ކައުންސިލް އިންތިޚާބަށް ފޯމު ހުށަހަޅުމުގެ މުއްދަތު އިތުރު ކޮށްދިނުމަށް އެމްޑީޕީން ގޮވާލައިފި

ކުރިޔަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ އިންތިޚާބަށް ވާދަކުރާ ކެންޑިޑޭޓުންގެ ފޯމު ހުށަހަޅުމުގެ މުއްދަތު އިތުރު ކޮށްދިނުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން އިލެކްޝަންސް ކޮމިޝަނަށް ގޮވާލައިފި އެވެ.

ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ކައުންސިލް އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ ކައުންސިލް އިންތިޚާބާ ގުޅިގެން ގިނަ ކަންބޮޑުވުންތަކެއް އެބަހުރި ކަމަށާއި، އިލެކްޝަން ކޮމިޝަން (އީސީ)ން ފޯމް ހުށާހެޅުމަށް ހުޅުވާލި ހިސާބުން އެކަންބޮޑުވުތައް ކޮމިޝަންގެ ސަމާލު ކަމަށް ގެންނަމުންދާ ކަމަށެވެ. ނަމަވެސް އީސީން އެކަންކަމަށް ސަމާލުކަން ނުދޭ ކަމަށް އޭނާ ވިދާޅުވި އެވެ. 

ވަހީދު ވިދާޅުވީ އިންތިޚާބަށް ކުށުގެ ރިކޯޑު ސާފު ކުރުމަށް މަސައްކަތް ކުރާއިރު ގުޅުންހުރި މުއައްސަސާތައް ކަމަށްވާ، ކަރެކްޝަނަލް ސަރވިސް އާއި ޖުޑީޝަލް ސަރވިސްއިން އެ ފޯމް ލިބުމަށް ވަރަށް ބޮޑަށް ލަސްވަމުންދާ ކަމަށާއި، މި މުއައްސަސާތަކުން އިންތިޚާބަށް ތައްޔާރުވެފައިވާ ކަމަށް ނުބެލެވޭ ކަމަށެވެ. 

އެހެންކަމުން އިންތިޚާބަށް ފޯމް ހުށަހަޅުމަށް އިތުރު ވަގުތު ބޭނުންވާ ކަމަށާއި، އިތުރަށް 10 ދުވަސް ދިނުމަށް އޭނާ ގޮވާލެއްވި އެވެ. އަދި ވިދާޅުވީ އިތުރު ވަގުތު ނުދޭ ކަމަށްވާ ނަމަ އެހެން ގޮތަކަށް އެ ހައްގު ހޯދުމަށް މަސައްކަތް ކުރާނެ ކަމަށެވެ. 

އެއިން ކޮންމެ ތަނަކަށް ފޯމެއް ހުށަހެޅުމަށްފަހު ތިން ދުވަސް، ހަތަރު ދުވަސް ނޫނީ ފަސް ދުވަސް އެބަ ވޭ. އަޅުގަނޑުމެން އިންތިޚާބަށް ފޯމް ލުމަށްޓަކައި މިއޮތީ 16 ދުުވަހުގެ މުއްދަތެއް އިލެކްޝަނުން ދީފައި. ދީފައި އޮތް ކަމަށްވާއިރުގަ ހަތަރު ދުވަސް 5 ދުވަސް މި ކުށުގެ ރިކޯޑު ސާފު ކުރުމަށްޓަކައި ދޫކޮށްލާފައި ބާކީ މިއޮތް ދުވަސްތަކުގެ ތެރޭގައި އިލެކްޝަނަށް ފޯމް ހުށަހަޅާއިރުގައި އިލެކްޝަނުން މިހާރު އީފާސް މެދުވެރިވެގެން ހުށަހަޅާއިރުގައި ކޮންމެވެސް ކަހަލަ މައްސަލައެއް ދިމާވެއްޖެއްޔާ އަޅުގަނޑުމެންނަށް އެބަ އަންގާ އެ ފޯމް ރިޖެކްޓްވީ ކަމަށް. އެހެންވީމަ މިދީފައި އޮތް މުއްދަތަކީ ވަރަށް ކުރު މުއްދަތެއް. އަދި ޚާއްސަކޮށް މި މުއްދަތުގެ ތެރޭގައި ހަމައެކަނި އޮންލައިން ހުށަހަޅުމަށްޓަކައި ޖާގަ ދީފައި އޮތުމަކީ މިއިންތިޚާބަށް ގިނަ ކެންޑީޑޭޓުންގެ އިންތިޚާބީ ހައްގު ނިގުޅައިގަނެވިގެންދާނެ ކަމެއްގެ ގޮތުގައި އެބަ ފެނޭ. 

އަބްދުﷲ ވަހީދު

ސިޓީ ކައުންސިލްތަކާއި ރަށު ކައުންސިލްތައް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ އިންތިޚާބަށް ކުރިމަތިލުމުގެ ފުރުސަތު އީސީން ހުޅުވާލީ، 17 ޖެނުއަރީން ފެށިގެން 01 ފެބްރުއަރީ، ވާ އާދީއްތަ ދުވަހުގެ 15:30 ގެ ނިޔަލަށެވެ. 

އެގޮތުން ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30ން މެންދުރުފަހު 15:30ށް އަދި ހުކުރު ދުވަހު މެންދުރުފަހު 15:30ން ހަވީރު 18:00ށް ފޯމް ހުށަހެޅޭނެ ކަމަށް އީސީން ބުނެ އެވެ. އަދި ފޯމް ހުށަހަޅަން ޖެހެނީ އޮންލައިންކޮށް، މައި ޕޯޓަލް މެދުވެރިކޮށެވެ.

މެނުއަލް ކޮށް ވެސް ފޯމް ހުށަހެޅޭ ގޮތް ހަދައިދިނުމަށް އެމްޑީޕީ ގެ އިތުރުން ޕީއެންއެފް އިން ގޮވާލާފައިވެ އެވެ.