއްޒު ވިދާޅުވި އެވެ.
އޭގެ އިތުރުން ހުޅުމާލޭގައި ބިން އިތުރަށް ދެވެން ނެތުމާ އެކު ގިރާވަރުގެ ބައެއް ގޯތި އެހެން ތަނަކަށް ބަދަލުވުމުގެ ފުރުސަތު ކުޑަ ކަމަށް ވެސް މުއިއްޒު ވިދާޅުވި އެވެ.
ގުޅީފަޅުން ދީފައިވާ ގޯތިތަކާ ބެހޭ ގޮތުން ދެއްކެވި ވާހަކައިގައި މިހާރު ވަށާފާރު ރާނައި،ގަސް އިންދާ ހެދޭނެ ކަމަށް މުއިއްޒު ވިދާޅުވި އެވެ.
އަދި ބްރިޖް ގެ މަސައްކަތަށް ބަންދުވެފައި އޮތް ސަރަޙައްދު ނޫން އެހެން ސަރަޙައްދުތަކުން ގޯތި ހަވާލު ކުރާނެ ކަމަށާއި ފެބްރުއަރީ މަސް ނިމޭ ހިސާބު ގައި ފެނާ ނަރުދަމާގެ މަސައްކަތް ފެއްޓޭނެ ކަމަށާއި އެ މަސަކަތް ކުރާނީ ރޯޑް ޑިވެލޮޕްމަންޓް ކޯޕަރޭޝަނުން ކަމަށް މުއިއްޒު ވިދާޅުވި އެވެ.
ހުޅުމާލޭ ފޭސް 3 ން ގޯތި ދޭން އޮތް ސަރަހައްދު މުޅިން ހިއްކާ ނިމިފައިވާ ކަމަށާއި، ދޫކޮށްފައިވާ ގޯތީގެ ރަޖިސްޓަރީ ރޯދައިގެ ކުރިން ހަވާލު ކުރާނެ ކަމަށާއި ހުޅުމާލޭގައި 10 ބުރިޔަށް މިހާރު އިމާރާތް ކުރެވޭނެ ކަމަށް ވެސް މުއިއްޒު ވިދާޅުވި އެވެ.
މާލެ ރައްވެހިންގެ ޖަމިއްޔާ އަދި ގިރާވަރު ޖަމިއްޔާގެ މެމްބަރުން ވެސް ހާޒިރުވި މި ބައްދަލުވުމުގައި މުއިއްޒު ދެއްކެވި ވާހަކައިގައި ބިންވެރިޔާ ސްކީމްގެ ދަށުން ޒުވާނުންނަށް ލިބުނު ގޯތިތަކަށް ވީ ގޮތް އެނގިވަޑައި ނުގަންނަވާ ކަމަށާއި އެގޯތިތަކުގެ ކަންތައް ގޮސްފައި އޮތް ގޮތެއް ބައްލަވާނެ ކަމަށް ވެސް ވިދާޅުވިއެވެ.
މީގެ އިތުރުން އުތުރު ތިލަފަޅު ހިއްކަން ފަށާ އެތަނުން ވެސް ގޯތި ދޭނެ ވާހަކަ އާއި އަދި ބުރިޖަކުން އެތަން ވެސް ގުޅާލެވޭނެ ވާހަކަ ވެސް މުއިއްޒު ވިދާޅުވި އެވެ. އަދި މިހާރުގެ ސްކީމްގައި ބައެއް ފަރާތްތަކަށް ފޯމު ނުލެވޭތީ އެންމެނަށް ބޯހިޔާވަހިކަމަށް ލެވޭނެ ގޮތަކަށް އުސޫލު އިސްލާހު ކުރަން ވިސްނަވާ ކަމަށް ވެސް މުއިއްޒު ވިދާޅުވި އެވެ.
ހޯމަ ދުވަހު މުލީ އާގޭގައި ބޭއްވި ބައްދަލުވުމުގައި ކުރީ ސަރުކާރުން މާލޭގެ ރަށްވެހިންނަށް ދޫކޮށްފައިވާ ގޯތީގެ ކަންކަމާ ބެހޭ ގޮތުން އުއްމީދު ލިބޭ ޒާތުގެ ވާހަކަ ދައްކަވަން މުއިއްޒު ބަައްދަލުވުމެއް ބޭއްވެވި އިރު ގޯތިތައް ހަވާލު ކުރުން ލަސްވެގެން ހިތްހަމަ ނުޖެހުން ފާޅުކުރުމުގެ ގޮތުން ފާއިތުވެ ދެ އަހަރު ތެރޭ އެތައް ހަރަކާތެއް މާލޭ ގައި ވަނީ ބާއްވާފަ އެވެ. ކުރީ ސަރުކާރުން ދޫކޮށްފައިވާ ފްލެޓް އާއި ގޯތީ ގެ ކަންކަން ރައްޔިތުންގެ މަޖިލީހުގެ އިންތިޚާބުގެ ދުވަސްވަރު ވެސް މި ސަރުކާރުން ސިޔާސީ ކުރި ފަދައިން ކައުންސިލް އިންތިޚާބު ބޯމަތިވަމުން އަންނަ އިރު އަނެއްކާ ވެސް މި ވަނީ ސިޔާސީ ކުރަން ފަށާފަ އެވެ.
އޭގެ އިތުރުން، މުލީއާގޭ ގައި މި ބައްދަލުވުން ބޭއްވި އިރު، ކަމާ ބެހޭ ސަރުކާރުގެ މިނިސްޓަރަކު ވެސް އަދި އިސް އޮފިޝަލަކު ވެސް ބައިވެރިކޮށްފައި ނުވާ އިރު، ވެރިކަން ކުރާ ޕާޓީ ގެ ކެންޑިޑޭޓުން ޕްރޮމޯޓު ކުރުމަަށް ސަރުކާރުގެ ވަސީލަތްތައް އިންތިހާ އަށް ބޭނުން ކުރަމުންދާ ކަމުގެ ޝަކުވާތައް ވެސް ވަނީ އިތުރުވެފަ އެވެ.
