ކައުންސިލް އިންތިޚާބަށް 1600ށް ވުރެ ގިނަ ފޯމު، މިހާތަނަށް ގަބޫލުކުރީ 1324 ކެންޑިޑެސީ

ސިޓީ ކައުންސިލްތަކާއި ރަށު ކައުންސިލްތައް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ އިންތިޚާބަށް ކުރިމަތިލުމަށް ހުޅުވާލި ފުރުސަތުގައި މިހާތަނަށް 1633 ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ. 

އެ ކޮމިޝަނުން ބުނީ މި މަހުގެ 25 ވަނަ ދުވަހުގެ ހެނދުނު 10:00 ގެ ނިޔަލަށް ޖުމްލަ 1633 ފޯމު ލިބިފައިވާ ކަމަށެވެ. އެއީ ކައުންސިލަށް ކުރިމަތިލުމަށް އެދި ހުށަހަޅާފައިވާ 933 ފޯމުގެ އިތުރުން ޑަބްލިއުޑީސީ އަށް ކުރިމަތިލުމަށް ހުށަހަޅާފައިވާ 700 ފޯމު ކަމަށް އީސީ އިން ވަނީ ބުނެފަ އެވެ. 

Advertisement

އީސީ އިން ބުނީ ކައުންސިލަށް ކުރިމަތިލުމަށް އެދި ހުށަހެޅި ޖުމްލަ ފޯމުގެ ތެރެއިން 750 ފޯމަކީ ކެންޑިޑެސީ ގަބޫލު ކޮށްފައިވާ ފޯމު ކަމަށެވެ. އަދި ކެންޑިޑެސީ ގަބޫލު ނުކުރާ 183 ފޯމު ގެ ތެރެއިން އަލުން 77 ފޯމު ހުށަހަޅާފައިވާ ކަމަށެވެ. 

ލޯކަލް ކައުންސިލް އިންތިޚާބުގައި ވާދަކުރަން ސިޔާސީ ޕާޓީތަކުން ހުށަހެޅީ 730 ފޯމެވެ. އޭގެތެރެއިން 617 ކެންޑިޑޭޓުންގެ ކެންޑިޑެސީ ގަބޫލު ކޮށްފައިވާއިރު 113 ކެންޑިޑޭޓުންގެ ކެންޑިޑެސީ ގަބޫލުކޮށްފައެއް ނުވެ އެވެ. އޭގެ ސަބަބުން ސިޔާސީ ޕާޓީތަކުން ވަނީ 41 ފޯމު އަލުން ހުށަހަޅާފަ އެވެ. 

ކައުންސިލަށް އަމިއްލަ ގޮތުން ވާދަކުރަން ހުށަހެޅި 203 ފޯމުގެ ތެރެއިން 133 ކެންޑިޑޭޓުންގެ ކެންޑިޑެސީ އީސީ އިން ވަނީ ގަބޫލު ކޮށްފަ އެވެ. 70 ކެންޑިޑޭޓުންގެ ކެންޑިޑެސީ ގަބޫލުކޮށްފައި ނުވާއިރު އަލުން 36 ފޯމު ހުށަހަޅާފައިވެ އެވެ.

ޑަބްލިއުޑީސީ އަށް ކުރިމަތިލުމަށް ހުށަހަޅާފައިވާ 700 ފޯމުގެ ތެރެއިން 574 ފޯމަކީ ކެންޑިޑެސީ ބަލައިގެންފައިވާ ފޯމެވެ. ކެންޑިޑެސީ ގަބޫލު ނުކުރާ 126 ފޯމުގެ ތެރެއިން 34 ފޯމު އަލުން ހުށަހަޅާފައިވާ ކަމަށް ކޮމިޝަނުން ވަނީ ބުނެފަ އެވެ. 

ސިޔާސީ ޕާޓީތަކުން ޑަބްލިއުޑީސީ ގައި ވާދަކުރަން ހުށަހަޅާފައި ވަނީ 565 ފޯމެވެ. އޭގެތެރެއިން 488 ކެންޑިޑޭޓުންގެ ކެންޑިޑެސީ ގަބޫލު ކޮށްފައިވާ އިރު އެ ކޮމިޝަނުން 77 ކެންޑިޑޭޓުން ގެ ކެންޑިޑެސީ ގަބޫލު ކޮށްފައެއް ނުވެ އެވެ. އެހެންކަމުން 15 ފޯމު އަލުން ހުށަހަޅާފައި ވެ އެވެ. 

އެ ކޮމިޝަނުން ބުނެފައި ވަނީ އަމިއްލަ ގޮތުން ޑަބްލިއުޑީސީ އަށް ވާދަކުރަން ހުށަހެޅި 135 ފޯމުގެ ތެރެއިން 86 ކެންޑިޑޭޓުންގެ ކެންޑިޑެސީ ގަބޫލު ކޮށްފައިވާ ކަމަށެވެ. އަދި 49 ކެންޑިޑޭޓުންގެ ކެންޑިޑެސީ ގަބޫލުކޮށްފައި ނުވާއިރު އަލުން 19 ފޯމު ހުށަހަޅާފައިވާ ކަމަށެވެ. 

ކެންޑިޑެސީ ގަބޫލުނުކުރާ ސަބަބުތަކުގެ ތެރޭގައި ހިމެނެނީ ކުށާއި ދަރަނީގެ ރެކޯޑު ފުރިހަމައަށް ހުށަހަޅާފައި ނުވުމާއި، ކުށެއް ނުވަތަ ދަރަންޏެއް އޮތް ނަމަ އެކަމުގެ ތަފްސީލު ހުށަހަޅާފައި ނުވުމުގެ އިތުރުން ކަރެކްޝަނަލް ސަރވިސް އިން ފުރިހަމަކޮށް ހުށަހަޅަންޖެހޭ ކުށުގެ ރެކޯޑު ހުށަނާޅާތީ ކަމަށް އެ ކޮމިޝަނުން ވަނީ ފާހަގަ ކޮށްފަ އެވެ. 

ކައުންސިލް އިންތިޚާބަށް ކުރިމަތިލުމުގެ ފުރުސަތު ހުޅުވާލީ 17 ޖެނުއަރީން ފެށިގެން 01 ފެބްރުއަރީ، ވާ އާދީއްތަ ދުވަހުގެ 15:30 ގެ ނިޔަލަށެވެ. އެގޮތުން ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30ން މެންދުރުފަހު 15:30 އަށް އަދި ހުކުރު ދުވަހު މެންދުރުފަހު 15:30ން ހަވީރު 18:00ށް ފޯމް ހުށަހެޅޭނެ ކަމަށް އީސީން ބުނެ އެވެ.

ލޯކަލް ކައުންސިލްތަކުގެ އިންތިޚާބު ގައި ސިޓީ ކައުންސިލްތަކުގެ މޭޔަރުންނާއި ސިޓީ ކައުންސިލްގެ މެންބަރުންނާއި ސިޓީ ކައުންސިލްގެ އަންހެން މެންބަރުން ހޮވާނެ އެވެ. އަދި ރަށު ކައުންސިލްތަކުގެ ރައީސުންނާއި ރަށު ކައުންސިލްތަކުގެ މެންބަރުންގެ އިތުރުން ރަށު ކައުންސިލްތަކުގެ އަންހެން މެންބަރު ވެސް އިންތިޚާބު ކުރާނެ އެވެ. މީގެ އިތުރުން ޑަބްލިއުޑީސީގެ އިންތިޚާބު ގައި ރަށްރަށުގެ ޑަބްލިއުޑީސީގެ ރައީސުންނާއި ކޮމިޓީގެ މެންބަރުން އިންތިޚާބު ކުރާއިރު، ސިޓީތަކުގައި ވެސް ޑަބްލިއުޑީސީގެ ރައީސުންނާއި ކޮމިޓީ މެންބަރުން އިންތިޚާބު ކުރާނެ އެވެ.

ލޯކަލް ކައުންސިލްތަކުގެ އިންތިޚާބު 2026 ގެ ވޯޓު ނެގުމަށް ހަމަޖެހިފައިވަނީ، 2026 އެޕްރީލް 04 ވާ ހޮނިހިރު ދުވަހުގެ 8:00ން 16:00 އަށެވެ. އަދި ވޯޓު ގުނަން ފަށާނީ ހަމަ އެ ދުވަހު ވޯޓު ނަގާ ނިމޭތާ 30 މިނެޓުގެ ހުސްވަގުތުކޮޅަކަށް ފަހުގަ އެވެ.

މި އިންތިޚާބުގެ ރަސްމީ ނަތީޖާ އިއުލާނުކުރުމަށް ހަމަޖެހިފައިވަނީ 2026 އެޕްރީލް 11 ވާ ހޮނިހިރު ދުވަހު ކަމަށް އީސީން ބުނެ އެވެ.